一位女士帶一個婆婆嚟到診所～
女士：「姑娘，佢（婆婆）有冇得打流感針？政府嗰隻？」
我：「可以啊，想打三價定四價？」
女士：「係咪四價勁啲？」
我：「四價多咗一種乙型流感嘅保護～」
女士：「咁四價啦」
我望一望婆婆，再問女士：「婆婆今日有冇啲乜嘢唔舒服呀？」
女士：「冇呀」
婆婆開口：「我咳呀⋯」
女士個頭極速擰轉炳婆婆：「咳你條命！咳完啦你！」
再極速擰返個頭嚟同我講：「唔好理佢呀！同佢打呀！」
俾人拮嗰個係佢，好難唔理佢㗎喎⋯
我：「我同佢登記咗先，入去見醫生先，到時再睇吓可唔可以打啦～」
女士：「你照同佢打得㗎啦！」
我：「唔駛急，見咗醫生先啦～」
女士發爛：「佢條命我話事呀！佢個仔要我湊佢老母，我要佢死就死生就生！你即刻同佢打呀！我冇咁多時間湊佢老母呀！」
我：「小姐你冷靜啲先，如果婆婆病緊，醫生都唔會同佢打流感針嘅，要好返先可以打⋯」
女士：「佢有咁易死就唔好喺度獻世！」
哇⋯⋯雖然我唔知你受咗乜委屈，但也用不著講岀口吧？不過真係一家唔知一家事，而我只知有病唔打得針⋯
婆婆：「我條命硬過你，你即管嚟啦，我唔怕你㗎！姑娘！你打啦！」
女士：「聽到啦？佢話要打㗎！」
我覺得今日個時辰八字唔多夾，不如擇日再挑機？
我：「你哋兩個都冷靜啲⋯俾醫生睇咗先可以知打唔打得㗎～」
女士：「你俾枝針我！」
我：「我哋不如登記咗先呀？你俾婆婆身分證我呀？」
女士喝婆婆：「身分證呀！」
婆婆左摷摷右摷摷：「冇帶喎」
女士望住我：「冇喎」
我聳聳肩：「噢，咁今日唔駛拗打唔打得，政府資助必須有身分證做登記。」
婆婆舉起食指：「我都話我命硬！」
Goodbye，你哋兩個返屋企隻揪啦！
#獨特的感情 #獨特的溝通方法
流感針 在 年年打的流感疫苗你不知道的1件事（2022.9.30）| 健康1+1 · 直播 的八卦
除免疫成分之外， 流感 疫苗中其他成分對人體會不會有影響？ Time Code:01:50 流感 病毒有哪幾個款式？歷史上曾經發生過幾次大流行呢？07:43 流感 疫苗是 ... ... <看更多>