《結界》第一回
傳說當一個人見到另一個自己時侯，就代表佢離死亡不遠了。
我叫阿浩，二十六歲。今日係我結婚一週年紀念日，所以一早訂咗位同老婆食飯慶祝，過去一直都過住一個平淡而穩定嘅生活，但估唔到今日一個電話，將我命運開始改寫。
放工後，我見仲有時間，就諗住去戲院買定飛食完飯就一齊睇場戲。正當我喺戲院門口揀緊睇咩戲時侯，電話響起了。
一望之下，原來係阿康打嚟。
「喂講嘢。」我問。
電話裡頭傳來一把顫抖嘅聲音：「阿浩，我就快死！我就快死喇！你一定要救我，你一定要救我呀！」
我都係第一次聽到阿康把聲咁驚仲要講埋啲咁嘅說話。
「發生咩事呀？你呢家喺邊？」
「我……我匿埋緊，我……喺尖沙咀海旁等你！」
「喂喂……咪住先，呢家？我一陣約咗我老婆食飯喎！」
「我真係要死喇！你地食少餐飯洗唔洗死呀！」阿康情緒十分激動，我都開始擔心佢係咪真係出咗事，於是我望一望隻錶，呢家五點半，我訂咗八點，我估應該都有時間出去見一見佢。
「好喇好喇，你等我一陣，我飛的過嚟搵你喇。」收線後，我仍然喺到諗咩事令到阿康咁緊張？
落車後，我急步走到海旁，然後不斷周圍望下阿康喺邊。
突然有人失驚無神咁從後拍一拍我膊頭，嚇得我轉身一望，只見阿康戴住口罩，著住一件黑色大褸連帽笠住自己，喺呢家氣溫大約32度底下，佢咁樣著真係熱都熱死喇。
「你攪咩呀？你唔熱呀？你睇下你……出哂汗喇！」
阿康將我拉到一角，然後周圍望一望有冇人，之後先除低口罩捉住我講：「我就快死！我一定就快死！」
「你冷靜啲先喇，成日話自己死，你有病咩？」
「我無病！但係……我見到自己分身，你知唔知呀！如果一個人見到自己分身，就代表佢好快就會死！」
「分身？咩呀……」
阿康吞一吞口水，然後續解釋說：「兩個禮拜前，我有晚放工準備搭巴士返屋企，我離遠見到有個同我一模一樣樣嘅人好兇咁望住我，𠴱陣我以為自己眼花睇錯又或者……或者人有相似！但我睇真啲，真係我自己嚟！」
「唔係嘛……咁邪？」
「𠴱次之後，我都見過佢幾次，我覺得佢一直跟住我，我去到邊佢都搵到我！我點避都避唔到佢呀！」
「屌！咪撚疑神疑鬼喇，下次見到佢，大膽啲捉住佢問佢想點喇！我就唔信佢會……」我話未說完，我已經見到阿康雙眼視線一直望住我身後，然後慢慢露出非常恐懼嘅表情。
我順勢轉身一望，果然，遠處有個人一直望住佢，而對方個樣正正就係阿康嚟。
我驚訝得呆呆望住佢，遠處呢個阿康眼神充分殺氣同怨恨，雙眼一直瞪大，彷彿眼珠瞪到好似就快跌出嚟咁，然後慢慢露出詭異笑容，一直對住我地笑，笑到個口好似就快裂開咁，非常恐怖。
「係佢……係佢……佢搵到我！」說罷，阿康嚇得戴返口罩，將頂衣帽笠住自己，然後向住大馬路方向跑走。我見到佢跑，我即時叫停佢：「喂！康！」
我望住阿康個身影慢慢消失我視線之中，我再轉身望返遠處嘅分身阿康，已經唔見咗。
究竟發生咩事？原來真係有分身呢樣嘢，佢唔係眼花或者思覺失調，佢所講嘅分身正正出現喺我地面前。
電話再次響起，原來呢個時侯老婆打嚟問我去到邊，我先收恰一下心情，再飛的去同老婆會合慶祝。
喺的士入面，我忍唔住Google一下有關「分身」嘅說法，有唔少說法都表示當一個人見到同自己一模一樣嘅分身時侯，代表自己將會不久於人世，雖然說法好似有啲荒謬，但過去的確有唔少例子說明有人死前表示見到自己分身……最後好快就死去。
我相信阿康都睇到呢啲例子，難怪佢自己咁驚會死，同埋個分身真係好令人心寒。我愈諗愈不安，於是whatsapp阿康問佢呢家點？
但阿康一直無睇到個訊息。
同老婆食飯時侯，我將岩岩個經歷講比佢聽，佢聽完後皺一皺眉頭，然後說：「嘩咁恐怖，你都唔好理人咁多，一陣唔知咩事惹到啲咩返嚟就大件事。」
我聽完後有啲唔係咁舒服，然後說：「咁阿康係我朋友，你知佢無咩朋友架喇，由細到大得我先同佢最Friend，雖然近排唔係成日聯絡，但話哂以前都一齊玩過，無理由睇住佢死架！」
「總之我唔想你惹到啲衰嘢返屋企。唔講，我唔想結婚一週年都講呢啲話題。」老婆開始有啲不滿了。我見到亦識趣無再提了，但成個腦海都諗緊阿康同埋……佢個分身。
食完飯返屋企，阿康仍然無讀我whatsapp，我匿喺廁所打電話比佢，可惜一直都係電話未能接通，攪到我成晚都瞓唔著。
直到第二日，阿康終於覆我whatsapp，佢只係講咗一句：「我無事了。」
見到呢句我都放心啲，可能呢排大家都神經緊張有幻覺吧？於是我正想追問有關分身事情，但諗諗下，既然阿康話無事，我都無謂再提起呢啲事，廢事恐懼一直存在。
過咗一星期，奇怪嘅事情發生了。
我同班兄弟一齊飲酒聚會時，我當然唔會放過呢個咁有趣嘅話題，於是我對住佢地講返阿康嘅經歷，因為大家中學時侯都一齊玩過，所以佢地都識得阿康呢個人。
「之後我見到阿康……佢話佢個分身……」我講講下，望住佢地眼神充滿問號，覺得有啲唔對路，於是忍唔住問：「你地一個二個咩樣呀？」
佢地互望一下，然後黑人問號咁問：「阿康係邊個嚟？」
我呆呆望住佢地，佢地又呆呆望住我。
「阿康呀，李永康呀！屌你地唔記得呀？」
各人聽到後，臉上嘅問號更加顯得巨大，佢地紛紛說：「嘜水呀？你識架？」
「咩嘢呀屌你！阿康呀！以前讀書成日同我地玩𠴱個呀！屌！阿星你以前咪好鐘意同佢一齊打波嘅！」我矛頭直指阿星。
阿星一臉無奈說：「完全無印象有呢個人……」
我見到佢地反應又唔似係玩嘢，似係真心唔知阿康呢個人。
「你班友仔，我拎佢張相比你地睇！」於是我係咁喺手機睇下有冇阿康嘅相，同時去阿康個Facebook 睇下，但當我去到阿康個Facebook 時，我發現共同朋友竟然係0？
我再抬頭望一望佢地，心諗佢地做咩集體unfriend咗阿康？
「點呀，搵到未呀？」各人紛紛催促我。
我將部手機比佢地睇，佢地各人伸個頭埋嚟睇，然後唔洗兩秒，各人異口同聲咁講：「都唔知邊個嚟。」
「仲扮咩呀，你地同阿康嘈交嚟呀？做咩成班unfriend咗佢？」
「我話你都神神地，屌！講女好過喇！」然後佢地就展開另一個話題無再理我。
見到佢地咁，我就知道唔對路了。
𠴱次聚會我完全無心機，我仲提早返屋企急急腳咁睇下以前嘅校刊，發現同班嘅名單無咗阿康個名，班相更加無咗阿康嘅樣，連我上年結婚擺酒一班朋友合照時都無咗阿康個樣。
我衝出書房，捉住正喺到睇緊電視嘅老婆問：「上星期我咪同你講過阿康比自己分身追嘅……」
「邊個阿康？」老婆一臉疑惑咁問。
我即刻拎起手機正想去阿康facebook介面比老婆睇時，先發覺阿康個帳戶已經無咗。
我整個身體都發軟了，阿康就好似突然消失咗咁，所有有關同阿康嘅嘢都無咗，連我地同阿康由細玩到大嘅記憶都無咗……但點解唯獨我對阿康係有印象，點解咁？
後來，我打比阿康，但電話由未能接通，轉變成無呢個號碼……
雖然我同阿康以前都幾老友，但我一直以嚟我只係知佢住沙田，但唔知道佢實際地址係住沙田邊度，所以我更加無從入手，亦唔知點樣可以搵到佢，即使我報警都好，佢地都唔會搵到我口中所講阿康個身份，阿康就好似突然失咗蹤咁……唔係，佢唔係失蹤，佢直頭好似消失咗又或者……從來都無存在過。
呢件事一直令我耿耿於懷，如果全世界都無人識得阿康，咁問題就喺我身上，係我自己一直以嚟幻想咗阿康出嚟？唉……可能呢排我生活壓力大所以亂諗嘢吧？
我帶住身心疲倦嘅身體返到公司門口，迎來嘅係我老細。
老細見到我一臉疑惑咁問我：「頭先先叫完你準備開會文件，你咁快就比到我？」
「開會文件？」我唔係好明，我心諗我都係岩岩到公司姐。
「點呀，無呀？仲唔拿拿淋返入去做，趕住開會要呀！」老細講完就燥燥地走咗。
我呆呆望住公司門口，腦海喺到諗老細頭先個句說話。
「頭先先叫完你準備開會文件」
頭先？我岩岩先返到公司……
我一步一步咁走入公司，然後慢慢行去我個座位，當我見到眼前景像，我冷汗滲出，心跳加速。
因為我見到我個座位有人坐咗，一個背影同我一模一樣嘅人坐咗喺到。
我呆呆企咗喺到，雙腳完全發唔到力去行過去……定係我本身唔敢行埋去見自己分身？
當我喺到諗緊時侯，同事kelly見到我咁，於是問：「做咩企喺到？」佢一問，我視線中嘅「我」似乎意識到我嚟咗，然後停低手上工作，慢慢將個頭180度轉向我到。
我驚訝得雙眼瞪大，因為我見到佢個樣，正正就係我嚟。
我指住我個座位然後大叫一聲：「你地睇下！」
各人紛紛先將視線望住我，然後再經我所指嘅方向望去，但各人望向我時侯，對方已經突然唔見咗，只剩下一張無人坐嘅座位。
各人見無料到，紛紛竊竊私語咁講：「都痴線。」、「屌佢係咪有病？」。
我吞一吞口水，可能真係我諗多咗有幻覺吧？ 我慢慢行返去自己座位，我見到座位上電腦開咗，文件亦被郁動過，連個座位都有餘溫，證明頭先真係有人坐過，但最令我心寒嘅係，枱面上有張A4白紙，上面寫住 「死」。
我即刻將張紙撕埋一舊然後掉落垃圾桶。我坐低盡量冷靜自己，但完全冷靜唔到，我內心嘅恐懼一直充斥全身，究竟邊個喺到玩我，係咪惡作劇？
呢個時侯，我諗起阿康，阿康都係比自己分身攪到消失，同時我又諗起老婆講過，佢叫我唔好理，唔好惹事上身……原來係真……我真係惹到自己分身……
最重要嘅係，我係咪好快會死？
第一回完
〈待續〉︳
＊＊＊＊＊＊＊＊＊＊＊＊＊＊＊＊＊＊＊＊＊
隔咗咁多年，終於的起心肝開始寫長篇故事
大家疫情期間可以慢慢追故了
我花唔少心機設計個故事 ＝）
希望大家比like或share或多多留言給予支持
你地既like 就係我寫作動力
記得follow ig：https://www.instagram.com/homing0624/
我嘅網店：https://homingming.boutir.com/
買書多多支持我 ／。＼
見到自己分身 在 人在現實中看到「另一個自己」？此現象被稱為 ... - YouTube 的八卦
人在現實中看到「另一個 自己 」？此現象被稱為「Doppelganger」。後來被引用到玄學中，象徵「不幸的預兆」。而民間傳說當 見到自己 的 分身 時，代表「其人 ... ... <看更多>