臨生日前先收到呢個消息，真係多謝晒。
人在外地出trip，收到編輯電郵通知，
成個副刊專欄將要摺埋，冇得寫了。
話唔唏噓只係呃自己，上年《太陽》成個專欄副刊摺埋，
好彩叫做過到《東方》繼續寫，
冇估到一年唔夠，又要收皮。
紙媒黃昏，係嘅，但係咪要搞到咁嘅田地，
係咪真係就嚟份份報紙無論網上定紙本都再冇專欄睇？
記得細細個聽前輩講，
話副刊專欄係一份報紙嘅風骨靈魂，
時事就係佢嘅面口，
就算一個人面口幾吸引都好，
冇靈魂冇風骨，都冇用。
之但係今時今日，
辦報睇數嘅就只係識得話專欄副刊嘥錢，
完全冇諗過報格同堅持……
記得細細個開始得前輩熱心提攜，
畀機會我寫報章專欄，一寫就十幾年，
而曾經被一位又一位前輩編輯用心守護傳承嘅副刊專欄，
今時今日響呢個城市，全部變成明日黃花，
自己唔覺唔覺竟然成為最後一代專欄作家，
真係既羞愧又無奈。
斷斷續續，咁就十幾年，
個專欄由我大學畢業冇耐開始寫，
靠佢嘅固定收入我先畀到家用還到關窿支持到生活寫到《無城有愛》，
寫到我兩次進出電視台，至親離世，
人生順逆起跌，
各種經歷，都被我改頭換面，
濃縮成一粒粒濃湯寶一樣嘅500字方塊文章，
記錄低我嘅喜怒哀樂，
速寫咗咁多年嚟同我相遇嘅人同事，
大家咁多年嚟鍾意睇嘅《路中拾遺》，《原來我沒有生活》系列，《人生要閃閃亮亮》，《一路走來》同《空轉人生》系列，其實全部都係嚟自呢個小小嘅專欄⋯⋯
雖然成日呻稿費十幾年冇調整，又或者越嚟越多文章因為政治敏感同自我審查畀人彈返轉頭，但我都冇氣餒，改到出到街為止，因為我相信，有人就有燈，有個專欄響度，有啲嘢就算稀釋咗，又或者冇以前咁多人睇到好，多少都可以傳遞出去……
始終寫咗咁多年，點講，都有份深厚嘅感情響度……
冇咗，就好似一間住咗好多年嘅屋，
忽然畀人勒令遷拆咁，
尤其對於我呢啲冇固定工作同收入嘅freelancer 嚟講，
呢個十幾年嘅專欄，
更加好似個船錨咁，
令我身心安穩，
可以每日定時向呢個樹窿傾吐……
冇諗過竟然響生日前2日，就咁話冇就冇⋯⋯
冇計，唯有疊埋心水，
全心做KOL算啦，哈哈。
各位朋友，
我正式宣布，
《路中拾遺》於1月16號開始，
將會變成網上專欄，
每日中午12點響呢度發佈，
希望大家多多支持轉發，
有咩題材想我寫亦可以留言話我知。
舊嘅唔去，新嘅唔嚟，
大了一歲，嚟緊一定會有更好嘅等住自己～
今後我要開飯生活嘅KOL文章，
亦麻煩大家多多支持畀like，
一齊助養瀕臨絕種作家⋯⋯
⋯⋯多謝大家。
#山不轉路轉 #路不轉人轉 #謝幕鞠躬 #祝我生日快樂 #人人有功練
