【誠實食後感】東海堂宇治抹茶大福和抹茶若竹布丁
#自購 #非廣告 #東海堂 #抹茶 #大福 #mochi #布甸 #布丁
前排去飲收到張東海堂50蚊餅咭，
拎去加多1蚊換咗一粒大福同一杯布甸返嚟。
講開東海堂，近年佢啲宣傳照好多都影得幾靚，
啲蛋糕又越嚟越多花款👍
不過真係唔明點解成日要夾鳩硬加啲日文喺宣傳品上面扮喺日本嚟，
連新年賣糕都要加日文，年糕喎！蘿蔔糕喎！做乜鳩啫真係？！
呢個「宇治抹茶大福」成27蚊一粒，
係27蚊一粒！同個蒸飯咁上下價錢。
公平啲講佢都唔算細粒，
層皮食落好溶、無彈性，有啲一pat嘢嘅感覺，
維記雪米糍層皮都好食過佢。
入面大半都係抹茶慕絲，
抹茶味雖然未算最濃，但都夠皮收貨，
唔會太甜之餘仲有抹茶嗰種甘味，
味道OK嘅不過慕絲嚟講就真係唔係幾夠滑。
入面嘅抹茶軟心真係軟心嚟，唔係流心，
味道同慕絲嘅一樣，不過就滑好多，
溝埋一齊食其實唔係好覺軟心嘅作用，
因為唔夠滑加少少滑結果都係唔夠滑啫。
下面層蛋白蛋糕真係唔知做乜鳩，
味就無乜，又唔香㗎喎，
入口又鞋、又散、又乾，完全破壞咗成舊嘢。
整體唔伏，不過記住，成27蚊一粒喎！27蚊喎！
杯「抹茶若竹布丁」都唔平，要24蚊。
食落質地似慕絲多過布甸，
好似落咗好多好多忌廉嘅感覺。
抹茶味同甘味都有但係唔濃，
吞咗之後一啲回甘都無。
唔算甜但質地令人食多幾啖就覺得好Q漏，
同埋布甸嚟講可以再滑啲。
可以讚嘅係佢係香港製造，成份無色素同防腐劑。
計埋個價錢，食落其實都嬲嬲地😡
