我的電影人生
More Than Movies
自少鍾意睇書，無錢買，就去小童群益會掛單，神遊緊張刺激賺人熱淚嘅字海之內，留連忘返，經常唔記得返屋企食飯。
中一留班，人生第一次入戲院睇公餘場，百萬大導張徹拍攝，王羽主演嘅《獨臂刀》，血肉橫飛，睇到出咗一身冷汗，親身經歴咗立體文字嘅魔力，從此不能自拔，一儲夠零用錢，就靜雞雞走去睇早場。
入到大學，唔使多想，飛撲加入電影會，睇大師經典，聽專家講座，分析蒙太奇，扮嘢講遠景定鏡拍攝手法，幾型呀。試過撞正失戀，一日內，穿梭油尖旺，由朝到黒連睇七場，暫避塵世，幾低落呀。《四百擊》導演杜魯福曾經講過：「戲院要絕對漆黑，無噪音，同外邊世界完全隔絕。」好有同感，戲院真係我嘅避風港。
拍拖成家，睇戲又係主要娛樂，追女親子家庭樂，電影以外，more than movies。永永遠遠記得呢一幕，UA時代廣場，四歳細仔掹住哥哥衫腳，攞住張一百蚊，買完汽水爆谷，回頭望一望，勇敢行入場，兩公婆喺場外心如鹿撞，等足粒半鐘，接番兩個塞豆窿，大喜過望，唔記得啱啱緊張到傻。
幾十年眨眼就過，睇戲興趣無少過，始終認為，電影一流娛樂，除咗拍案驚奇劇作，特技攝影音響道具服裝，製作億億聲上落，相比之下，入場戲飛算什麼。只係同以前唔同咗，無腳雀仔識飛囉，一家四口入場少咗，淨番我同老婆，睇戲自由咗，但歡樂都少咗。
夜闌人靜，緬懷過去，望住老婆大人儲咗十幾年嘅戲飛，諗番起睇「奪寶奇兵」嘅情境，有啲感慨，唔知幾時可以去UA戲院行一趟，睇乜戲無相干，大人拖一個，我又拖一個，大杯可樂，大桶popcorn，咁就正囉。人生若此，實在太快樂，夫復何求。
從來相信，電影以外，還有更多。
