【越睇越滾】究竟點解我地下一代啲英文搞到咁？
一個英國記者親身去住香港籠屋一個星期嘅報導。當中所講嘅嘢關於籠屋嘅生活慘況，每一個香港人都清楚了解。我睇黎都係一個記者版嘅「窮富翁大作戰」一樣，慘就已經唔需要再多講。只係對英國人多一份獵奇心態，對待籠屋內嘅人和事。
不過，記者文中所講有一樣嘢，令我覺得真係特別傷感，亦好無奈。文中提到一個67歲嘅籠屋住戶，係一個木工，亦同時係一個癮君子。我諗好多香港人都會睇唔起厘類人，但係厘位木工嘅英語水平响記者嘅眼中，比好多香港年青人還要高。究竟今日嘅香港，重有幾國際呢？點解短短時間會變成咁？
//"The 67-year-old is retired, not by choice, from a life as a carpenter. He belongs to a generation educated under the British and many elderly Hong Kongers speak better English than students 50 years their junior."//
香港曾經真係一個國際都會，我唔敢講九成，但係起碼都有六、七成嘅中學畢業生，無論成績幾差都好，只要有需要，都可以簡單咁用英語對答。唔好講好耐，就係睇番自己身邊好似我厘啲中坑或者上一輩嘅老人家，唔需要係精英嗰啲，我相信大家都會好明白我講緊乜。
從前嘅香港，唔好講話名校或者國際學校，一間普通到唔普通嘅英文學校，都可以令一個學生至少都可以駕馭到最基本嘅英文。不過點解到咗今日嘅一個普通中學生，如果唔係讀名校或者學校，英文水平會低到咁嘅地步？
當然，教育政策本身就係一個好大問題。回歸之後，唔知邊堆人話去搞母語教學。之後就轉來轉去，結果就連累咗一代人。要留意嘅係，母語教學嘅成效又唔覺香港人嘅學術水平好過用母語教學嘅日本、韓國、台灣、甚至大陸。
我同意有一樣嘢的確好咗嘅，就係國語嘅水準。不過有乜用，十幾億人都得啦。我唔係講政治，我只係覺得就算以香港嘅國際地位，要全民精通兩文三語係唔多可能，厘啲留番比啲精英做。不過，就攞八、九十年代北上發展嗰啲廠佬為例，其實好多都唔係大學出身，甚至唔少係由低做起。佢地又何嘗唔係講唔三唔四嘅廣東國語上到大陸開廠，而又係用簡簡單單嘅英文接訂單呢？厘啲咪就係國際城市嘅樣板囉，佢地當中好幾多個都係現今拜金香港中產同精英嘅偶像。
其實我認為除咗教育政策錯亂之外，香港人嘅諗法自己都好有問題。唔洗講，儍嘅都知全世界都想去大陸搵錢，鬼佬都要學中文。但係厘個現象係唔到香港人去自豪囉，當外國人都識中文，而大陸人又識英文，咁要香港人做咩呀？自己係乜嘢地位，乜嘢身份，唔該安份啲啦。我唔知幾時，成班親朋戚友重要帶堆啲細路走去學什麼京腔國語。廣東腔咪廣東腔囉，鄧小平講京腔嘅？毛澤東講京腔咩？孫中山講京腔㗎？我真係唔明白香港人百幾年黎，係都鐘意學到主人嘅accent為榮。以前英文又係咁，依家又係咁。不過以前都好啲，起碼英文都係國際語言。
就係厘一代學京腔嘅香港人，唔知個腦諗乜，覺得學好國語先係啱，就連累咗啲年青人，營造咗一個中文為主嘅社會環境。咁香港究竟係唔係國際城市，還是係大陸嘅一個省市？首先廣東話同正體中文就係必須啦，因為係母語，而且亦係一個重要嘅文化。厘兩樣嘅如果拿捏得好，國語點都溝通到啦，七聲學四聲唔係易啲嘅？識正體自然會明簡體，洗鬼咁好咩。當年九十年代唱K，唱台灣國語歌又唔見香港人要學。
之後真係應該學好嘅係英文，好話唔好聽，英文真係國際嘅語言。唔好同我講什麼背靠祖國，未來是中國的世界。我無話唔係，亦都無話係。我只係想講，背靠祖國都可以面晌世界掛。咁食兩邊，從來都係香港或者香港人嘅強項。自己唔去做自己百幾年黎嘅長處，走去同十幾億人爭，要下一代放棄世界市場，我覺得係自己攞黎衰。
#本來香港人就識兩文三語
#就係自己累死自己
#唔好賴晒教育政策
#個社會自己都有責任嘅
#乜背靠祖國就唔可以面對世界咩
**************************
移民係一條數學題
http://bit.ly/2wgKIyP
移民與香港買樓數學題
http://bit.ly/2vHSayM
點樣先可以做英國公民？
http://bit.ly/2vocSVY
**************************
