【#狂迷投稿】 文：謝信
The Way We Keep Dancing《狂舞派3》
『願赤裸相對時，能夠不傷你』
2017年有套電影《歡迎光臨奇幻樂園》(The Florida Project)，係講一個座落喺樂園對面嘅貧民區酒店嘅故事，我仲好記得，導演分享時提到，美國有好多呢啲酒店，好多人住喺裡面但佢地嘅生活無人關注，佢就想借鏡頭講出佢地內裡嘅一面
.
《#狂舞派3》開宗明義就講工廈，第一幕就係走鬼。工廈呢個文化或者呢個問題久遠，最遠又出名嘅可以由「H.A.」(HiddenAgenda)講起，呢批人點樣生存點樣喺
縫隙掙扎，電影黎講好似都無咩類似有心嘅作品探討，由工廈為綱入手去帶出街頭文化喺香港嘅狀況首先係出色嘅一手。
.
同奇幻樂園唔同，開展左場景之後狂3捨棄左傳統嘅故事模式用偽紀錄片推進，當中有好幾個令人欣賞嘅地方，其一係講番幾個狂1嘅主角分別嘅「現實」，其二係搵試當真拍番佢地幾個嘅訪問，呢兩個位我都好樂在其中。
.
與此同時電影就不斷咁縮減緊同現實嘅距離，呢個現實係真實嘅我地果個現實，官商勾結搵地產霸權黎搞活化工廈一面請埋人唱好洗白一面笑住咁趕絕租客呢部分嘅描寫，我係幾身同感受，自己都曾經係當中一員，睇住似曾相識嘅畫面感覺到嘅唔係果種悲慘，反而係有啲安慰，原來我地嘅處境唔係咁鮮為人知。
.
但行近現實就代表同戲入面嘅角色愈來愈無左隔住鏡頭應有嘅距離，呢個位產生左一種令好多人都頂唔順嘅不平衡感，有得必有失，相信導演同成個班底係計過嘅，問題係有咩令到佢地明知會有呢個損失仲選擇要咁拍呢？
.
有人用過句話咁形容：如果第一集係講為左夢想可以去到幾盡，今集就係講為左夢想可以妥協到幾盡。而我就會話不如直接啲講係為左生存可以有幾仆街。
.
唔只係柒良，呢部戲入面嘅主角個個都好仆街，喺佢地嘅現實面前活得好仆街，但就連戲外嘅導演都拍得好仆街。戲入面講柒良二度出賣自己同身邊人嘅故仔累人累物，黃修平用喺拍部偽紀錄片時插入呢段係咪對自己嘅一個嘲諷呢？當聽到佢喺訪問提到自己拍狂3係唔想複製第一集嘅成功果時，我會諗係咪呢個原因迫到導演最後用左咁仆街嘅手法去突圍而出？
.
如果唔係嘅話就當個仆街係我啦，但如果係嘅話大家又睇唔睇到喺咁仆街都要咁拍嘅鏡頭下果種電影人嘅吶喊？
.
呢種吶喊，係未經歷2019嘅吶喊
呢種吶喊本來，就係對2019乃至將來嘅香港嘅吶喊
而且呢種吶喊唔單單存在喺導演身上
睇番戲入面嘅主要演員，試下喺腦海重溫一次
唔通你完全睇唔到佢地嘅吶喊咩
.
唔少人話呢一集HeyYo最好睇
緊係啦，佢咩都rap晒出黎梗係最好睇架
唔啱咁我都黎rap段啦
.
Hey Ho 俾個beat俾個beat俾個beat 黎
我 地 都 係 香港人
我地喺呢度大 就梗係喺呢度嗌
周圍都可以舞擺使乜整狂舞街
邊個話想改變 最好係加入政權
想個生態改善 老虎最好入動物園
好聽咪叫收編根本就係統戰
呢排最鍾意嘅係叫做和平解決
條路要咁行呀邊個話實啱
話就話叫活化其實嫌污糟邋遢
記得跟紅頂白 唔係就係垃圾
專恰啲呀婆同細路就係咁賤格
勾結都唔犯法果班叫官商黑
大人仲繼續要求信法律有辦法
佢地話
守住香港要講和平與愛
有時粉飾太平又真係易過食菜
今時今日有乜嘢自由
想出黎表達都當係分裂陰謀
走上街頭 社會會暴走
乜乜柒柒 共創穩定繁榮
叫我去信宿命
不過就係要話你聽
就算得番一條罅 我地都會掙扎
呼吸都有害 不過咁係唔會怕
出生於亂世 揀中就要識盡責
城市仲有無機係睇我地嘅造化
.
多謝
.
多謝黃修平，多謝狂3一眾台前幕後
願香港人當初的衝天志永遠無法被生活消磨
.
×☝🏽☝️☝🏼多謝投稿！有嘢想講，都歡迎各位投稿分享你嘅睇法～×
.
加入狂友fb群組【 #狂氏電影綜合症候群 】
*// http://bit.ly/32xJWLp //
直接交流 × 傾講電影有你起頭！
.
*追蹤 instagram【 madman.movie 】有你著數！
*// https://www.instagram.com/madman.movie/ //
*
*緊貼【 電影狂人-影評情報交流平台 】獲得最新電影資訊！***
－－－－－－－－－－－－－－－－－－
░電影資訊 ░獨家影評 ░幕後製作 ░戲院優惠
Fb專頁【 電影狂人-影評情報交流平台 】
.
Golden Scene Co. Ltd. - Film Golden Scene Cinema 高先電影院 Adam Wong Sau Ping 黃修平 Cherry Ngan 顏卓靈 BabyJohn蔡瀚億
