【有關點解參選區議會】
喺今日既時空宣佈參選，可能有人覺得純粹係為左測試DQ，所以突然先撲出嚟，但其實我由2016年立法會選舉完咗，已經準備落區。
當時，記得身邊既戰友都無乜人信我堅會落區砌，哇過去搞開大運動抗爭國際野，點得閒打點社區事務啊……但唔經唔覺，就已經做左三年時間，坐監前後都繼續做。
呢三年裡面，除左所謂既政治議題宣傳同民主教育，由冷氣機滲水、反對起酒店、社區設施搬遷、城規會抗議、風災後復修、酒樓食物中毒、巴士重組、海傍規劃、街市增加食肆、工廈改建毫宅、見食環/運輸/管理處；去到平安紙講座、法律諮詢、酒廠參觀、足球機比賽、馬術學校旅行、復仇者聯盟電影預購、參觀天文台、寫揮春、參觀消房局、醫保年金講座、漂書。
三年裡面，唔夠膽話自己做得好好，我亦始終唔係一個「全職地區工作者」，但至少證明街頭出身，落區唔係淨係派單張講政治野，真係可以認真跟社區議題同埋處理投訴，搞社區關注組，同居民傾計過節日，同佢地建立關系情誼。
我好想嘗試，努力去證明社運仔落區唔等於只講政治，公眾人物落區唔等於空降，而呢兩點，我相信就算海怡居民政見有幾唔同，甚至海怡應該會有好憎我既警察，都會意識到我落區果陣，絕對唔係一尾只講大政治同埋離地HEA做（即使佢地最後點都唔會投比我係後話）。
無錯啊，收電話簿真係好老土，但睇住居民whatsapp問你越來越多（或者中產區經常會電郵一大段英文過來反映社區意見），慢慢佢地aware到搵黃之鋒，唔只係講下場抗爭下一步可以做乜野，而係問到底南區驗眼服務點樣申請，嗰種距離感慢慢收窄，係幾開心既。
落區砌左好一段時間，嘗試追貼保皇黨，令到佢地臨選舉前連續八個星期，每個星期都有入屋單張，某程度上都係有壓力。未來場仗，無論十月中選舉主任比一個乜野結果我，我點都打到11月24日，除左政治外，我詳列既24項區政政綱，亦都希望大家可以留意下。
各位識左咁多年既戰友，落區打仗好需要大家幫手，有心既朋友如果能夠做義工擺街站，歡迎登記成為義工，助我一臂之力：http://bit.ly/joinus-sh
-----------------------------------------
岩岩搵返立場姐姐2016年9月26日發佈既專訪，當時我喺訪問裡面講既承諾，希望呢幾年嘗試兌現到：
// 那麼之鋒又將如何定位自己呢？他說，其中一樣就係要學吓做區佬。他強調，這並不是說眾志未來就只專注做區務，「但嗰樣係我要學嘅嘢，我要面對。」
眾志創黨後，承受網絡上無盡批評，當中有的是基於路線的攻擊，但亦有一些批評，之鋒記在心裏，其中一項是，要謙卑。
名望的虛妄，之鋒在15歲時就已經看得清楚，一直抗拒外界將自己過度明星化；但面對接踵而至的批評，他反思之後，找到癥結。
「我唔係覺得自己好囂，但確實自視過高。唔好覺得搞完國教同雨傘，公眾就一定會支持你。大家嘅要求會不斷提高，所以要不斷進步。」
「如果我未來要繼續從政、搞運動，我唔能夠只做最多 media coverage的那個人，亦唔可以永遠只講大政治；運動中的其他崗位，我都要克服到。好多人係由最基本做起，但我一跳已經去咗最前，好多應該要識嘅嘢，我唔識，對我嚟講反而係障礙。」
「我不能夠永遠只站在浪尖。其他人成長，係要不斷向上爬；但我，就要學識企後一步。」
今次選舉，對之鋒而言就是這樣的過程，他開始慢慢習慣，也漸漸懂得享受「貼地」，發現同市民傾地區嘢都幾開心。//
https://thestandnews.com/politics/%E5%B0%88%E8%A8%AA-%E9%BB%83%E4%B9%8B%E9%8B%92-%E6%88%91%E7%9A%84%E6%88%90%E9%95%B7-%E5%B0%B1%E6%98%AF%E5%AD%B8%E7%BF%92%E9%80%80%E5%BE%8C/
漂書 在 【#KEYPAD資訊】智能漂書機- 一沓紙 - YouTube 的八卦
KEYPAD資訊】智能 漂書 機- 一沓紙 YouTube Channel 傳送門：http://bit.ly/2QycP8H香港近十年一直隱藏一股「 漂書 」文化，在不同小店、咖啡店都會 ... ... <看更多>