口臭，係身體發出警號，必須對症下藥。馬雲面對全球投資者，竟然口臭到，挺起胸膛講一句「好多假貨，質素都比真品好！」大佬啊！真嘢唔好攞出嚟講啦，喺中國好多時真係「假」好過「真」。
假貨專屬外快
君不見New Balance俾中國New Barlun告侵權，仲要告得入兼罰賠，成9,800萬人幣啊。呢單嘢已明明白白反映，做山寨好過做正貨！至於阿里巴巴旗下平台，令山寨品存在巨大商機，賺到錢啦咪可以同原裝正貨打官司囉，順手賣埋廣告！國際品牌以為大陸13億人口市場好易做？未見官先打八十呀！馬雲曲線幫中國企業賺外國錢，推高GDP！
假數是王道
「假」好過「真」呢個概念其實係有根據，有邊個夠擔同我講，「造假數唔係好過真嗰盤數！」都唔提中國假GDP、假進出口數據，單講被證監會質疑造假嘅「千年妖股」漢能（566）已夠精彩！隻股吹下吹下，吹到好多外資基金入局，吹下吹下，吹到市值升至3,786億元。當日一爆，唔少基金即時賤價掟貨。
即係咁，中國人輸錢俾中國人，啲錢留喺中國；但鬼佬輸俾中國人，概念上就係送錢入中國！哈！呢招叫中國要贏，鬼佬就要輸！所以假數企業，係令中國變強其中一個手段！溫馨提示，美國證監會已開File，查美國上嘅阿里巴巴數簿！
假愛國主義
上星期我先講過，中國人的愛國抵制是Bullshit。如果唔係就唔會口裡說愛國，但當日圓不斷跌，遊日人數不停創新高，日本貨係咁掃，因為大家都知道，假愛國，先有好生活！仲有中國人人都話愛國，但錢走得就走，你睇中國外儲，創四年低呀！
至於馬雲呢，都貫徹體現「假愛國」精神，大家一定要記住佢講過一句，「阿里將成為全球第五大經濟體。」五毛們！馬雲搞分離主義，搞阿里獨立成國，分裂中國人民感情，你哋仲唔出動？！
＊＊＊
好笑嘅係，中港兩地好多人奉馬雲金句為金科玉律。呢個年代，「假」好過「真」；指鹿為馬；強盜變傳道。世界變臭，只有騙徒才吃得香。
若果你，未覺荒謬，被全民談論的瘋子帶著走…
By千頌C@堆填區
#曲線救國嘅嘢你識啲咩呀
