林忌：當年英國佬頒授勳章，俗稱叫做「荷蘭水蓋」；今日偉大嘅特區政府，決定把爛銅爛鐵嘅銅紫荊星章，贈與花名叫做「荷蘭叻」嘅陳百祥，真係諗起都令人興奮！從此大家就可以記得，當年嘅荷蘭水蓋，今日終於正名為「荷蘭叻水蓋」。
強伯林振強當年教落：「只要見阿叻有份出現，你就知道，這個節目必會變為業餘、不認真，和像馬戲團。以一人之力，左右一個騷，或一件盛事，這正是我渴望擁有的影響力。」Wow! 你諗下今日阿叻係咪叻到爆先？阿叻完全改變了「水蓋」嘅性質，以一人之力，完全左右授勳儀式，令成件事變成業餘、不認真，好似睇馬騮戲一樣，你話有邊個比得上？
97前查理斯王子來頒水蓋，就真係光宗耀祖嗰隻光榮；2020年睇住阿叻上台拎狗餅？啊唔係，係荷蘭叻水蓋！嘻，要改用愛國嘅普通話讀，記得要讀成「光湧」，啊，被人剝光咁淚如泉湧！興奮程度，就好似1996年阿叻聽到李麗珊拎奧運金牌嗰時，拎住枝香港旗出來揈下揈下，嗰種令人嘆為觀止嘅狀態！
阿叻回應報紙訪問時，答話拎水蓋係「非常榮幸，並覺得有好深意義」！呢種深層嘅意義，請恕膚淺嘅我無法明白，就好似當年強伯提起，話阿叻著住口罩咁款嘅三角泳褲，又或者透明圍裙加孖煙通上主持電視節目一樣，呢種咁深層次嘅道理，你唔明？冇問題，Super！大家先高歌一曲：「叻！我至叻！我哋玻璃可變鑽石」，明唔明？
啊，你仲係唔明？呢度係2020年嘅「中國香港」呀！係美國佬都唔認叫做 Hong Kong，而係叫 China 嘅地方呀！因此大家尊敬而推崇嘅人與事，當然係要用中國邏輯作為今日嘅標準啦！阿叻就係香港人嘅好榜樣！昨日揈香港旗，今日就要揈五星旗；有權力就代表公義，有金錢就代表真理，唔通同你講耶穌呀？
何況今日香港班教會，代表耶穌教小朋友，話「天父，謝謝你讓我成為中國人，我要學耶穌般熱愛國家民族」，下次不妨索性學阿叻，著住條透明圍裙加孖煙通，走去教會講道，呼籲教徒齊齊學猶太，向羅馬政府篤灰舉報「黑暴」，捉嗰個反黨反國家嘅暴徒耶穌，去釘十字架，呢種咁有喜感嘅畫面，應該好適合阿叻去示範，無論係神父或者牧師，甚至係轉會去隔壁和尚寺，高喊「我佛慈悲」，都應該唔會突兀，令人非常期待。
睇到呢度，我諗各位讀者都好有衝動，想高喊幾句：「我佛你！」，「福你個佳」、「願主打救你」，為咗滿足各位嘅衝勁，呼籲大家要學下咩「中國全國佛學協會副會長」嗰位「印順大和尚」一樣，話習近平講嘢係「當代佛經」要抄三次咁，一心諗住你想祝福嘅對象，再抄三百次上述嘅金句，想J下阿叻條紅底又得，想High下林鄭X阿叻嘅合照亦得，得咗！冇得彈！
後記：咁耐以來都想寫篇文，向由細睇到大嘅強伯致敬，多謝！（請訂閱、轉載支持壹週刊）
真理褲不講道理褲 在 真理褲的正面 才是重點吧 - 穿搭板 | Dcard 的八卦
好多人說什麼會露出屁股蛋，我的真實經驗是，因為很貼身，屁股反而超級安全的，就像輕飄飄的短裙、比超貼身的窄裙危險一樣，重點根本就是正面吧！！！ ... <看更多>