戰地記者精神
嗱嗱嗱，唔好心邪，戰地記者精神，聽到乜，就寫乜：
收銀姐姐：「莊生我要 ..... 個籃。」
又係收銀：「莊生，做乜咁蠢，唔使攞哂啲南瓜上嚟過機，攞一個，數吓幾多隻咪得囉，咁鬼蠢。」
執貨妹妹：「先生，有無帶袋。」
師奶嬸嬸：「哥哥仔，啲腸腍哂，幫我換啲硬嘅。」
又係師奶：「靚仔哥哥，你拎咗我包衞生巾去邊？」
老公公：「喂，你有無籃用。」
老婆婆：「四眼哥哥，幾好禮貌，乖仔。」
清潔女工：「莊生，今日好靚仔喎。」
靚靚OL：「唔好影到我買喼，我告緊病假。」
莊生：「好囉，生意跌咗，大家開心啲，出年條數容易做咗。」
大佬呀，我哋係人嚟㗎，人係會攰㗎，如果要我哋木口木面，如果規定我哋扮哂專業煞有介事，如果唔畀我哋一路做一路笑，不如殺咗我哋喇。為咗長期保持笑容，你笑吓我，我笑吓你，做嘢輕輕鬆鬆，耐不耐發吓噏風，做五日當做五粒鐘。
奉勸所有高高在上、作威作福嘅腦細，有錢唔係大哂，想人同你搏，有時要隻眼開隻眼閉，有時緊，有時鬆，有時直頭要消失得無形無踪，扮吓路人甲，當乜都睇唔到，等人自由發揮，生意成績肯定好過事事過問、樣樣阻頭阻勢。
做嘢越識得輕鬆，越可以長期保持作戰狀態，越有機會突圍而出。你哋睇吓我幾咁輕鬆。
記於沙田店戰場
清潔女工 在 影評《黑幫清潔婦/清潔工》深入地探究社會階級等級和道德的 ... 的相關結果
Fox電視台的《黑幫清潔婦/清潔工/The Cleaning Lady》是一部犯罪驚悚劇，這部影集改編自2017年阿根廷影集《La Chica Que Limpia》。 ... <看更多>