【 #暖男爸爸短評 - 即使結局唔完美 我從來都無後悔同你一齊 】
「如果拍拖前就知呢個人充滿缺陷，你仲會唔會同佢一齊？」
「明知最後結局都會分開，你又會唔會想時光倒流，寧願當初無識過佢？」
.
《暖男爸爸》日前迎來大結局，記得當初並無特別關注viutv嘅劇集，對溫情片亦同樣不感興趣，一來最怕煽情故事，二來又怕編劇會夾硬加插啲老套「車禍」、「絕症」、「你原來係執返嚟」橋段，真係諗起都毛管戙，唔好啦... 所幸呢啲情節未有喺《暖男爸爸》出現，故事一開始已經交代咗阿榮喪妻，而每集劇情主要圍繞阿榮周遭發生嘅事展開。
.
喺便利店同客人傾計、接仔仔暴龍哥放學、一個人喺大排檔飲悶酒，唔會突然安排一啲高潮起伏。成日話劇集最忌平淡，偏偏觀眾從貼地的劇情中，搵到更多代入感。呢啲故事每日都發生喺我哋身邊，所以我哋更能明白點解阿榮會偷偷地一個人飲酒，點解芷明離婚後寧願自己生活，因為我哋都怕身邊人擔心，亦怕自己會再受傷害。《暖男爸爸》無曲折離奇嘅故事，但往往愈寫實嘅感情（再加埋《無賴》呢首外掛），愈能令你滿眶熱淚。彷彿透過劇中角色嘅互動，陪住佢哋又喊又笑，難過嗰陣一齊圍爐取暖。
.
一如劇情貼地走向，劇中人物嘅愛情同樣寫實，或多或少都有缺陷。阿榮痛失愛妻，每晚只能依賴食藥幻想同老婆「鯨魚」傾計；芷明因老公出軌離婚，最後發現原來前夫喺離婚後，保險受益人仍然落自己名；就連睇落玩世不恭的Lantau，都早已厭倦不斷講大話嘅生活，但又因為害怕受傷而不敢認真戀愛。你睇人好，人睇你好，但現實中嘅愛情並非童話故事，其實每個人都係跌跌撞撞、損手爛腳先學識去愛。
.
《暖男爸爸》大結局中，阿榮問芷明：「如果真係畀你嚟多次，你會唔會寧願無遇到你前夫？」芷明答佢：「其實人生點可以話剩係攞曬啲好嘢，就好似打機咁，到最後反而唔在乎輸贏，而係個過程到底開唔開心。」有啲人、有啲事、有啲關係，注定唔會完美，注定令你遍體鱗傷，最後仲連個happy ending都無。但終有一日你都會面對到過去嘅傷痛，然後繼續move on。就好似結局暴龍哥換走媽咪買畀佢張被、芷明整理前夫遺物咁，其實只要我哋用心愛過，就算結局會分開，回憶都會繼續。
.
「我要走喇，呢段日子，好多謝你一路陪住我。如果唔係你，我諗我放棄咗好多次。」雖然唔捨得你離開，但我從來無後悔過同你開始。因為愛一個人係，佢甩皮甩骨我都愛；現實嘅愛情係，明知結局唔完美我都唔後悔去愛。
.
P.S. 最後其實有少少慶幸結局無夾硬安排一條明確感情線畀阿榮，如果換轉係友台，阿榮應該一早周旋喺唔同女人之間，然後熱戀再分手再結婚....... 但其實現實中，更多人受傷後都需要一段時間走出嚟，再慢慢喺個心騰出另一個空間畀另一個人。結局阿榮同暴龍哥兩個人生活，再有幾份珍貴嘅友情，反而有種淡淡嘅幸福～
.
#基基weloveyou #暖男爸爸 #導演成日下下播無賴真係好茅 #無賴外掛 #睇完又重新loop返呢隻歌 #多謝你愛過我 #呢個咁唔完美嘅我 #情侶 #愛 #愛情 #語錄 #拍拖 #香港 #viutv #煲劇
.
即like 港式情侶 HKstyleCouple 緊貼更多港式愛情生活資訊❤️！
IG : https://instagram.com/hkstylecouple
歡迎Dm投稿戀愛趣事，我哋等緊你㗎😙！
