一，純粹個人感受，冇乜教育意義。早兩晚，見到好多香港人通頂抵冷去鳥不生蛋嘅九龍灣排隊買口罩。我心諗，假如佢哋係去買來炒，我都仲覺得呢個城市正常少少。真係慘情嘅係，我相信當中絕大多數都係出於恐懼。
二，尋日，又有人搶購廁紙。記憶中，1983年都試過搶購廁紙。用銀紙換廁紙，呢個行為我覺得好有符號意義。可能我敏感啦；總之搶購廁紙呢個現象，我好主觀咁覺得非常之咁唔老嚟。
三，八、九十後嘅朋友，可能唔知道1983年發生咩事。1983年9月，港元大幅貶值15%；好多人即刻去超市搶購，米同廁紙，就係兩樣搶到冇晒嘅嘢。我記得，當時因為父母都要工作，收工去到美孚間百佳，已經乜都冇。媽媽就好淡定，話咁就算啦。
四，1983年10月，港英政府作出一個果斷嘅決定：聯繫匯率。當時中英正就香港前途問題談判，港英政府就將貨幣發行，變成完全「規則為本」，有如標靶治療咁準確。
五，我知道有人話聯繫匯率令香港資產價值波動；又有人話不如用一籃子貨幣。過去十幾年，我都唔知寫過幾多篇。簡單咁歸納，規則為本既好處係透明度100%，而且唔會因為政治考慮左搖右擺。係，任何制度都有代價，但聯繫匯率換來嘅穩定，變相令香港金融市場嘅成本同美元市場掛鉤。之後歷史證明，減少匯率風險，亦都係香港成為國際金融中心嘅一個好重要原因。
六，唔係話法治、司法獨立等唔重要。但係，如果你明白到，法治嘅對立面，係人治。聯匯，其實就係將法治精神，完全發揮響貨幣政策，係一個零人治嘅貨幣政策。比起打晒飛機嘅 inflation targeting，聯匯係更實淨 。
七，熟悉貨幣史嘅朋友就知，1973年之前，世界各國嘅金融秩序叫 Bretton Woods，就係美元掛黃金，各國貨幣掛美元。
八，其實1972年之前，港元掛英磅。當年英磅同美元脫勾，港元由1972到1974年，掛美元。1974到1983，港元又自由浮動。呢段日子，唔見得香港嘅通脹受控，又或者大家對港紙極之有信心。
九，當大家都見到紙幣購買力不斷削弱，買磚頭買股票，都好過揸現金。就係呢十年，成就大家今日所認識嘅地產發展商。呢段日子，好多人就算十幾厘息都要供樓；不過，佢哋大多數都苦盡甘來。香港嘅磚頭信仰，有一定嘅歷史因素。
十，所以，當我見到連廁紙都被搶購，從前嘅景象響腦海湧現，內心係幾咁感觸？又話說，七、八十年代另一個令我印象好深刻嘅，就係我成長嘅旺角。當年有啲炒金嘅鋪頭，外面會掛個電子板報金價。記得本來得四個位，但到後來竟然唔夠用！個時我又經常同老頭去寶生銀行買賣紙黃金；我就涼冷氣。
十一，雖然我住美孚，但由於父母工作嘅地方響旺角，小學就響太子返，中學就去油麻地，所以我自認係香港嘅 Proto-MK，又曰「原祖MK仔」。
十二，我班小學同學，真係來自 all walks of life，而且大多數都好早熟。當年譚詠麟張國榮好紅，我有同學仔就幫人錄 Cassette 賺錢；我哋都只係三、四年級。又有同學仔，唔知邊度搵到攞龍虎豹返學，當然係收錢先有得睇，冇記錯我都係五、六年班。亦都有同學仔搵到教師用書，但好似無乜市場。此外，我哋仲有好多經濟活動；而返學，最主要係接觸客戶、收數、放數、交換情報。
十三，我小學成績，勁過當今行政長官；咁多年，只係試過一次唔係全級第一名。不過，我操行試過攞過 E，周會畀校長捉上台打手板示眾。Proto-MK 仔，真係有歷史㗎。
十四，中學，真係命運嘅安排，去咗一間以自由聞名嘅男校。又好自然，我由太子殺落油麻地，每日蒲好景同信和呢兩個聖地。如是者，我中學嘅成績，只夠我升大學。不過，記憶中呢段永遠都係夏天嘅八、九十年代，到今日都仲係充滿各種色彩。
十五，講咁多童年回憶，我只想帶出嘅係，其實我身邊好多同學、朋友，其實都好似我咁，成長於一個相對市井街頭嘅環境。學壞？一個人去到六、七十歲，一樣可以學壞；只要你畀啲權力佢，佢就壞㗎啦。
十六，成長經歷裡面，最富教育意義，一定係買買賣賣，搵錢駛錢嘅經驗。當時，我哋習以為常，甚至都冇乜點諗過大個之後做咩；一直去到中六、七呢兩年，我見到另一個世界。
十七，我讀嘅，話晒都係名校；名校，就一定會搞下外交，識下其他女校。當年，我成績雖然中游浮沉，但叫做都有唔少師弟跟我，所以，我嘅高中生活，主要都係嘗試打入「學界上流社會」。無錯，可能係我人生第一次見識到咩叫社會階級。
十八，女校，都係個幾間啦，咁都會搭下其他男校；作為 Proto-MK 嘅我，第一次同啲公主皇子打交道。中六個年夏天，有晚，我忽然覺得世界好大，我要去美國讀大學。
十九，大家知唔知 Snob 呢個字點解？話說從前英國大學，雖然冇話規定貴族專利，但當你父母都係養牛，你讀大學為乜？所以，大學生都係貴族，而好似 Harry Potter 場景入面嘅宿，就會有個牌寫住學生同畢業生嘅名。當然，唔會就咁「陳大文」；而係連名帶姓加封號「旺角西洋菜街陳大文公爵」。不過，去到維多利亞年代，終於有啲平民入到大學，不過佢哋冇封號，點算？佢哋就會寫 sine nobilitate，即係拉丁文嘅「冇封號」咁解。
二十，偏偏，就係呢種 Snob 最講階級。維多利亞年代，本來就係貴族歿落嘅時代，但亦都係中產發夢成為貴族嘅日子。
廿一，我成長嘅七、八、九十年代，客觀係脫殖同建立香港本土意識嘅三十年，但主觀呢，我都認自己有時對英國嘅眷戀比英國人更甚。
廿二，至於剛才提到嘅公主皇子。坦白講，咪又係咁啦。我都有人做官嘅。不過，我想講嘅係，呢班無憂無慮到公卿嘅人，一生人都係以做個好學生作手段，等班主任點佢做班長。當然，考第一都好重要。
廿三，幾十年後，經此一疫，我諗返 MK 嘅價值，其實就係「機會係隨時間流逝」，有價值嘅嘢，你唔去把握就會變得冇價值。冇價值嘅又畀你變到有價值，你咪叻仔囉。
廿四，我真心覺得叻嘅 MK 朋友，有個特點就係「多窿路」：「冇口罩？我識人響泰國印尼，你要幾多？」「你冇酒精？我有箱雙飛人？咩嘩？你連雙飛人有80%酒精都唔知？」香港其實好多呢啲 MK，梗有一個響左近。
廿五，話說回來，係公主皇子定係 MK ，家底出身成長經歷，固然重要，但去到最後，係你點睇自己。正如維多利亞時代嘅 Snob，佢哋咪又係平民，偏偏最講階級。同樣道理，你屋企可以係好中產，但只要你嘅願景係晉身上流社會，你就係佢哋嘅一份子。
廿六，每年香港都出產好多青年才俊；佢哋嘅上位軌跡，不外乎都係做專業人士，做官，做生意，然後做公職，最後就成為新聞人物。冇話啱唔啱，都係一個選擇；只要唔損害人，真係冇乜話啱唔啱。
廿七，至於 MK 呢？其實你唔好以為佢哋純粹係為搵錢。對 MK 來講，人生最大嘅肯定係：「我有，你冇。」有嘅，可以係口罩、酒精、絕版波鞋、黃子華幢篤笑嘅入場券⋯⋯只要好多人想要又冇嘅，佢哋就會搵辦法去搵返來。
廿八，有時我都會諗，香港究竟係由班公主皇子話事，定係由 MK 經營？好明顯，假如係由 MK 經營，佢哋見到有人要口罩，咪去搵來賣囉；賺錢係一件事，但做生意嘅人最大滿足感一定係：「第二度你搵唔到㗎喇。」
廿九，公主皇子遇到問題，自然反應係問老師，問老頭，問阿媽。佢哋就點都先會攞到口罩，甚至有都唔用：「咩事前唧依家？你買唔到口罩，你估我想㗎？你等我諗下方法啦。」當然，其實最終佢哋係唔會諗方法。
三十，「咁叻，你哋諗方法吖笨？」其實，好多人都已經搵緊供貨，甚至乎佢哋只係好本能咁，見到有需求，佢哋就會去搵供應。
三十一，講過好多次，良好嘅動機，唔一定有好嘅結果，所以判斷一件事係咪道德，要睇結果。啲公主皇子最大嘅問題，就係佢哋以為自己「跟足規矩」；就算有時犯規，佢哋都係「跟足規矩咁犯矩」。
三十二，結果？公主皇子係唔睇結果。班主任欽點佢哋做班長，就係佢哋睇到嘅結果，甚至連背後有咩目的都唔會去諗。呢個就係香港「#做咗當得咗」嘅風土病嘅源頭，而爆發嘅途徑，就係 #填鴨式教育。
三十三，唔同階層，唔同界別，都有「林鄭月娥」呢種填鴨式教育極品。填鴨式教育治港，太平盛世冇乜問題，反正都係 business as usual ；呢班公主皇子指指點點，自我感覺良好，咪由得佢囉。
三十四，危機四伏嘅世界，你畀林鄭月娥呢類人去處理，就一定仆街喇。你知唔知佢最大問題係乜？佢成世人嘅成功，一係就來自制度嘅自動升遷，再唔係就討好班主任，佢從來都冇試過要感受其他人嘅需要，即係冇同理心；換句話講，佢連當年我個位幫人錄 cassette 嘅小學同學都不如。
三十五，好同理心咁諗，點解香港人搶口罩搶廁紙？點解香港人連澳門賀一誠、台灣蔡英文等都收貨？好大程度上，係因為香港人對特區政府完全失去信心。咁梗係啦，次次都係做咗當得咗，但最終一鑊泡。對制度嘅信心危機，係會蔓延到唔同嘅範疇。搶購廁紙，反映香港人集體嘅精神狀態好脆弱，
三十六，我睇返當年立法會調查沙士嘅報告，大陸政府隱瞞，害到香港雞毛鴨血。#陳馮富珍 為咗病毒嘢叫 #SARS 定 #SRS 搞咗成十幾日，亦因為呢個原故遲遲唔將沙士加入去 #香港法例141章 《#檢疫及防疫條例》條裡面嘅附表，足足浪費兩個星期。沙士發生過嘅每件事，都重演緊。因為陳馮富同林鄭係同一種人，北京最鍾意嘅好學生。
三十七， 香港其實有好多人都有 street smart ，佢哋未必返過十九幾年學，就係咁邊做邊學邊打江山。當一個社會以呢啲人做榜樣，咪有希望囉。
三十八，但係，當一個社會，個個候任班長都以為自己叻過之前個件，咁咪仆街囉。我都幾肯定，林鄭以為自己一定叻過老董煲呔同思歪，佢發夢都冇諗過自己咁折墮。個問題出響個制度呀，懵炳！
美元港元脫勾 在 港元美金掛鉤是香港的最後防線？淺談港元與美金脫鉤的影響 的八卦
港元 #美金# 港元 脫鈎呢日出現就係香港變成南深圳之時https://mewe.com/i/%E9%AB%98%E6%89%8B%E7%B4%B9. ... <看更多>