《法羅魅力沒法擋》
一連十星期嘅語言班已經過左七星期。老實講，呢兩個月係過得有d攰嘅。一星期上四日堂，而且好多時候係接著夜班，早上7點收工，9點就上堂，有時仲要接著學車。但係忙得黎又有莫名嘅興奮感，有種為新生活努力而感到滿足嘅感覺☺️
語言班有16位同學仔。分別來自中國、菲律賓、泰國、越南、墨西哥、英國、巴巴多斯、烏克蘭、巴西、伊朗，當然仲有黎自香港嘅我，成個語言班好似成個聯合國咁。成個法羅群島嘅人口係由93個唔同國籍嘅人組成。可能你會問，到底黎自世界各地嘅人，點解會黎到呢個一年有三分之二時間都落雨，平均氣溫只得13度嘅地方生活呢？語言班上嘅同學有9成都係因為同左法羅人結婚而搬黎嘅。
法羅政府好重視新移民，近呢兩年法羅嘅人口都有顯著上升嘅趨勢。而家我上緊嘅語言班係政府免費為新移民提供，而喺上語言班期間，市政府又多次派人黎到同我地見面，了解我地嘅需要。今日就有個市政府代表黎到了解我地嘅教育背景，希望能夠為我地提供相關嘅工作或者教育支援。
一問之下，發現我班上人才濟濟。個個都碩士畢業，有讀歷史架啦，有讀心理學架啦，烏克蘭姨姨更係法律系畢業，做左10幾年執業律師，專做刑事案件。而家佢喺酒店做清潔。我望住班上嘅同學，大家都好努力學法羅文，唔係為興趣，而係為左新生活而努力。佢地大多喺自己國家有一番事業，但都甘願搬到呢個只得五萬人嘅寧靜群島，當然一部分人係為愛啦，但唔能夠否認呢個島有佢嘅魅力。
早幾日大地之子送我返工。喺酒店嘅酒吧見到佢前老細喺度彈緊結他。佢就醒起：「係呀 我前老細係musician」而佢正職係社會福利部門主管。大地之子嘅姐姐正職係幼稚園保姆，同時佢又係出色嘅攝影師。我喺度認識左一個台灣女仔，住左喺度6年，佢正職係酒吧侍應，但學得一口流利法羅語，最近佢被法羅群島字典網站聘請佢做中文法羅文字典，係呀，遲d大家可以將法羅文翻譯成中文啦！喺呢度，有無限嘅可能性，認識一個英國人，50幾歲先搬黎法羅群島，以前喺英國係銷售總監，開BMW,黎到由酒店receptionist 做起，而家又成為左旅行社老闆。
好多人話：「法羅群島？退休先去住就岩。」我曾經都係咁諗，有一陣子好想搬走。但係住落發現，呢個純真嘅國家就好似張白紙咁，所有國民都手執畫筆，由大家自由畫出自己鐘意嘅圖畫。而且大家能互相欣賞大家嘅作品，不存批判。
市政府人員建議烏克蘭姨姨可以再重新修讀丹麥刑事法，烏克蘭姨姨笑言：「唔啦，喺法羅群島無用，呢度咁和平，無罪案呀。」由律師變成清潔工都可以咁樣一笑帶過，大概烏克蘭姨姨都被法羅群島嘅魅力迷住了。
---------------------------------------------------
❤️我從九龍半島搬到法羅群島出左網頁啦！想知道更多法羅群島旅遊資訊或者想分享法羅群遊記，記得去 www.whereisfaroeislands.com
❤️如果想睇更多大地之嫂同大地之子嘅無聊小故事，大家記得去我個page度較返See first 呀！
❤️仲有要記得follow埋ig: whereisfaroeislands ，
https://www.instagram.com/whereisfaroeislands
社會福利部 網站 在 【臺灣吧】衛福部社會福利服務中心 的八卦
社會 福利服務中心提供各式各樣的服務給有需求的民眾~快來認識社區內社會福利服務中心! ... 衛生福利部社會及家庭署 ... 斷裂的社安網／社會安全網1.0計畫期滿民眾有感? ... <看更多>