【突然回憶錄】《我第一份工就係打「金庸群俠傳online」》
有人問我第一份工係咩。
我多數會講《金庸群俠傳online》。
並唔係指我收錢幫人打機，而係我真係打到返工咁。
中二嘅暑假（十幾年前……）
日日較鬧鐘7點去打點，直接零晨兩點先肯收手。
由馬洞打到血洞，馬賊王同恨天都畀我哋打到「絕種」咁濟。
當時學識一個字－「秒」。
「一招基劍都秒佢啦」呢句真係言猶在耳。
而消點亦例牌消到「氣血失調」，繼而啪藥啪到「昏迷」。
唯一保命嘅就係「ALT+F4」。
記得嗰時恆山派出咗個「惡尼姑」，一手「萬花劍法」底下屍體何止萬人，長期紅名，輕功高深莫測。
有次我行走江湖，走到馬洞門外，音樂突變「躂打悟嗯悟嗯悟嗯悟嗯悟嗯伍悟悟嗯嗚」，進入戰鬥畫面！惡尼姑就在眼前。
「哇屌你呀」我首次明白無拿拿畀人打劫嘅感覺！
明知唔夠打，走佬是常識吧？
立刻出絕招「ALT+F4」！
ALT+F4可以用最短時間幫你彈出Game外，係走佬嘅最高心法。
但再次入Game你就好驚驚，因為ALT+F4雖快，但始終有一秒左右delay。究竟係佢把劍快，定我條腿長？
一入Game，冇穿冇爛！Yeah。我振臂高呼！但估唔到一振臂，雙手離開Keyboard！音樂突變「躂打悟嗯悟嗯悟…」又進入戰鬥畫面，惡尼姑竟然係原地埋伏。
佢身法如游龍，一下跳到我面前，眼前避無可避，我拔出龍泉劍，大嗌「繞！指！」未嗌完，對面嘅「萬花劍法」光影特效已經浸沒咗螢幕，我招未出，劍未起，已成一堆白骨！
我的媽呀！幸好我身在武當派，都算人多勢眾，師弟出事，師兄們就出馬，武當七子(7位師兄)話要用「真武七截陣」幫我報仇（要7個人先出到，真係小題大做）。
夕陽西下，馬洞之外，惡尼姑尚在，武當七子策馬趕到，唔使多講，音樂響起「躂打悟嗯悟嗯悟…」
關鍵時刻！！「六師兄下線了」
「WHAT？」
「真武七截陣」得6條友係出唔到的，而「萬花劍法」卻已經手起劍落。
大師兄同四師兄進入「流血」狀態。
二師兄同三師兄見勢色唔對早就ALT+F4。
喺後面食花生嘅我都被殃及，再死一次。
武當七子（加埋我）出事，「門派頻道」立即起哄。
呢個時候大大大師兄「獨孤求敗」(唔好問我點解佢改呢個名但唔入華山派...)決定出手。
一句「人在西夏，而家嚟馬洞。」
未睇完句嘢，獨孤求敗已經現身馬洞。
我嚇一嚇：「咁快嘅你。」
佢答：「用咗神行太保呀嘛。」
「咩輕功嚟㗎？」我問。
「軟件嚟嘅。」佢答。
多言無益，求敗單手挺劍指向惡尼姑！
萬花劍法主攻，變化多端；太極劍偏柔，守中求勝。
我汲取之前教訓，不參戰只觀戰。只見兩人招來招往。求敗兄以一身正宗純陽無極功稍勝一籌，取下惡尼姑嘅項上人頭！！
誰知尼姑身上有「替身娃娃」，未至「光脫脫」復活。求敗大喊一聲「那裡逃」，就用神行太保飛去追殺尼姑。
我凝望大大大大師兄話消失就消失嘅身影，都不禁嘆一句：「神行太保真係一個好軟件呀。」
好。故事講完！
十幾個春夏秋冬之後，我已經做緊嘢，有正職有壓力有計劃但冇咁咗啲人生。
生活之中已冇結交武當七子、Wtsapp Group都唔會有「門派頻道」、唔會遇上萬花劍法，亦都再冇神行太保。
總括嚟講：非常平淡。
有時朋友話不如玩返回憶下，我話「玩下可以」，但我知道點都唔會有當年嘅感覺。
因為只有細細個無牽無掛，先有嗰種投入感。
遊戲冇跟住你長大，而你亦拋棄咗嗰份純真。
而家多咗個戶口、多咗份工作，
好多嘢都注定只能停留，
停留喺永遠回不去嘅過去入面。
Ig:cheungson88
*會慢慢Up嘢上去
無極劍神 在 第1250章神鷹族- 無極劍神 - PTT小說網 的八卦
PTT小說網為你提供無極劍神最新章節，作家火神的作品無極劍神繁體版,更多無極劍神相關小說盡在PTT小說網，看到記得告訴您的朋友哦！ ... <看更多>