讀者投稿《唔講以為係富豪老爺奶奶篇》長篇
早幾年我結婚了，但是，過程裡卻受盡冤屈。
其中一件我覺得嬲得黎但又最可以寫出街既事，係同置業有關的。
我同先生也是嗰堆 so called young professional ，掛名叫專業人士，但要成日進修，OT ，搵唔得多既人。向今時今日既香港，我們不敢呻太多，能夠有機會儲下首期去置業，可以諗下結婚，已經覺得好開心幸運。
向結婚前一段時間，男朋友有日打比我同我講，佢爸爸挾左佢去睇新樓盤。我聽到個樓盤名及地段時，已馬上吩咐佢無論如何，也唔好簽字買任何單位，不論同父母夾份定佢自己比都好，也唔可以簽。因為呎價唔值，我們又供唔起。
嗰日係男朋友忽然緊 call 我去幫手比 d 負評，等佢兩老唔好無預算下人買佢又買，然後無知地買左蟹貨。我無乜準備下去見佢父母，及地產經紀。
嗰日係我既 family day，我全家已經一齊出左街，而我又著得比較隨便同後生。去到個經紀就問我仲係咪大學生，話我咁快可以搵到人娶我真係好好 👍🏻👍🏻。而佢父母嗰對眼就 ... ... 生向個頭頂度既，覺得我好似好失禮佢咁，臉口十分不好睇咁。
個樓盤係一個樓花黎，我同男朋友真的唔認為可以買，總之係唔抵買。行街睇樓無問題，但買就 ... ... 🤣🤣🤣
世伯一直話：抵呀，抵呀。拎黎投資就最好喇。仲話今日都係比幾個 % 訂姐，之後做按揭就買得喇。
計盡條數，要傾倒所有錢，先夠錢買最細但婚後用唔著既單位。而發展商，又係出左名質素低劣既一堆，所以我十分唔睇好呢個樓盤。
但是，世伯及經紀不斷游說我男朋友，"買就啱啦，層樓起完，你先好結婚啦。"
男朋友比 signal 叫我踩下個圖則。我話：唔，地段係唔錯，但間隔我們用唔著既。因為我哋都好希望結完婚盡快生小朋友，太細既話，好快要搬。但佢個啱我哋用既呎數，我哋就真係買唔起喇。
世伯不斷問我：咁你可以拎幾多出黎?
我答佢：無，我係無錢既。所以係唔會買樓。
世伯：無錢? 點會無錢?
我：人窮咪無錢囉?有乜問題?
世伯：無錢你點結婚?
我：兩個人結婚，佢愛我，我愛佢咪得囉，我又無打算要使好多錢。
世伯：唔買樓，你住邊?
我：世伯，呢個世界有樣野叫租樓架。
此時，世伯已經覺得佢個仔同我拍拖好蝕，因為我無錢比首期。
之後，世伯繼續游說我男朋友買最細的單位，又話市區好，地段好，一定放租放得高。到起好時，仲可以避埋政府嗰個樓宇短期內轉售附加稅既期限。其實重點係（回家我反覆推敲），可以拖住供樓期間，無咁多流動資金，叫我們等層樓起完，先好結婚。講到唔買，真的走寶。
經紀先生也一齊游說，話呢度有幾好點好，(刪下好多字)。
見佢哋個個都咁開心，我男朋友都心動左一下，計下所以有雜費及稅項，做盡按揭係咪真係買唔起。
見佢開始被打動，我又真的要出手了。
世伯一面滿意，笑到四萬咁時。
我既醜人角色黎喇。
我：其實又唔係咁差既。既然世伯你咁喜歡，不如你買返層，自己收租，自己賺咪仲過癮? 我同男朋友係要儲下錢先好置業呀，如果要放租，向經濟唔好時，租唔出，我哋侷住供又唔夠住，真係企向度。(及後，朋友提醒我，好彩我無比嗰少少訂，因為放租要供夠一半先放得成，如果唔係唔可以的。)
此時世伯已經即刻黑面。
經紀先生也即時轉呔：唔啱世伯買比仔仔結婚用呀。
為免大家氣氛熾熱要簽呢張單，我打圓場了一句。
我：年輕人要置業，都應該量力而為，今日唔得，就明天繼續努力。後生仔，唔趕既。
走時，見阿世伯，已經黑住面同我分道揚鑣。
我一臉問號，我哋結婚，唔貪買樓，唔貪虛榮，量力而為，有何不妥? 🤷🏻♀🤷🏻♀🤷🏻♀ 連我娘親後來也問，我哋咁好管教，結婚係結婚，買樓係買樓，都無貪過叫佢比錢，請問佢嬲乜?
🤔：我估佢嬲我無錢夾份比首期。供係可以的，但錢，目前都係要還下學費先的。
男朋友多謝我救佢一命，佢最怕係比左少少錢，最後要撻訂。
返到屋企 （男朋友話我知的）
男朋友就玩大 d ，扮野問返個經紀，睇半山既老牌屋苑（計落都係比頭先呎價相差唔多，相差無幾嗰 d。佢咁做，其實係比世伯知，頭先個盤有幾貴 ）
世伯：嘩，阿仔你仲乜睇半山。
男朋友：其實呎價相差唔多姐，不過半山好舊嗰 d ，過千呎姐。
遺憾，呢條數 pro-rata 返比佢知個盤有幾貴時。
世伯一句：你女朋友真係好心頭高，嗰頭就叫你去搵豪宅。然後就拂袖而去。
🤷🏻♀🤷🏻♀🤷🏻♀ 我躺著也中了槍。世伯，Hello，我咪講左租樓住囉？
過了一段時間，佢哋又問我有關結婚既事。
伯母：你想擺邊度?
我：abc 酒店，夠你想要既席數，又唔太貴，我們負擔得黎。
伯母：其實，你唔夠錢仲乜唔儲多 d 錢先結婚姐? 而家唔結咪遲 d 結囉。
阿伯母係唔滿意我提議既酒店，連ban 左3至4間 （尖沙咀，北角，紅磡嗰幾間4星），話排場唔夠。話如果無5 星，位置唔夠 prime，叫我儲多年錢先好結婚。
我返去同娘親講返呢件事，娘親反問，佢無事嗎？我已經無乜點問佢拎禮金及酒席，所有事也盡量簡單，只要你們兩個後生攪得掂就算。佢而家仲要搵個貴場黎擺黎為難你?
🤔🤔🤔 黑人問號無限 loop。佢哋，係咪嫌棄我窮呢?
心水清既朋友，一定有答案既。
而準備結婚呢段時間，我實在係遇到多方既困難，詳細就唔講喇。呢件買樓既小插曲，係可以同人講下既。
簡單一句，今時今日沒有父幹，就算你們曾經幾努力追尋夢想，當人工唔可以唔幫到你 30 歲前上車，就算你工作幾認真，上司同事有幾欣賞你，一切，也是往然的。你個人，向襯家眼中係一點價值也沒有。
男朋友同我一齊去婚姻輔導。
輔導員第一輪發問：點解你哋想結婚既?
🤗：因為我覺得今時今日向香港生活一點也不容易，人生的確有好多困難同挑戰。但能夠同男朋友一起面對未來，我覺得再大的風浪，我也有信心，可以攜手渡過生命裡的每一個難關。因為有了對方，我覺得人生有更大的動力前進。
其實，因為覺得人生有了對方便完美而結婚，真的唔重要咩？🤷🏻♀🤷🏻♀🤷🏻♀ 乜結婚，真係要去買d 500 呎都無，但要成千萬既豪宅咩? 🤔🤔🤔
世伯，伯母，你哋仲乜咁鐘意 harsh 我姐? 買樓又要人買貴野，擺酒又要人擺貴地方。仲有好多事沒有詳述。
就係因為你哋向我哋既婚事及婚姻裡，多多干預，我同老公一直攪結婚到婚禮嗰晚，我倆一點快樂也沒有，仲抱住大家一齊喊左一晚。
回憶裡，每每回想結婚的事情，只聯繫上痛苦有壓力既回憶。就算發夢發返，也是難受到喊醒。
我，真心做唔到，要當你哋係父母長輩咁孝敬。
因為，我實在沒有一位家庭成員，以令我難受感覺委屈為己任，令我發夢見到佢哋有關既事時，也即時覺難受到喊醒。
而廣大既壓力，佢兩位老人家向我們結婚初時成日反問佢個仔：你老婆呢 d 叫愛你呀？係愛你就咁咁咁啦。佢屋企成日話：睇下你哋幾時離婚。
我回應老公一句：你係愛我既，就應該保護我，唔再容許其他人傷害我吧。
註：
其實，我moderate 左佢父母講野既 tone 。佢哋係一直阻止我們結婚的。原因，係因為我無錢，屋企無住私樓。佢一家覺得我襯佢哋唔起。講緊既，佢哋也只是個中產家庭，但是，佢哋既氣勢及態度，向結婚當晚，有無數既朋友 msg 返我，問世伯伯母係咪富豪，點解做人可以咁克人憎。對眼，可以睇晒我班朋友唔起? 🤷♀️🤷♀️🤷♀️
#退一步海闊天高
#我的極品四大長老
紅磡租盤 在 紅磡納米樓不足200呎月租萬元 納米盤 紅磡環海 - YouTube 的八卦
2018年下半年樓市逆轉，部分納米盤銷情未如理想，不過市區迷你單位買賣及租務交投仍獲支持。九建（0034）旗下 紅磡 環海．東岸3年多前開售，今年1月起 ... ... <看更多>