有日電話響起～
我：「你好，乜乜診所」
佢：「喂？我好唔舒服呀」
我：「你過唔過到嚟睇醫生啊？」
佢：「我今朝睇咗㗎啦」
我：「食完藥都仲係好唔舒服？你俾你個覆診卡號碼或者身分證號碼我呀～」
佢：「ＸＸＸＸＸ」
我望望排版：「你食完藥都仲有嘔屙呀？」
佢：「係呀，冇停過」
我：「你而家應該食咗兩次係咪？有冇嘔返出嚟呀？我今朝同你講過食咗止嘔藥先，食完半個鐘先食其他藥，你仲有冇嘔呀？」
佢：「我就係知自己會嘔，所以我冇食呀」
我：「咁你冇食藥呀？」
佢：「有呀」
點呀你～一時有，一時冇，之後又話有，你揀定方向未呀？
我：「頭先又話冇食嘅？即係你有食藥呀？如果你嘔返出嚟，見到粒藥完整喺度嘅就再食過啦，真係好唔舒服嘅，睇吓有冇屋企人陪你嚟見多次醫生呀，或者換一換藥俾你呀～」
佢：「我沖咗廁睇唔到有冇藥呀」
我：「睇唔到就當喺胃度溶咗㗎啦～你唔好自己再食啦，隔返４個鐘先再食啦」
佢：「我一擺完入去冇耐就即刻要去廁所啦，都止唔到屙」
我：「擺咩呀？」
佢：「我真係吞唔落，我擺咗入肛門度，好快又屙，都冇效嘅」
止屙藥唔係甘油條....
我：「幾辛苦都好，你都要吞咗粒藥先有效，佢係口服藥...用其他地方食效果係唔顯著，你而家去食咗粒止嘔先，之後再去食止屙，用少少暖水吞咗佢」
唔好同我講嗰個都係口！打到你鼻屎都飛出嚟㗎！
佢：「會唔會冇效㗎又」
我：「點都有效過你錯誤服用」
佢：「好啦，我試吓啦，我覺得啲藥冇咩效就真...」
嘟。
