［如何利用外賣平台漏洞賺錢］其實唔難，你自己開餐廳就得
1. 呢篇可以講係the best thing I read 呢幾個月！必睇。原文呢度：（https://bit.ly/3fYRYUp）
2. TL；DR嘅（＊）：有條友發現送外賣平台有漏洞，不停訂Pizza，坐定定數錢。仲寫文恥笑對方。
3. 首先，其實我唔係好知咁利用漏洞搵錢，「道唔道德」（＊＊）。但講返正題，話說篇文嘅作者，有個朋友，開Pizza舖．呢位朋友從來都唔送外賣，只做堂食同自取（記住呢點！），因為想專心做好堂食，怕煩，同埋唔想同Domin’s之類嘅巨頭競爭。
4. 但結果，佢發現有人投訴佢餐廳送嘅外賣。凍晒啦，送錯嘢啦，之類。但佢明明冇送外賣！
5. 咩回事？咁當然係有人「幫佢」送外賣。咩人？就係外賣平台，今次嘅主角，Door Dash．
6. 咪住先！明明間餐廳話冇送外賣喎！個朋友完全冇聽過Door Dash，亦冇同佢地傾過簽過任何合作。
7. 呢個就係Door Dash搞笑/仆街/痴線嘅地方啦！佢送外賣，係唔使你同意的！甚至餐廳係唔知情（例如呢個故事）！但被列咗上去名單！
8. 咁都得？實際上，就係你上網去叫外賣，Door Dash就會幫你去買，然後送去你門口！理論上，好似冇話唔得？我去大家樂買個飯盒，我可以再賣畀人啫，你大家樂理得我丫！我買咗就係我嘅。好似唔犯法？
9. 當然，Door Dash就製造問題啦。佢地冇UBEREAT（定Deliveroo？）果種保溫袋（汾按：咁都好意思出嚟做生意）。送到去凍晒啦，啲客會媽叉，仲會上網寫衰間餐廳，而間餐廳嘅員工就成日收到電話，不停要解釋。
10. 但仲有一個更大嘅問題：價錢。
11. 頭先講，你其實可以點人落去幫你買外賣，例如大家樂唔送，你又唔想落街嘅。你咪畀一舊水叫秘書，買四十蚊飯盒，有剩嘅佢袋。只要你夠有錢秘書又夠窮，可行的。
12. 但Door Dash嘅「創意」係：個Pizza明明24蚊，但佢只收個客16蚊！
13. 咁你計下條數，知道玩乜了，有冇令你諗起邊啲公司呢？就係個客畀16蚊，但Door Dash真係走去用24蚊去餐廳買。嗰8蚊？Door Dash自己貼出嚟。仲有佢嘅步兵車手之類。另外留意，因為佢根本冇直接同餐廳合作，甚至餐廳唔知情或反對，所以佢地冇其他收入—不過個步兵／車手就有貼士嘅
14. 咁撚戇鳩都得？得，其實你睇清啲，好多咩Start up 都係咁玩法。燒錢爭市場份額嘛，然後cap水講故事：拿就快我就一統天下，啲消費者又慣晒，到時我加價佢地就任我搶，哈哈哈。（但作者亦都不排除，似乎係Door Dash打錯價錢，因為佢只係偷餐廳個餐單，唔會同餐廳對數，嘻）
15. 然後，做金融，邪惡嘅作者就諗到絶世發財好橋：頂你，咁我餐廳，自己叫返自己嘅Pizza咪得咯！我定價24蚊賣出街嘅嘢，自己16蚊買得返喎！減返成本，咪有賺咯！
16. 實務上，就只係需要自己柯打自己啲Pizza，畀16蚊出去，然後你就會收到24蚊！減埋啲成本，都仲有賺少少！同埋仲有免費餐！可以分畀員工或者自己食。
17. 餐廳朋友覺得，冇咁著數嘅，人地Door Dash矽谷奇才喎，70億美金估值喎！點會咁Q低能呀。但金融作者真係醒，知道呢個世界沒有最鳩只有更鳩，覺得試下冇壞，同埋佢好清楚，Door Dash燒嘅係人地嘅錢（一年前先籌咗四億美金），又唔係班友自己入肉，有乜所謂。
18. 第一次，試住十個先。得咗！用另一朋友地址電話，落完單，真係有條傻仔嚟畀錢然後送去。一個淨執8蚊美金（同埋另一朋友有免費晚飯）。好啦，但其實有成本的。整pizza要錢嘛，7蚊美金成本一個。減埋之後，一個先凈執1蚊美金（同埋另一朋友有免費晚飯）。咁其實唔多化算，時間都係錢嘛。
19. 但金融作者話，至少證明係work嘅。看官，睇到呢度，你會點玩？
20. 正常人玩法，咪整幾百個，幾千個，用多啲地址！金融作者話分分鐘呢個業務大過開餐廳本業
21. 但金融作者更加邪惡，佢諗到條絶招：我整個齋餅底pizza咪得！乜料都冇，得麵粉！近乎零成本！反正個客係自己之嘛！唔會投訴（汾按：其實我覺得佢可以塞份報紙入去，仲平，但前題係外賣仔唔會打開偷食或加料）
22. 故事大約去到呢度，作者當然冇不停咁玩，但都玩咗幾次，完全冇畀人發現
22.5 Bloomberg 嘅 Matt Levine （https://bloom.bg/3cSk41K）仲絶，話不如幾間餐廳，猜波咁玩，你買佢 佢買我 我買返你咁三角短傳。然後直頭收買埋個司機：叫佢唔使送啦，畀幾舊水佢去叫雞算。
23. 佢其實作者想講：Door Dash成個 business model都戇居的！佢甚至認為，成個送外賣平台行業都係都戇居的！根本就人人都燒錢。What For？呢啲就多得之前幾年，錢多人傻，個個信孫正義式UBER式嘅燒錢搶市場份額。以為有一日一統天下消費者習以為常你就可以提價。
24. 作者話，如果資本主義係追求利潤，咁呢堆咁嘅「生意」真係發神經。平台蝕錢，餐廳就覺得被擺上枱仲帶嚟一堆麻煩，客就食到媽媽聲，步兵車手就被剝削（有冇睇Sorry We Missed You？你估個個係林保怡開UBER然後返屋企搞周家怡咩。至少林保怡冇去送牛脷酥然後返去搞）。What For？
25. 我地睇睇，Grubhub 急恰，一季3.6億生意，蝕緊3000萬。Door Dash仲勁，9億生意，蝕4億半。UBEREAT，號稱係UBER 最賺錢嘅部份（請恥笑）：7億幾生意，蝕4億6。
26. 送外賣係咪冇得做？當然唔係。記唔記得最初講，點解呢間餐廳唔做送外賣？就係唔想同Domino’s Pizza 爭。Domino’s Pizza做得極成功：公司同Google 同一年IPO，而股價表現係遠勝Google，死未？有機會寫多篇。
27. 作者就認為，似乎第三方外賣平台根本唔work，至少而家呢啲方法一定錯，但佢地並唔係檢討執笠再進化，而係不停有人燒錢玩落去，絶非任何人之福
28. 不過，最後一講，第三方外賣平台，係咪一定唔得呢？至少，在中國好似得。就係美團（3690）。吾友高天佑寫過文（https://bit.ly/3cPm3Uu），非常精彩。可能真係中國國情不同。
29. 至於Doordash，呢種收客18蚊自己畀24蚊去餐廳買仲貼埋車手步兵嘅玩法。其實等於一間之前我成日提嘅公司：Movie Pass．完全係挑戰大家常識。Movie Pass 靜俏俏地執咗了。
30. 想睇我第一次寫Movie Pass，呢度（https://bit.ly/2zRrlA2）。最近一次，兼且有齊七篇嘅link，呢度（https://bit.ly/3bIPNRn）
31. 應該會寫第八篇，最後一篇。因為爆煲了。
（＊）我發現呢類TL；DR對高收視幾有幫助。高天佑兄寫文亦都必然第一段係sum up，最尾一段再sum 多次。典型嘅Say what you are going to say.—＞say it—＞then say what you have just said。正宗訓練。但明顯我以前係唔行呢套炮二平五式開局的。我鍾意一開波拎住個波走去自己龍門（有冇人睇「足球小旅風」？）
（＊＊）呢個問題有啲深，即係等於啲人利用里數回賺啲漏洞咁（都填得七七八八，怪就怪香港人鍾意周圍唱，一黃咗咪冇戲唱），係咪「唔道德」？定係「你公司自己柒關人乜事」？都好睇你係邊個，對家係邊個。另外，有啲情況有例可尋，例如網購標錯價，一萬蚊電腦標咗一蚊，或者餐牌印錯價錢咁。當然，仲有一般行規。例如我做銀行時，interbank交易，咁就算你真係打字/講錯咗，對家冇可能屈你用77.85（而唔係7.785）食幾億美金嘅，有錄音有打字為證都係咁話。
———————
版務：收費專欄已推出，支持埃汾高質文章。幾舊水睇三個月，一星期三篇
請去呢度訂：bit.ly/2wVXndj
課程編號填: CC01
科咗水後後有Login及Password畀你
逢一三五入去 homebloggerhk.com （見到就睇到《事先張揚》），亦睇得返以前嘅文。一般我都係會黃昏出文嘅。
百家樂玩法 在 真人娛樂|玩遊戲『賺現金ptt』高手親授百家樂三寶打法技巧! 的八卦
線上娛樂城中的博奕遊戲哪種最適合新手玩家?相信許多人會選百家樂，主要是因為打百家玩法簡單，只要選擇下注莊家或是閒家就可以了。 ... <看更多>