【關於六月】
唔經唔覺，自己去六四晚會，已經去到第十年。每當踏入五月下旬，若然嗰年政治氣氛頗差，中共嚴重打壓，都會聽到一個講法，話今年好可能係最後一年可以公開悼念六四，所以呼籲大家一定要去維園。
嗰時聽到呢種說法，心裡面都會覺得有少少唔舒服，靠嚇既動員方式始終唔太妥當。又記得以前聽到「不到維園非好漢」呢種說辭，都覺得幾難頂，始終悼念理論上無分地方，唔應該話跟支聯會大台集會先叫唯一正途。
諗返轉頭，去唔去維園、愛國定唔愛國、建唔建設民主中國，都係近呢四、五年，傳媒、政壇同埋大專學界，經常會聚焦討論；轉眼間，二零二零年既香港，應該終於係久遺既一年，公共領域再無發酵呢類討論。
原因好簡單，因為香港已經去到一個境地，係連六四都再無合法維園集會；上年自己喺荔枝角收押所裡面，聽住電台報導新聞，於監倉靜默悼念既時候，都估唔到二零一九年，好可能已經係香港最後一場獲批既燭光晚會。
---------------------
癲到連六四晚會都想冚檔，疫情當然只係藉口（連零三年沙士爆發後都有集會），大家都心知呢個係中共對於一整年時代革命既反撲；而香港有史以來第一年，維園再無燭光星海，國際社會都看在眼內。
呢幾日，不論美、加、歐盟各國，都相繼表態話香港人有公開悼念六四既權利，明顯對西方國家來講，若論及政治自由，香港同中國大陸最大既差別，就係香港人可以合法悼念六四，維園燭光就係最好既憑證。
我唔知道，今晚維園淨返幾多燭光，抑或只有黑警進駐，甚至會唔會有有催淚彈；但可以肯定既係，「如果香港都唔再能夠悼念六四，咁同中國大陸有咩分別？」將會成為各國元首評論香港問題既重要定調同埋切入點。
---------------------
但縱使時移勢易，兼且形勢絕唔樂觀，我覺得經歷一整年既時代革命，香港人係好真實咁樣成長左，當我地再沉澱、再回望、再悼念六四，同八九既香港人，以致當年北京學生，有既理解同共嗚，比起過往都截然不同。
「悼念死難學生」，係過往每年六四，無論參與任何團體舉辦既集會，都必定會有既一環，但無論參與悼念儀式參與左幾多次，我估就算去到上年既六四，大家都無想像過，有一日香港人要悼念香港人。
梁凌杰、盧曉欣、鄔幸恩、麥小姐、范遠聰、郭先生、何小姐、陳彥霖、周梓樂……仲有更多被失蹤既每一位。佢地既犧牲同抉擇，讓到嚟到今年，仍然於鐵窗外擁有自由既我地，對於八九死難學生，更多一份沉重既呼應。
參與維園晚會，舉起燭光一齊嗌「追究屠城責任」，可能好多人都有呢個經歷，而血洗天安門既畫面，大家都睇過；不過，又有邊個估到，中大、理大攻防戰，會令香港人對血腥鎮壓、屠城鎮壓，嚟得咁近距離。
不論國際傳媒形容大學保衛戰為「天安門屠城2.0」，以致二號橋炮火連天既每個畫面，仲有更多更多，包括被喻為最接近全民勇武一夜既十一月十八日；同樣對抗中共強權，都將香港抗爭同昔日八九，扣成另一種既連結。
---------------------
從三十一年前既五大綱領，到反送中既五大訴求，當中錯綜複雜既語境脈絡，當然差天同地；但無論上一代，聲援學運既香港人，定呢一代仍未在囚既手足義士，兩者於唔同時空下，又何嘗唔係覺得，自己都係倖存者。
所以話，梁繼平真係講得好岩，「真正連結香港人嘅，在語言、價值之外，係痛苦」，即使理解六四既框架，六年前、四年前，以致上年定當下，都唔再一樣，但人與人之間共同體既構成，往往都係令我地變得更堅毅。
去到呢刻，我都唔想好矯情咁講乜野「燭光縱滅，人心仍在」，即使呢刻都確實好難預測，幾個鐘後既維園會發生乜野事，但我都好想同大家一齊，喺銅鑼灣一齊，嘗試點起燭光，宣示我地不屈於強權之下。
隔左呢十二個月，再聽藍奕邦 Pong Nan既《六月》「別 恨自己生於這悲情世代」，來得更加到肉，只希望大家撐住，共勉之。
我也想 今生不再哭泣 樣樣事都不怕
也許先要把最殘酷視作笑話
淚亦變成飛花 人們無需驚訝
再多悲壯亦能笑一笑吧 唯願我從此不再害怕
---------------------
Credit to 謝曬皮 TSE SAI PEI the incapable
https://www.facebook.com/tsesaipei/photos/a.135262153287542/1581931121953964/
