食完飯收到個Whatsapp：「收到你張Postcard喇，多謝晒！」
其實張Postcard咩都冇寫，得上下款署名，朋友除咗多謝我嘅心意，潛台詞仲多謝我冇寄去佢屋企，而係寄去佢公司，亦因為咁，張Postcard唔方便寫任何私人嘢。
寄去公司地址係佢要求，咁多年嚟都係咁，因為佢阿媽平時會拆開晒佢啲信，更何況Postcard係冇信封。我朋友好唔鍾意咁冇私隱嘅生活，不過嘈咗好多次都冇改善，收斂一排又會故態復萌。
其實佢後生時會激烈反抗，可惜革命從未成功過，不過佢自己嘅性格同價值觀就喺不知不覺間受到好大影響，試過唔止一次介紹好工畀佢，但呢位朋友都唔敢試，寧願繼續留喺一間幾乎零福利嘅公司，逗住一份同通貨膨脹唔掛勾嘅人工，原因係佢阿媽一直潑冷水，以致由細到大都被灌輸一種「好嘢點會輪到你吖，自量下啦！」嘅概念，慢慢地潛移默化，已經入晒骨，佢自己應該都知，但唔想承認。
睇住呢位朋友長大，佢嘅特點就係對自己好冇信心，好多嘢都覺得自己唔掂，性格亦有啲孤僻。
由一個未婚嘅人跳兩級去講點樣教小朋友，可能真係冇說服力，不過我聽過作為父母，盡量唔好做以下幾件事，因為會摧毀下一代，影響佢哋將來嘅性格同埋人生軌跡：
👉成日拎仔女同人哋比較
👉拆佢嘅信，摷佢櫃桶同埋袋
👉仔女做錯事，講完對唔住都唔會正面原諒，態度晦氣
👉KEEP住令仔女覺得自己係屋企嘅負擔同埋負累
👉令仔女覺得自己做乜都唔會成功，亦唔好妄想成功
我自己都中咗上述其中幾樣，例如細細個做錯事之後，講完對唔住從來冇一次係被原諒，所以我大個咗之後唔識點樣去原諒其他人，因為「原諒」呢兩個字，根本冇人示範過畀我睇。我算好早發現到呢個缺陷，所以讀完大學就冇再同屋企人同住，其實咁樣唔代表唔愛佢哋，而係有時愛一個人，應該保持一個適當嘅距離，幸運嘅係，人生中亦有好多人原諒過我，畀我知道乜嘢叫做原諒、點樣做到原諒，邊啲嘢要學識放下同原諒。
呢位朋友同我講過，佢阿婆以前都係咁樣對佢媽咪，所以呢種性格同行為就一直複製落去，呢點我好明白，正如我由細到大「不被原諒」嘅例子，只係自己走過一段咁辛苦同糾結嘅路，實在唔想下一代重蹈覆轍，希望我嘅仔女將來可以好自豪咁同人講：「我父母從未對佢做過上述任何一件事。」呢個世界已經夠亂，唔好令到小朋友嘅成長過程都咁苦澀。
生僻字例子 在 生僻字歌詞注音2023-在Facebook/IG/Youtube上的焦點新聞和 ... 的八卦
生僻字 歌詞注音在2023的熱門內容就在年度社群熱搜話題焦點新聞網. ... 我們就拿前端時間很火的一首《生僻字》來做例子，小編承認，看到歌詞後想回去再讀幾年書了，你來 ... ... <看更多>