🚫嚴禁劇透🚫粗口自行過濾🚫
🚫免批評外表人身攻擊🚫
[1230隔夜超短劇評][TVB][踩過界II][EP01]
✅ 流暢畫面靚 鐵三角繼續默契爆登
❎ 感情位唔夠力
最怕啲劇集開第二輯又keep唔到第一輯陣味，改咗陣味又突破唔到，但《踩過界II》第1集保持返上一輯嗰種爽快，三個主要演員王浩信、蔡思貝、張振朗繼續好有默契。張振朗保持住Gogo嗰種搞笑，蔡思貝加重咗佢對盲俠嘅花癡式愛慕好鬼正。文申俠喺兩個角色對比之下冇咁好玩，但三個夾埋嘅場口真係好好睇。
講明係「踩過界」，上一輯就用「非正當」手法去查案打官司，今集就加咗秦沛演嘅簡sir入嚟以「傳統」對抗文申俠嘅「踩界」。第1集開宗明義話兩個人睇法唔同，去到今集最尾就已經講明話要師徒對決，好鬼爽。
張曦雯演嘅邵美娜應該係解決簡sir盲俠矛盾嘅關鍵？但希望唔好寫到佢咁正氣。《踩過界》第1輯好睇就係因為個個都為咗實踐自己嘅信念而踩界，啲角色有正常人味先係套劇最好睇嘅地方。Never咁正都係因為佢庭上庭下嗰種反差。
分鏡燈光畫面布局，睇得出用心仲埋真心靚，希望唔好只係得第1集有啲咁靚嘅畫面睇。如果要挑剔嘅，就係法庭個燈光有啲「唔自然」，因為法庭真係世界光咁濟，唔會律師嗰個位特別光。但可以接受嘅。
不過第2輯亦都承繼咗我認為第1輯嘅缺點，就係喺啲感情位有時唔夠力。第1集交代角色布局爽快俐落，如果加返多啲感情戲或者會阻住道戲。但其實修哥同雪妮姐嗰段，仲有楊卓娜打丁子朗嗰段，加埋都有唔少篇幅，依家出到嚟個效果唔夠動容。呢個情況喺第1輯都有出現，唔知第2輯會唔會有改善？
📺 81台 逢周一至五 2130~2230
[演員表] 王浩信 飾 文申俠 / 蔡思貝 飾 趙正妹 / 張振朗 飾 谷一夏 / 張曦雯 飾 邵美娜 / 秦沛 飾 簡紹宏 / 朱千雪 飾 戴天恩 / 胡楓 飾 關偉 / 雪妮 飾 石美芬 / 姜麗文 飾 江寶釵 / 簡淑兒 飾 郭琳 / 張國強 飾 霍定邦 / 黃子恆 飾 華鎮岳 / 李成昌 飾 柯博遠 / 丁子朗 飾 柯宇霖 / 楊卓娜 飾 黎美月 / 鄧卓殷 飾 陳詩涵 / 林景程 飾 馬存智 /
#1230隔夜超短劇評 #無綫 #TVB #踩過界II #林志華 #黃偉強 #馮日進 #鍾若詩 #王浩信 #蔡思貝 #張振朗 #張曦雯 #秦沛 #朱千雪 #胡楓 #雪妮 #姜麗文 #簡淑兒 #張國強 #黃子恆 #李成昌 #丁子朗 #楊卓娜 #鄧卓殷 #林景程
