延續返噚日個故事先，關於點解佢哋結婚唔係個男仔揾工，而係個日本女仔要求其搵份嘢做，我將個原因放咗喺留言，等篇文唔使太長。
言歸正傳，日本女友返咗「臨床検査技師」半日已經message佢男友投訴，理由係化驗所另一個同事食lunch帶飯，搞到佢唔好意思自己出去食。
第二日佢女友繼續投訴同一個問題，我朋友就話其實一個人食飯咪仲好，可以清靜下，再唔係間中買返去化驗所食囉。佢女友話化驗所係擺糞便同尿液樣本嘅地方，一諗起就有心理障礙，雖然唔知間嘢幾大，不過我都理解嘅。
第三日都係纏繞於lunch嘅問題，佢女友話食飯得一個鐘太少......我都明有啲公司係唔止，但係一個鐘lunch hour真係會成為投訴原因咩？
去到第四、五日，佢女友開始埋怨返咗工冇時間溫習韓文、另一個同事好靜、聽講下年二月化驗所可能會搬，係呀，擔心緊2020年嘅事。
以我嘅經驗，day 1開始已經不斷挑骨頭，證明佢未適應，心態上好唔想返，所以就不斷放大所有問題，呢種狀態其實過到初一過唔到十五，因為我都係過來人，唯一辦法就係隨自己心意走，當你quit咗呢份工之後，無論個決定正唔正確，內心都會有啲罪疚感，會怪自己唔捱得，會覺得千辛萬苦搵到份工又放棄好嘥料，但係唔緊要嘅，呢個係正常心路歷程，當你去到下一份，或者再下下一份都會有放棄嘅念頭，好自然就會開始諗係咪自己有問題，亦明白到再係咁落去會唔掂，跟住就平衡返少少，叫自己新工作要坐定定。
轉過N次工嘅我好清楚了解，儘管啲工可能一份比一份差，仲會有啲後悔點解第一份要走。
我朋友都盡量唔畀壓力個女仔，鼓勵完之後會勸佢唔開心就走，唔好迫得自己太緊，結果個女仔梗係resign啦！幾經辛苦轉去另一間化驗所，相同嘅不滿同情緒又再延續，再resign，再搵。終於去到第三間，個女仔開始意識到再係咁落去唔掂，轉去邊都會歷史重演，所以呢間嘅環境雖然差過第一間，離屋企又遠咗幾個站，不過今次就堅持落去，少咗好多怨言，有次男友叫佢唔好死捱，總之永遠都支持，工作唔啱搵到啱，個女仔就答：「再係咁我哋註冊都唔可以一齊住㗎喇，要堅持，加上又唔想畀家姐睇死。」
有情人終成眷屬嘅結局，我上次見證佢哋結婚都好欣慰。
我都唔係第一日就做到自己嘅dream job，加上細個家境唔好，曾經做過一啲好唔鍾意，又覺得好唔適合嘅工。記得細細個搵工處處撞板，坐食山崩嘅時候我去咗做茶記侍應，喺荃灣福來邨，返中班，冇晒私人時間，不過馬死落地行，一係就做，一係就窮，我揀咗前者。
當時我好鍾意送外賣，貼士可以自己落袋吖嘛，除咗送去一間－－－荃灣桑拿（定唔知泉灣桑拿），每次都要拎入去按摩女郎個休息室，佢哋嗰種熱情加上休息室嘅正常燈光，影響到我一世從未去過任何風月場所，點解？因為我知道好伏，相信呢個係我人生最大得著，永遠唔會花一分錢去嫖。
有次我送完外賣去荃灣桑拿，返到茶餐廳同另一個侍應講：「點解仲會有咁多麻甩佬去嘅？」
佢答：「休息室開晒燈梗係清楚啦，但去到按摩房好黑㗎嘛，何況呢間都係床尾機啫。」
我：「咩係床尾機？」
我唔教壞你哋喇，總之我又學多一樣嘢啦！
工作的確可以分兩種，一種係為興趣為理想去做，一種係為現實環境迫住做，但本質上係冇分別，我哋都係為咗個目標而奮鬥，當我做茶餐廳嘅時候，你認為我真係對呢份工有興趣咩？但我嘅目標係先解決三餐，有少少儲備先再去搵一份自己鍾意嘅工，我當佢係一個跳板。唔係每一個人都咁幸運，一出嚟社會就返到一份夢寐以求嘅好工，所有嘢都係一個過程。
有啲工作可能好辛苦，或者搵唔到咩大錢，更加深明唔會做得耐，但係你仍然可以藉此了解自己，知道自己擅長乜嘢，唔擅長乜嘢，鍾意乜嘢，唔鍾意乜嘢，佢未必直接送你上康莊大道，不過可以令你避免行更多冤枉路。
唔知睇緊呢篇文章嘅你係事業有成做緊dream job，定係做緊一份唔多鍾意嘅工，甚至係失業中，但希望你唔好放棄，清晰嘅目標同埋適當嘅堅持可以幫你脫離困局，唔使來回又折返起點，加油呀！
福來邨 在 福來邨3-4人裝修單位(98)@宏基工程梁生90255660 - YouTube 的八卦
Music by audionautix.comEdit with Vlog Star apphttps://play.google.com/store/apps/details?id=com.ryzenrise.vlogstar. ... <看更多>