恭喜你，HK$500稿費已準備好，希望唔好嫌少，其他投咗稿嘅朋友，我有開嚟睇㗎，揀緊揀緊，希望有機會登你哋嘅稿❤️
投稿讀者：史迪佬
==========
呢份工已經係一年半之前，當時我經獵頭公司搵到份Merchandising Manager，老闆係英國人，公司賣Outdoor Furniture，即係好似香港有啲室外露天酒吧嘅枱同梳化、燒烤爐、可以整串燒嘅機、太陽傘……不過重點都唔係呢啲，而係英國老闆本人唔喺香港，公司基地喺倫敦，佢喺香港開一間office負責做串連角色，因為需要有人同大陸廠方面接洽。
呢個office喺觀塘碼頭附近，一個大單位拆開佢分租嗰隻，見工嗰陣係skype，其實做咗一年半都係見過英國老闆真人兩次咁大把，佢好少飛嚟香港。鬼佬最初話會請多三至四個staff，全部under我，話之你請幾多個啦，最緊要有糧出啫，當時agent幫我叫到30,000一個月。
我都唔肯定呢份工有冇其他求職者同我爭，總之最後就請咗啦，頭一個月做嘅嘢非常濕碎，就好似Admin一樣，公司乜都未有，我負責訂紙訂水訂文具，讓佢單手都好快做完，因為啲嘢得我一個用，唔會好似其他公司消耗得咁快。
第二個月，老細仲未正式畀啲實際同Merchandising Manager有關嘅工作我做，所以嗰陣超得閒，幾乎煲晒啲美劇，然後悶悶地就開始download AV，最頂癮係雖然得我一個，但都有打卡機，係鬼佬叫我買嘅，基本上我好準時，最多打完卡之後瞓一陣先煲劇囉！
蜜月期過後，工作開始殺到埋身喇，有咁耐風流就有咁耐折墜，應該嘅，否則佢完全冇嘢畀我做，轉頭執笠咪仲大鑊。只係啲工作一係唔嚟，一嚟就痴晒線，人哋正常公司分晒merchandiser、product development、cs、shipping、account、sales、admin，仲有清潔嬸嬸嘅工作，因為係one man band office，所以就得我一個人做晒，當時已經冇時間睇AV喇，亦好驚再download落去會中毒，我唔想做埋IT整機呀！
工作變化咁大，我開始提英國老闆要請人，但係個鬼佬完全ignore我，好似認為既然一個人搞得掂，就唔好再嘥錢請人。
我都好唔爭氣嘅，因為份糧而繼續留低，香港做merchandiser已經好黃昏，而家嘅工作量係多，後期係日日做到朝九晚十，不過我唔肯定可唔可以搵得返30,000人工，所以就一直做落去。
只係咁嘅工作量如果唔請人，我總有一日會跪低，one man band office好難請假，而且開始覺得自己性格怪怪哋，我平時喺office冇同事，習慣自言自語，發覺自己同自己講嘢嘅情況多咗，有時仲會無聊到大叫（唔係悶嗰種無聊，係忙得嚟又冇人同你講嘢，好似去咗黑洞咁），仲會自己喺office跳舞，再係咁真係唔掂，終於我決定辭職，想做一間正常啲嘅公司，減薪轉工都冇問題。
不過我辭職單嘢拖拖拉拉咗好耐，主要係英國老闆唔批，軟硬兼施叫我留低，最後我有少少躁底，鬼佬亦唔再堅持，但係就有個條件－－－要幫佢請到人先走得，我答應咗，所以……
我又做埋HR🤦🏻♂️
當時請人都請咗一段時間，唯一慶幸係英國老闆冇set特定框架，男女都得，只係上嚟見工嘅人望完公司環境都唔肯返工，加上嗰度係工廈拆出嚟嘅分租office，我隔離個單位同埋前幾個都租咗畀人做band房，雖然唔會office hour jam歌，不過第二日返嚟就會發現成條走廊都係煙頭，煙味亦好濃，都幾惡劣㗎。
後來有個50歲嘅阿叔嚟interview，正式傾完之後，我就loop HR嘅經典對白：「你有冇咩想了解或者問返我？」
阿叔：「我想問下，係咪可以喺office食煙？」
真係突破盲腸，聶瞳你成日教啲求職者點見工，不如你試下叫人咁樣問吖，我好想知其他HR會點答。
我：「唔得呀，有煙霧感應器㗎！你出走廊食啦！冇人理你，不過記得出去之前要鎖門，因為得你一個。」
阿叔：「要行出行入咁麻煩呀？」
屌你咩阿叔，你以前公司可以坐喺位食煙㗎？Merchandiser喎！不過聽到佢猶豫，我個心仲怯過佢，唔好呀，你唔好唔做呀！
我：「嗱，不過講真，呢度就好自由嘅，英國老闆又好好人，佢遲啲會請幾個人幫你㗎喇，冇嘢做咪煲下劇囉，唔知你啱唔啱，部腦有好多AV，記得戴耳機睇就得，唔鍾意就delete啦，其他嘢自己執生，好易做㗎啫。」
阿叔：「咁過癮？啱喎！但係點解咁free你又唔做嘅？」
我：「哦，因為……我屋企有間茶餐廳，阿爸想我打理，咁冇理由唔幫自己人嘛！」（我屋企有撚茶餐廳咩）
如是者，阿叔就replace咗我，我用咗一個星期教佢嘢，呢個星期盡量粉飾太平，對唔住呀！我真係冇辦法先出呢招，原諒我，臨走我再請阿叔食個lunch，大家冇拖冇欠，唔知佢而家仲有冇做呢？
觀塘打卡餐廳 在 【飲食Vlog】觀塘．室外有後花園視感的宮廷式打卡Cafe｜INN 的八卦
觀塘 分店有室內和室外位置，最多人 打卡 便是室外有後花園視感的梳化位。整間 餐廳 均以白色為主，還添加不少華麗的燈飾、雕塑、植物等。 ... <看更多>