《就咁》
我諗咗一晚可以點樣同大家交代，因為我想盡量寫得歡樂啲，等你地睇得開心啲啦，話晒我都係做偏向娛樂嘅節目。盡量喳，我都幾唔開心，不過都唔想pass俾大家，等我解釋下（oscar嗰part佢會自己講）。
簡單解釋一下電台請假規則，同節目主持們係唔可以一齊放假，即係你唔會見到艾粒一齊外遊咁啦，當然，我同Oscar亦都係冇得例外，唔可以一齊放假去婚禮啦。但由於我地同哩一對朋友，關係實在太親愛，佢地嘅婚禮，我地兩個都好想去祝福佢，所以我地想至少婚禮25號當日可以一齊出席，26號即時回港，於是魯莽地講咗呢個謊言。
9月26號哩日，我錄咗一集英國special嘅節目，講英國建築，當日我個人係喺天空，返緊嚟香港，所以26號我的確係冇請假，係曠工。公司要停職處分，我願意承擔。
903係養大我嘅地方，我絕對相信佢永遠都會企係香港人嗰邊，如果因為我呢一件事，令到大家對呢個地方有懷疑，非常抱歉。
事件發生之後，其中一條要反省嘅問題就係：「有冇後悔啦？」奇怪嘅係，最後悔就係結婚嗰兩位新郎、新娘，不停問有咩方法可以補救，基本上佢哋除咗唔好離婚，係冇嘢可以補救，所以我非常希望佢哋呢一生一世都幸福快樂，錯係我地錯啫，愛情始終係神聖嘅（有結果嗰啲），咁囉。
另外，當你一出咗事之後，自不然會有好多人走過來八卦啦、落井下石啦，當然最多係關心啦，都係只有喺呢啲情況底下，你先至會見到最真實嘅畫面，慶幸落井之後，都唔係話有好多舊石，唔算深井，仲探到個頭上水，俾前輩摸摸頭，都算係咁，好彩平日待人都唔係太差。
停職停到幾時？其實我都唔知道。2019年，大家都唔易過，都有好多嘢唔知道，呢啲情況下要大家擔心，其實衰仔，不過大家都邊行邊學嘅，我幼稚，你地唔係今日知，但一齊學啦，後會希望有期。
🍋
艾粒 在 艾粒- 維基百科，自由的百科全書 的相關結果
艾粒 ，又作ILUB，前名「I Love You Boyz」，是香港一隊二人男子組合，由香港商業電台兩位唱片騎師甄子康（少爺占）及唐劍康（當奴）組成。組合源自2002年二人創作的 ... ... <看更多>