這個圈叫黃色經濟圈，不是黃色捐獻圈。
一家食店只有精神而沒有實力，再黃的朋友也愛莫能助。
精神上的浪漫可以無際無邊，但味蕾是很現實的，好吃就是好吃，放不進口就是放不進口，一點都不會跟你浪漫。
顏色是精神，但純粹的精神永遠不會轉化成供求關係，所以就算是躋身黃色經濟圈之列，也得有本身的實力，才站得住腳。
食過翻尋味的這家金撈老鴨，是黃色經濟圈的典範。等位是閒事，仲要唔係等一個鐘嗰啲等，係等一個月。
預早訂位是基本，而訂位也有注意事項；一不留神，就會好似我咁瀨晒嘢。
「金撈老鴨，」靚姐在電話裏的聲線頗溫柔的。
「唔該，十二月二十七號，八點，六位。」
「貴姓呀？」
「姓葉，」我說，然後靚姐聽到我後面響起了一連五下「嘟嘟嘟嘟嘟」。
靚姐靜咗，以為只是信號微弱，於是我「喂」了一聲。
「你搭黨鐵吖？」靚姐收起溫柔，語氣似在盤問。
我腳軟，跟著沒有邏輯地回了一句：「唔係，我玩緊歡樂天地。」
紙包唔住火，致命點是之後的「下一站灣仔」。
拿著電話，彼此無言。
內疚感讓我口吃：「可...... 可唔可...... 可唔可以畀次機會？」
「係咁啦！」掛線了。
朋友問我訂唔訂到位，我唔敢話訂到，又唔敢話訂唔到。結果，靚姐還是對我網開一面。
「姓葉，」我細細聲，「訂咗六位。」
「哦，」光是一個「哦」字，已經認得出是當日的靚姐，「搭黨鐵嗰個吖。」以為在客人名字旁邊寫下備註，是六星級酒店的訓練，想不到渡船街一家小店，也有如此習慣。
用得個「鴨」字做招牌的火鍋店，必點的當然是鴨鍋。這家金撈也有雞鍋，一樣鮮甜可口，但冬天吃火鍋，似乎鴨鍋更加合時，因為鴨味總是比雞味多一點冶艷，即是那點濃郁得來不是人人都會欣賞的香味，卻偏偏就是這種由脂肪散發出來的醇厚芳香讓你渾身暖透，每喝下一口都是窩心。
說到最窩心，還是這裏的環境。
去過這家「金撈」的都會同意，唔知點解，男女比例是失控的傾斜，而且質素都很好－中旅社有中旅社的韻味，少女組有少女組的甜美。氣氛需要刻意製造，情調卻是自然而然；彼此素未謀面，然而在「願榮光歸香港」每半小時播一次的氛圍下，大家都找到一個互相送上微笑的理由。冇錯，處身這個經濟圈，𥄫女和發姣都是一件高檔的事。
衛生質素又怎樣？當然好，全部都是人，沒有曱甴。
價錢呢？借這個機會為黃店澄清，沒有人說過「黃」就等於「平」，為何小店就不可以收得貴呢？六個人埋單，四千蚊左右，不過我哋有叫魚生同清酒。
金撈那種高尚，不是一個「貴」字足以形容，海底撈的常客是不會懂的。
