[1230隔夜超短劇評]
**歡迎留言討論但唔好劇透**
**留言請明示你係講緊邊套劇**
--------------------------------------------------
[ViuTV][瑪嘉烈與大衛系列 前度 第10集]
[讚] 賤人﹗賤人﹗瑪嘉烈同大衛兩個都係賤人。洛奇原來係知道瑪嘉烈有第二個，我估美玉其實都知。妖，總之鍾意咗個有「感情渴求不擇症」嘅人一定好痛苦（我冇事，係激動咗少少）。但我諗返，呢個先係《瑪嘉烈與大衛》呢套劇嘅特色，又愛又恨呀。
[彈] 用《花樣年華》去托住出軌嘅故事係好嘅，但真係托一托，無論喺情節同埋鏡頭都冇扣連，得幾句對白，捉到鹿唔脫角。另，維珍開電單車嗰吓太假，立即抽離咗。
有個鏡頭係好奇怪嘅，就係去到漢堡包店，大衛坐低之後，有個由上望落去嘅鏡頭，張枱分咗個畫面，大衛左邊，維珍右邊，維珍買完嘢坐低咗就完咗呢個鏡頭。呢個鏡頭咁刻意，我就會諗吓佢有乜意義？會唔會係將大衛維珍繼續分開？如果係嘅話同今集唔同程度嘅偷食唔係好夾喎。如果係用呢個鏡頭表達嘅話，應該張枱要冇咁闊。或者再玩盡啲，用耐啲呢個鏡頭，等佢哋兩個人食嘢時越界，咁就過癮。如果佢乜都冇表達嘅話，呢個鏡頭肉酸之餘又多餘。
[演員表]
劉俊謙 飾 大衛 / 袁澧林 飾 瑪嘉烈 / 杜小喬 飾 美玉 / 馬志威 飾 大輝 / 廖碧兒 飾 維珍
--------------------------------------------------
[無綫][超時空男臣 第10集]
[讚] 今集唔係好精彩，但唔hea，有劇情推動。嬌姨做乜死都要收購鳳鳴居？我估Sandy一定係太子妃啦，但又點解一直唔認返佢哋三個？但係又嚟星期五先推一推，吸你睇下星期，以後係咪一個禮拜五集，淨係睇星期一同星期五兩集就okay。
[彈] 啲笑料繼續係古代人畀現代女人調戲，點呀？用咗10集喇，有冇其他笑料呀？
[演員表]
蕭正楠 飾 袁崇煥、大軍 / 曹永廉 飾 左光斗、一波 / 何廣沛 飾 李進忠、小冬 / 王君馨 飾 太子妃、San1dy/ 田蕊妮 飾 方惠芝 / 朱晨麗 飾 方惠玲 / 韋家雄 飾 溫偉泰 / 姜大偉 飾 方天 / 簡慕華 飾 余綺虹 / 蓋世寶 飾 方玉芬 / 姚嘉莉 飾 嬌姨 / 吳業坤 飾 Ivan
--------------------------------------------------
#1230隔夜超短劇評 #無綫 #TVB #超時空男臣 #蕭正楠 #曹永廉 #何廣沛 #王君馨 #蝦頭 #楊詩敏 #田蕊妮 #韋家雄 #簡慕華 #蓋世寶 #姜大偉 #朱晨麗 #吳業坤 #冼灝英 #ViuTV #瑪嘉烈與大衛系列前度 #劉俊謙 #袁澧林 #馬志威 #杜小喬 #廖碧兒 #趙學而 #黃秋生 #夏文汐 #許志安 #姚嘉莉
