「主題公園慳錢及慳時間攻略」
以下所講嘅嘢真係我賢良淑德嘅老婆先可以諗到。持香港身分證嘅人生日正日去某個主題樂園係免費，相信好多人都知。不過生日好少何會一個人去，即係話總有人係需要買正價門票，係咪？一家三口，老婆生日免費，清義哥三歲以下又免費，換句話說，只有我張入場券要俾錢，係咪？老婆英明，唔去到現場買（$438），選擇上網格價幫襯旅行社買一張入場券咁大把，盛惠＄350就有一張成人入場券，三個人去！話時話生日優惠除咗有免費入場券，亦會送消費餐廳/小食亭折扣coupon。
最利害嘅係，老婆連泊車都幫我諗埋。恐怕去到冇車位，佢預早一日上官網登記，比＄50留位費，當日入閘再支付餘額咁就萬無一失啦！我只可以講，我老婆真係立定決心今年生日一定要喺某主題樂園渡過。是咪要比掌聲Charis MAMA先？
「2-4歲幼兒主題樂園攻略」
幼兒體力欠奉，大部份機動遊戲佢哋都玩唔到，所以真係唔需要花全日喺主題樂園玩。我建議反而集中火力用四至五個鐘時間應該可以做晒佢哋想做嘅嘢。我地今次選擇午飯後，大概兩點半到達，預計19:30前離開。
我會先坐纜車到對面山，點解要咁做？因為睇完以下展館都應該用咗兩個鐘，已經四，五點，呢個時候嘅纜車站係超級多人，一定要排好長嘅隊。好，言歸正傳，離開纜車後先順序參觀水母館，再去鯊魚館，如有興趣睇海洋劇場就去海洋劇場。跟住步行上返去參觀企鵝館，海獅海豹海狗海象海馬館，雪狐館等。睇完再坐海洋列車過返對面進攻兒童樂園區同海洋館 。
相信好多家長都會想同小朋友玩迴旋木馬，而最多人排嘅迴旋木馬就係纜車站旁舊香港街裏面嘅海洋生物迴旋木馬（起碼排20分鐘）。但係你知唔知成個樂園其實係有兩個迴旋木馬？第二個迴旋木馬就係位於兒童區，呢個迴旋木馬係真正嘅迴旋木馬，唔係舊香港街嘅海洋生物迴旋木馬，近乎無人排隊，而且速度比較快，規矩冇嗰邊咁多，大人可以企喺木馬隔離扶着小朋友，少D規矩自然會快啲啟動。
玩完迴旋木馬當然可以同佢地無限次坐小火車，17:00後基本上兒童區係唔使排隊，所以坐完一圈都唔需要再起身可以繼續坐落去。之後坐埋個兒童飛天甲蟲，跟手過隔離坐兒童摩天輪欣賞日落又得。離開兒童區時大家都差唔多筋疲力盡，呢個時候太陽已經下山，沿途會經過幻彩噴水池，有興趣就望兩嘢，嘩兩聲，跟住就要去最終極嘅展館－海洋館。既然展館係喺室內，所以可以等到傍晚先去參觀，咁就一定唔使排隊。平日連排隊同參觀可能要搞成個鐘多啲，傍晚時分去全程20分鐘參觀完，走得！
之前叫你比掌聲我老婆，宜家我寫咗咁多嘢，就算你冇興趣去你都要比個Like我啦係咪呀？
（歡迎轉載給打算去主題公園的朋友們）
Instagram: hokeeyau
#何基佑有感而發 #清義哥 #暑假
海獅海豹海狗海象 在 [問卦] 海豹海獅海狗海象海牛怎麼分啊- 看板Gossiping - 批踢踢 ... 的八卦