《老死一席話，勝O成晚T》
噚晚秋風起，涼涼哋，撞正星期六，應該係同三五知己飲杯暢談心事嘅好時機。
但由於工作未完成，就唯有對住部電腦。
中間收到老死阿強嘅Wtsapp，問我「Do What」。
入咗大公司，真係對話都英文啲。
明明學生時代佢啲Msg都係純正廣東話，做咗嘢幾年忽然變西人～
不過冇所謂，因為我都成日扮西人~
咁我就話「忙緊工作上嘅煩惱」。
煩惱人人有，我有阿強都唔少。
於是Wtsapp就出現一段短小而精鋼嘅「工作呻呻呻」。
對話雖然短促，但通體舒暢。
我忽然覺得同呢種識咗十年嘅老死Wtsapp，層次係同一般人唔同。
所謂一般人，可能未夠熟，或者啱啱識。
而對佢哋，你好拘謹，成個人都唔夠放。
例如對方講一句：「好多人話今晚涼咗囉。」
你心就諗：「死啦，佢用『囉』，係咪根本唔覺得涼呢？」
但你又會質疑自己：「唔係喎，佢可能係指『點止係涼呀，簡直係凍啦』。」
喺呢種溝通上，你永遠諗「點迎合對方」或「避免壞印象」，自己心嗰句一直封印。
估唔到做咗廿幾年人，而家先知「有嗰句講嗰句」根本上就係「人生遊戲」嘅90Lv技能，個「使用條件」長到水蛇春咁。
好在我同阿強仲用到！
見住佢喺Wtsapp度大吐苦水，有時覺得佢喺度無病呻吟，自尋煩惱，
就會直接了當，大大聲小佢一鑊。
有樣嘢好得意，每次鬧完佢，自己都會有種反思。
似終大家年紀差唔多，諗嘢又相似，佢嘅呻吟我都吟過，自尋煩惱方面我更加係專家。
鬧佢好似鬧返醒自己咁。
記得中學時，有個同學話唔介意教我做功課，因為
「幫你解決問題，其實同時間令自己進一步學習。」
今時今日，終於明呢句點解。
你話佢硬膠，
或者根本最硬膠的就是自己。
好朋友有時就好似一道鏡，你總可以喺同佢哋吹水之間，自我舒解。
最後我同佢講咗句：「頂住，加油呀。男人最緊要係呢5、6年啦。」
之後佢回覆：「咁頂完呢5、6年之後，做咩好？」
我覆佢：「5、6年之後，我會再Wtsapp你一句：『頂住，加油呀。男人最緊要係呢5、6年啦。』」
IG: cheungson88
