笑死我！星期五唔好講offer，一齊笑下吧XD (Btw 素顏落銀行入錢俾fans認到，真係7到想搵窿捐 T^T
【女朋友為咗對廉航嘅堅持，同我鬧交】
我叫Alan，今年28歲，女朋友25歲，我同佢拍咗兩年幾拖，佢畢業後出黎做咗兩年嘢。
女朋友自從兩年前同幾個同學去完歐洲畢業旅行之後，就愛上咗去旅行。 但佢只鍾意窮遊，佢話去旅行一定要窮遊先可以體驗到當地嘅文化喎…
「拿，你跟團去旅行根本就只能夠走馬看花，一個景點接一個景點，影完相打完卡就走人，成個過程路又唔駛搵，又唔駛點去同當地人接觸，飯來張口，咁樣根本上就失咗去旅行嘅意義。 況且跟團好貴，又要被人規限住行程，呢餐食乜，果餐食物，咁樣同被人監管有咩分別？」
女朋友係咁樣睇跟團去旅行，所以我從來都無打算同佢跟團，但我發覺有陣時佢都比較過份。 例如上年佢同屋企人去台灣，當時佢個七十幾歲嘅阿爺都有去，佢阿爺最想去日月潭，需知道佢阿爺行動都唔算得上太方便嘅人，行一陣就會攰，但佢都要緊持成家人自遊行去，結果搞到佢阿爺去完返黎話去旅行好辛苦，日日行去趕車等車搞到隻腳晚晚都痛到訓唔到。 為咗趕車又搞到食飯唔準時而令到自己胃痛發作， 但女朋友就反駁話如果跟團嘅話，咪又係一個景點趕另一個景點，到時咪一樣攰一樣食飯唔準時……其實我覺得為老人家安排一個飯來張口嘅行程，又有何不妥呢？
記得第一次同佢去旅行，當時我話所有費用我俾晒，佢就話唔想我用太多錢，所以旅行嘅行程就由佢決定，我問佢即係點？佢話由佢去安排機票酒店，保證超值。搞掂機票酒店後先大家一齊研究行程。 聽到佢咁講，我心中暗地欣起自己可以搵到個知慳識儉嘅好女朋友。
話去旅行係兩年前嘅事，女朋友話等佢訂到機票酒店嘅時候就通知我請假，我問佢即係幾時，佢答我話未知，要等Airline做優惠先得，原來佢係想捕廉航嘅機票。 本身我哋想去台灣，當時如果買Package， 每人2500蚊已經包晒早去晚返嘅機票，再加上三晚四星級酒店連早餐。 但女朋友話如果坐廉航再加上住民宿就會平好多，所以我就聽佢意見，俾佢話事。
決定咗地點，女朋友就鎖定某啲廉航分司，每當知道會做優惠嘅時候，我哋就會準時夜晚12點去捕超值機票，但我發覺我地想去嘅台北，呢間廉航根本就無得飛。 女朋友話飛台北就算做優惠，連稅都要過千蚊一張機票，不如改吓去台中啦，果邊唔似得台北咁樣咁繁忙，我哋可以兩個人安安靜靜咁樣過二人世界嘛…
兩個人過安安靜靜咁樣過二人世界咁浪漫？ 女朋友呢個諗法真係Perfect池，所以呢個旅行，一切我都聽晒佢意見。 最後我哋好輕易地捕到去台中來回都係$88蚊嘅機票，加埋稅都唔駛$500蚊，真係超值！！！！
咦！！等等，原本機票係唔包行李費，我同女朋友又唔係住埋一齊，每人都要帶一個篋，所以焗住每人都要買行李費。 最後加埋行李費，每人張機票大約一千蚊港幣……
咁樣嘅價錢咪即係同其他傳統航空公司減價優惠一樣？ 咁樣我哋有無慳到呢？最後我都無理，只想著開開心心同女朋友去旅行就算。
正如女朋友所講，一兩個鐘頭機，啲乜野飛機餐，機上電影根本唔重要，座位窄少少又有乜所謂，上機訓到落機咪仲舒服，所以我一啲都唔介意坐廉航。 但現實總係比想像中殘酷，當飛機起飛無耐，坐我前面果位乘客就將個椅背調教到最斜嘅位置，根本就差唔多頂到去我心口前面。 雖然無實質掂到我，但坐過飛機嘅大家，都知道果種感覺係幾咁唔舒服。 我曾經嘗試過叫前面果位乘客可唔可以將個椅背教返上啲，但佢回答我嘅係：
「先生，你睇吓周圍嘅人，十個著咗幾個人都係咁架啦， 怕迫嘅話就唔好坐呢班機啦」我環望四周，無錯，好多人都係學似呢位乘客咁樣，將個椅背有咁斜教到咁斜黎訓。 原來呢個已經係廉航嘅潛規則嚟……
好不容易捱過呢程機，同女朋友去到目的地，發覺我哋根本就唔係住酒店，而係住hostel…… 說好的二人世界呢？好彩女朋友喺呢間hostel訂嘅係兩人獨立房，但係房裡面係無廁所，要上廁所或者沖涼嘅話，就要去出面嘅浴室同其他住客一齊共用……
我問女朋友呢間房幾錢一晚？ 佢話500蚊， 我心諗，三晚1500蚊，加場機票嘅話，即係除黎，機票連酒店每人要$1750， 比起我去台北慳咗$750蚊，但我就要坐俾人頂位嘅機，又要住間無廁所嘅房。 如果俾我揀，我情願俾多750蚊算喇。
而家先黎後悔無用，需知道女朋友慳儉成性，我而家能夠做嘅野，就係唔好抱怨，好好哋同女朋友去享受呢個旅程。 最後呢個旅程機票酒店係慳咗，但日常洗費洗多咗，女朋友話慳埋啲機票酒店錢可以食多兩餐好嘅，但如果比我揀，我情願住得好少少，因為我好想扑完野有得即時沖涼呀仆街……
台灣之旅去完，女朋友就話想去日本。
「岩岩先去完台灣， 又去日本， 日本洗費好貴喎……」
「唔怕啦，坐廉航，住民宿窮遊咪得囉，最多我應承你，超過一百蚊嘅機票我唔會訂，咁得未？」
我當時心諗: 咩話？ 一百蚊嘅票？你訂得到嘅話我就真係唔怕同你去呀。
就係咁，我就陪女朋友一齊去搶機票。 每當間廉航一話有特價嘅時候，我哋都會準時12點前開定電腦、手機同ipad去搶平價機票。 可惜嘅係，無論我哋每次幾準時去捕機票都好，個網站總係會大塞車而load唔到平價機票，就算俾我哋好彩Load到，填晒所有資料後，個價又會升返，就算再退一步貴咗都照買嘅話，又經常到最後俾唔到錢…… 一次，二次，三次， 每一次去搶特價機票，都好似去打仗咁樣，而每一次都好大機會會輸，但又每一次輸完都唔忿氣咁，點都要買到一次先心足。
我曾經問過自己，其實我只係想買兩張機票0者，點解要做到好係求緊航空公司賞賜一粒還魂仙丹俾我咁嘅？整個過程好辛苦，好屈辱…
終於有一次俾我買到來回去東京嘅機票，不過係由百幾蚊追到上去每程488蚊，當我興高彩烈咁樣去到最後俾錢嘅步驟果時，我細心睇一睇， 機場稅加埋行李要$2000蚊一張飛，但去程夜晚六點幾機，回程係早上六點幾機，咁即係頭尾兩晚酒店全浪費，但如果換啲靚少少時間嘅航班，個價錢就要三千蚊……如果你話來回一千蚊我真係無藉口唔去，但而家只不過係慳得果少少錢，但機上幾個鐘頭連水都無啖飲，又好大機會俾人頂住個心口訓， 值得咩？
突然嘅靈機一觸，我發覺之前自己根本就中咗啲廉航嘅仆街銷售手法嘅伏，先俾個超低價錢你，但機票數量極少，等你哋一班人以為好著數早早就捕住電腦前面等開賣，但到最後你買唔到最平，就會退而求次去買啲無咁平嘅飛，到最後失去理智地去買啲根本著數唔多嘅機票，但自己心中就覺得已經平咗。
一下子諗通咗， 我無去訂呢程機票，我同自己講，以呢間廉航嘅質素同服務黎比較，我只會買連稅連行李費少於$1500蚊嘅機票。超過呢個數我唔會考慮。 之後我將呢個諗法去同女朋友講，佢話我傻，廉航點都會比傳統航空公司平，我話價錢係平咗，但計返服務同質素，其實有時我哋真係無乜著數可言， 我建議話不如睇下啲傳統航空公司有無優恵機票仲好啦，起碼人哋做優恵嘅時候，你都最少有一兩日時間慢慢去揀機票酒店後先訂，而唔洗爭取時間買完機票之後先諗住咩酒店。有陣時撞岩啲日子，人地國家唔知搞緊咩活動而迫爆人，到時真係一晚住宿費都貴過你機票所慳到嘅錢…
女朋友無理會我，佢繼續每次航空公司做優惠嘅時候去捕機票，終於有次俾佢捕到$1600連稅連行李嘅東京機票，但我見個時間又係晚上六點幾飛，早上六點幾回程，我同佢講咁樣好浪費酒店錢，但佢話可以頭尾兩晚訓機場…最後我並唔同意頭尾兩晚都訓機場，但同意最尾果晚訓機場。
還記得當時又係ANA做緊優恵，二千幾蚊就可以有靚時間飛羽田嘅機票，但女朋友話貴咗成千蚊，唔考慮。 其實慳慳埋埋嘅錢，都浪費咗唔少係第一晚嘅酒店啦。
去東京幾日，我地加埋洗咗兩萬幾蚊飲飲食食同買嘢，過程大家都好開心。但回程時，訓咗幾個鐘頭機場，我有啲唔係咁開心， 大家喺香港做得咁辛苦，點解去旅行要就住呢一千幾百蚊黎要自己受苦呢？洗費兩萬幾，兩個人食一餐和牛都成千蚊，點解我要為慳果幾百蚊而要訓機場膠櫈黎受苦呢？
坐埋呢次廉航，我發覺到有啲嘢係我未知嘅，就係登機閘口前，根本都未到上機時間，啲人已經不正常哋排起一條長長嘅人龍等上機，我當時不已為然，仲慢條斯理咁等到最後一批人先入閘。其實女朋友都有催過我快啲上機嘅，但我話而家咁多人，我呢幾日行到好攰呀，我唔想企係度排隊上機呀，最後女朋友都無奈哋跟我做最後一批上機嘅乘客，不過女朋友話我而家唔排隊嘅話，等陣一定會後悔。
最後我明白點解會咁樣講，因為到我上機時，我座位上面嘅行李架已經被人佔據晒，根本就無位可以俾我擺，其實我哋只不過係兩個裝滿手信嘅背囊，加一袋機場嘅手信，點估到連一啲位都無得擺？？
最後搞咗一輪，空姐幫我哋搵到一個位放一個背囊，但另一個背囊同機場手信膠袋，就只能放係自己腳下……回程又係撞到前面將座椅教到最斜嘅仆街。 返到香港，我同女朋友傾過如果廉航唔係比傳統Airline平太多嘅話，下次不如俾自己坐得舒服啲好嗎？ 女朋友話明白。
之後女朋友都有同自己朋友去旅行，我發覺佢好多時機票都只不過係平三幾佰蚊，但我無出過聲，直到近期，佢又話好想去東京走一轉，叫我陪佢。呢事我醒喇，我話今次由我去包辦機票酒店，佢同意。但佢話買之前要經佢同意先。
今次東京之旅，時間好彈性，所以我有時間去等比較優惠嘅機票，當中女朋友send過一啲又係果間廉航嘅機票我睇，我睇一睇，都要二千頭，唔考慮。
終於喺上星期，我等到ANA做優惠，8月22號凌晨1點機去，27號凌晨一點機回港，可以住四晚酒店，玩足六日，每人有二件23KGS嘅行李，包飛機餐同機上娛樂，票價$2616。
我見到呢個優惠，同女朋友確認咗假期無問題，第二日先輕輕鬆鬆去訂機票，訂完機票後，我再慢慢搵酒店。 終於係琴日，俾我等到五星級嘅希爾頓酒店做優惠。 住四晚台場希爾頓嘅5星級酒店350尺客房，一張超級大嘅King Size嘅大床，仲要有露台，望彩虹橋海景夜景嘅房，連晒所有稅，四晚加埋都三千九百蚊港幣， 我覺得超值，於是就即刻訂咗。
$5200蚊機票， 加$3900酒店，每人$4600蚊就可以坐ANA靚時間飛機，加上四晚5星級嘅希爾頓酒店，我覺得呢個已經係一個無敵價。 於是乎我開開心心咁樣通知女朋友我搞掂晒所有嘢。
本以為佢聽完會好開心，但佢聽完之後第一個反應就係：
「吓，每人$4600？ 點解會咁貴架？ 」
「哦，一分錢一分貨嘛， Airline好，酒店好，去個旅行都舒服啲啦，而且又唔洗你俾錢嘅，我都係想你玩得開心舒服姐。」
「開心？ 我唔覺囉，洗多咁多錢，我點會開心呀？ 我之前搵俾你嘅機票， 1800蚊就得，民宿每人三百蚊晚，你話唔想同我以外嘅人同房，OK，我就你幫你搵間Airbnb， 七百蚊晚就搞掂，加埋都只不過係$6400， 即係每人只不過係$3200，足足平咗$1400蚊呀， 係每人平$1400蚊呀！！！！」
「你聽我慢慢解釋好唔好？」
「好，你講」
「無錯每人係多咗千幾蚊，但你知唔知你搵嘅航班同上次一樣，第一日全日浪費晒，又要俾酒店錢，最後果晚又要訓機場，我覺得好辛苦呀！！！」
「咁時間唔岩嘅話，咪改第二班機時間囉」
「改第二班機要加錢架。」
「咁都平過你而家呀。」
「我睇過，要靚時間嘅航班，總數只不過平過ANA一百蚊咁大把，咁點解我仲要坐廉航呀？ 一個唔該我行李超重，又要補錢架，你上次都見識過我哋行李過重而要自己拎啲重野落背囊度揹住過關上機啦。」
「你根本上就唔明白我諗咩」
「諗咩？ 爭一百蚊，剩係一個飛機餐又或者唔洗坐接駁巴士行樓梯上機嘅服務都值回啦，再唔係嘅，我坐得舒服，唔洗俾人頂住個心口訓，又或者唔洗趕住早上機放行李而企足大半粒鐘都唔止值100蚊啦。」
「算，我唔同你拗，咁Airbnb果度啦，4晚加埋足足慳$1100蚊呀，點解你又唔住？」
「小姐呀，你間Airbnb成間屋好細架，睇相得果二百幾尺，張床只不過係四尺半， 出出入入都要行成十分鐘先去到地鐵站架，你自己諗下啦，由機場坐完JR，要拎住行李去行路再行幾十級樓梯去轉地鐵，然後又拎住個篋搵路搵地鐵站，再行樓梯迫落地鐵度，再行樓梯上返路面然後再拖住個篋行十幾分鐘去搵路搵屋， 你話去果時都無所謂，咁走果時個篋你自己都知道有幾重架啦， 然後隨時仲會有Hand carry拎住，大熱天時好辛苦架，一個唔該落樓梯時仆親就仲麻煩呀。 你airbnb係無服務架，四晚用同一條毛巾，四晚無人執房架，而且第一日嘅房內清潔度又可能未達預期。 而家住希爾頓，有靚房靚床靚景好服務， 車站又近，走果時又可以坐機場巴士直達機場，連行李都唔洗搬， $1100蚊四晚，值架」
「你都唔明，住民宿或者住Airbnb先可以感受到當地嘅文化嘛」
「我就真係唔明喇， 住民宿又或者Airbnb，我哋又點感受到當地文化呀？」
「算，你都係唔明架喇！」
「咁我同你講，我同你都係住公屋架，我嘢一年三百幾日都焗住要幾個人迫係一間三四百尺嘅公屋裡面，訓嘅係只得三尺半嘅上下格碌架床，我去旅行唔係一定要大駛，而係唔想因為慳果一千幾百而受苦呀，我想住得舒服少少呀，我想有張大床俾我哋兩個訓呀，你明唔明？」
「我明，但係真係貴咗嘛」
「好喇好喇，當我唔明啦，咁而家所有嘢都訂咗，因為全部係特價嘢，條款係訂咗之後無得更改，都無辦法架喇，咁照去好無？」
「你都訂晒喇，我仲有得Say no咩？ 」
「咁咪得囉，黎啦，開開心心去旅行啦，我保證今次你會飛得舒服，訓得更舒服。」
「嗯，我都知你諗乜，但我有個問題唔知點同朋友交代好。」
「咩問題？ 」
「你都知我班frd架啦，如果佢哋知我住什麼希爾頓，就一定會問我做咩唔住hostel或者Airbnb架喇」
「佢哋都黐線架，點解我哋去旅行鍾意坐咩住咩，又會關佢哋事架咩？ 」
「唔係呢，你唔明架喇，佢哋總係會覺得我哋好笨，大家去嘅地方，時間都係一樣，而我哋就洗費貴過佢哋。」
「我明喇，我終於明白點解每次去完旅行返黎之後，總會有人問我哋坐邊間Airline，機票幾錢，又會問我哋係咪住民宿或者Hostel喇，如果答佢哋話唔係，佢哋就會笑我哋洗貴咗。」
「咁我可以點應付我班朋友呀？」
「對你班朋友就無謂講得太絕啦，你同佢哋講，佢哋坐開果間廉航係大陸海南航空屬下嘅子公司黎架，即係佢地一直坐緊大陸航空公司呀，你都知架喇，中國的隨時會爆炸架， 我哋近排先知道，所以情願俾貴少少錢黎保障自己條命。 至於酒店房，你唔洗講太多，你剩係話我唔聽你講就訂咗，然後去到之後，影兩張房間嘅相，然後出露台影張彩虹橋嘅夜景相放上FB同IG，就自然無人會話你笨架喇。 」
「點解咁做就會無人敢話我哋？」
「好難解釋，總之照做就得架喇」
最後女朋友帶住一團疑惑而收線。 其實而家真係好多人中咗某廉航公司嘅毒，成日以為自己能夠用超抵價買到超值嘅機位。但其實當中搶機票嘅過程已經將大家迷惑咗。 明明傳統公司一做優惠，個價都只係貴過你一千幾百，但服務同保障都好過你好多，起碼最少都唔會突然間無理地取消你班機而不作任何賠償啦。
以前去旅行，人哋只會問你去邊度、玩過啲咩食過啲咩，又或者問你有咩靚相影到，根本就唔會有人問你坐邊間航空公司或者住咩酒店。 而通常只有極之喜歡show off嘅人先會主動同別人講話自己住邊間五星級靚酒店。 但時而世易， 而家有啲人以為自己能夠買到平機票就代表自己聰明，而別人買唔到，就覺得別人好笨。但其實當中我哋用咗幾多時間同心血去搶機票呢？ 你用時間去慳點錢，人哋用一點錢去買服務，大家嘅需求不同，根本就無咩好值得取笑。
以後再有人問我點解咁笨唔買廉航機票嘅話，我只會答佢：
「大家所需不同，我需要的是服務和舒適，你懂嗎？」
