在香港時嘅偽中產日子與在英國的真生活 (6)
香港其實係一個地方細，交通方便而同時高度集中嘅城市。揸車對好多香港人黎講，真係無乜需要。地鐵，巴士，小巴其本上經已可以去到大部份嘅地方。不過，作為一個中產，如果有小朋友的話，而又要顯示自己嘅成就，又點可以無一架車呢？
老實講，我自己响香港都有車，而的確有車嘅話同小朋友出街去遠啲嘅地方係比較方便嘅。而同時，因為我屋企係有行動唔方便嘅老人家，所以對我黎講响香港揸車就變成必須品。
我唔係想講香港養車有幾貴（係香港人都會知），而厘個的確係個人嘅需要同選擇嘅問題。响香港揸唔揸車根本上就係一個拗唔完嘅嘢。我係想講嘅係响香港，其本上九成嘅中產（包括我自己），要養車，無論要幾實際或者幾show off，都係好無性格嘅，原因都係無得揀。响香港做中產，其實有乜嘢係有得揀嘅呢？
一家幾口，加個工人姐姐，重要做「車埋你」厘個好有形嘅動作，其本上除咗七人車就係無選擇。個個都係嗰三兩個牌子，嗰幾個款，咁點去凸顯自己有車厘個「成就」呢？來來去去都係嗰兩個方法，第一，搞到自己嘅車鬼五馬六或者肉肉麻麻咁，再唔係，買架貴好多嘅七人車囉。
對於我個人黎講，大家可以話我老土，我其實真係接受唔到七人車個樣。無奈地，我當年响香港都係要揸，我嘅感覺由頭到尾都覺得自己成個司機咁，一啲駕駛樂趣都無。所以，我好堅持只係會買最實惠，最普通嘅七人車，乜都唔搞，識行識走就算。因為無論點貴，點豪華佢都係一架裝到七個人嘅貨Van。就算係七、八十萬，Full Option，帶晒黑超，個鼻向晒天都好，都唔改變到架車係一架van by nature厘個事實！
去到英國，因為我唔係住London而且郊區，兩公婆一人一架車就變成必須品。英國人甚至歐洲人嘅中產買車係可以好實際嘅，大部份日常嘅車都係細車。原因不外乎係啲車位細，小路多，而有啲屋企係street parking。七人車都有嘅，不過香港日日見到嗰啲日本七人車就完全無。因為，當個個都有車嘅時候（而London好多時個個都搭車），小咗「車埋你」厘樣嘢，七人車就變咗幾多餘，要真係一家好多口先有需要。
但係我本人，唔計親戚朋友，就係外父、外母、阿媽、一年都會過黎幾次，而每次至少兩三個禮拜。一到步，我又要被要求去揀七人車。不過就係因為响英國有得揀，而我本人又係愛國用國貨嘅人，咁我就好任性咁用幾千鎊，買咗一架十幾廿歲由細到大最鐘意又唔敢買嘅車：Defender。當然，用國貨同任性係要付出代價嘅，我老婆最初都唔知幾憎厘架車。因為初初佢未諗掂買乜車嘅關系，又棍波，又慢，又大架，玩死佢😜
但係，當落雨或者行山路，去同個女去真‧郊游嘅時候，佢就開始明白我嘅選擇。而當我屋企嘅老人家一次過黎嘅時候，就直話好啦，因為根本上我係買咗一隻又穩定又大力嘅牛。
而當我者婆買咗架細車之後，我個女就經常投訴：「坐媽媽架車，我睇唔到嘢呀！」，因為坐响baby seat，媽咪架車矮好多，佢睇小咗好多嘢。
#香港中產 #連養車都無得揀 #英國生活 #英國揸車 #有得揀係好重要 #愛國就用國貨 #英國國民之車 #LandRover
