【龔成問答信箱】（Q14981-Q15000）
Q14981：
龔生您好，香港樓市影響大嗎？
其實我10月買左，打算出租，比左一半樓價，300頭左右，每個月供7000,市區細盤200呎多少少，依家都擔心緊
我都覺得長遠唔會大跌，但要捱到呢關，我都知道好多人等機會。但都成日問自己，係咪太衝動做錯決定
龔成老師：
無人可以準確預測到樓價，當你投資物業放租，你最關心的，不是之後的樓價，你應該關心「之後的租金」「按揭利率走勢」。
我相信中短期香港樓會弱，但長遠仍是正面。中短期租金可能有少少受壓，但不會太大，相信不用太擔心。
反而你現時儲多少少現金，萬一有段時間無租客，你都供得到。只要你堅守「供得起原則」，其實無野好驚。唔需要成日睇住個樓市，無意思的。
------------------------------------------------
Q14982：
你好！我今年19歲，正在修讀大學課程。近兩個月開始留意你的專頁，都很認同你的投資方法。現在沒有多少本錢，所以都是打算邊做兼職儲蓄邊學習投資知識。
不過母親大人就都有投資的習慣，主要想幫問一下1061 億勝生物科技和1665檳傑科達是算是優質的股票嗎？兩者值得入手嗎？
龔成老師：
你這個年齡，是財富增值的黃金時期，要好好把握，盡你一切的力量去儲蓄、投資、學投資知識。
億勝生物科技（1061）業務不差的，近年的增長理想，可以長線持有，但業務有少少風險，因此不建議持貨太多。
檳傑科達（1665）業務不過不失，生意都有一定的增長，但規模不算大，加上上市年期不算耐，有少少風險，雖然可以持有，但就不建議持貨太多。
這兩股不算差，但都有風險，以你母親的年齡階段來說，未必是最好的選擇，因為佢這階段應該是集中投資平穩增長型的股，例如盈富（2800）、金沙（1928）、恆基（0012）、港鐵（0066）這類。
而上述的兩股，雖然都可投資，但都不宜大注。
------------------------------------------------
Q14983：
老師，有幾個問題請教：
1:想問，我煤氣之前買太多，已經佔左4成組合，但又唔想賣，又想買地產股，恒地因為持有煤氣所以買唔到，領展又成日落唔到合理價，應該點做好?
2:想問，假設投資組合內，有1隻優質股同只佔組合幾%，係合理價內 ，如果因受短期因素影響跌超過15%，其實係唔係都應該要加注?
3:老師，我用上堂既市盈估值，用左黎計3號，計左出黎就係合理價14·5至18·26，想問有冇計錯到
龔成老師：
1）你應該分階段賣出煤氣（0003），同時轉為其他優質股，只要你分階段進入，唔需要太著重「股價」，應該著重「財富的配置」。你最好調整至2成。
2）可以。
但要分析當中的優質度有無變，如果質素弱左，再跌都不要入！
另外，要分析平貴，以決定入貨與否，以及力度，因為跌15%都可以仍貴的。
3）要調低翻D，我相信你只集中用佢自身過往的數據，而無太多作行業的估值比較。
------------------------------------------------
Q14984：
你好，龔成老師
我今年29歲，月入只有HK$14,000, 而儲蓄有2萬元。
每月最多可儲5千至6千。
請問我應該儲多些資金才開始投資或是用月供形式購買股票呢？
如果以月供形式，你會推薦什麼組合？
另外，盈富基金 中銀香港 福壽園 適合我嗎？
如果每月月供3千至4千，五年後資產大約可增值多少？
感謝
龔成老師：
你現時現金不多，因此$2萬不要動用。
若果你這刻零股票，我會建議你這刻開始月供，每月供$4000，同時逼自己每月儲$2000現金。
你這個年齡，是財富增值的黃金時期，要好好把握，盡你一切的力量去儲蓄、投資、學投資知識。
你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股只能小注。
你可以考慮月供盈富（2800）$2000、中銀（2388）$1000、福壽園（1448）$1000（不過福壽園唔知有無得做月供）。
總之，唔好理中短期股價，長期進行。
我假設你每月投資$6000，$4000月供，$2000等機會再入，保持5年，假設回報率10%（股息要再投資），預期滾存到$44萬。
另外，以你的年齡，財富仍有一定的增值力，建議你多增加投資知識，在選股、企業估值、投資時機上落功夫，對你長遠財富有好大影響。
現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。
------------------------------------------------
Q14985：
龔成老師您好，我現在是一名學生，主修計量金融，很多同學會daytrade或炒期指期貨。
但自從追縱你專頁及買了你的書看後，我深受你的價值投資法影響。「買股票是長遠投資一間公司的內在價值及前景」這句說話現在時刻提醒我不要投機。
我今年20歲，手上有7萬現金，每月補習月入4000-7000，每月消費不多。希望向老師請教這幾年的投資方向。
目前只持有[email protected]中信證券，請問現價算是合理區嗎？另外應在甚麼價位賣出才合理？謝謝老師！
另外也想請教老師，若然想入手港華燃氣、中國楓葉教育、比亞迪、中芯國際、中國國航、華虹半導體等股價在甚麼算是合理區？
謝謝老師建議！
龔成老師：
你地的同學，這年齡，daytrade或炒期指期貨，好正常，因為我當年18歲，一開始都是短炒，炒足幾年輸足幾年，之後先認識巴菲特這人。
一個全球投資最賺錢的人，大大聲同大家講，短炒根本無錢賺，我先識醒！
不過，後生仔中意短炒，正常的，只是有人識醒，有人唔識醒。
你這刻已行在正確的路，記住，唔好比你D同學影響左。
中信証券（6030）質素不差，但又未算好好，業務較為波動，如不大注可以。現價合理，可持有，如果大市進入狂熱期，相信這類股會有一定升幅，到時是賣出時機。
至於其他股，較大部分都在合理區中，而比亞迪（1211）及楓葉教育（1317）中國國航（0753）算是在合理區中下部。
------------------------------------------------
Q14986：
龔成老師，follow左你fb一段日子，謝謝您，啟發了我
令我開始反思自己的生活
我30頭，月入$2萬七左右，三年前買左儲蓄保險，月供$8000，仲有兩年先供完...
除左月供呢份保險，每個月都要供一d醫療表現，大概2-3千，扣除飯錢、交通，唔知點解都係冇錢剩
睇左你個fb，我開始慢慢買d股票，例如：匯豐2手、盈富基金1手、友邦1手
想請教您
我感覺自己呢個年紀完全冇資產、覺得好失敗
嚟緊都唔知可以點做（我冇物業）
龔成老師：
其實，你都有財富的，只是分配上，可以做得更好。
我地理財，要做好攻守兼備，你買了儲蓄保險，都是做到了守的部分，餘下應集中力量去進攻。不過，你30歲，其實應該投入更多資金去進攻，而你在防守的比例就太多。
當供完儲蓄保險後，應該投入更多資金在股票等較為進攻的類別。
你現時開始儲股票，已行出了很好的一步。
現時持有的，都是有質素的股，不過，匯豐（0005）增長力不強，只是收息股，就你的年齡來說，不宜持有太多，因為你應該投資較有增長力的股票。
建議你加大投入一些優質，平穩增長股，例如盈富（2800）、銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）等，你可以了解下這些股票，然後從中選股。
另外，以你的年齡，財富仍有一定的增值力，強烈建議你多增加投資知識，在選股、企業估值、投資時機上落功夫，對你長遠財富有好大影響。
現時大市處合理區，可以一邊投資一邊留現金（要留現金，等機會），現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。
------------------------------------------------
Q14987：
Hello Sir, 你好! 我最近開始 睇你嘅書學習股票知識, 希望可以增值財富, 近排股市開始下跌, 所以希望部署一下 買股票嘅組合, 想請教下你嘅意見
以下呢幾隻股票都係我比較有興趣的, 雅生活服務(3319), 海底撈 (6862), 中芯國際 (981), 小米集團(1810), 比亞迪 (1211).
觀察咗一段時間, 雅生活同埋海底撈其實長時間都處於一個比較高嘅位置, 嗰架都非常穩陣, 大市下跌時, 呢兩隻股票 個跌幅 都不太大, 我想問下呢兩隻股票其實喺邊一個價位先算合理可以買入?
此外, 亦都想問下中芯國際, 小米同比亞迪 要跌到去邊一個價位入先比較合理?
如果我手上嘅可投資資金 係23萬, 以上幾隻股票有邊啲
係 應該優先買?
謝謝你嘅寶貴分享!
龔成老師：
你上述的股票，都是有質素的，不少都是潛力股。不如我講幾隻投資值博率較高的。
雅生活服務（3319）前景正面，我睇好的，不過股價經常處略貴水平，要買入不易，你可以等機會，落多少少可分注投資。
比亞迪（1211），現價在合理區中下部，分注投資可以，但你預中短期較一般，長期先有表現。
小米（1810），中短期雖然仍未太好，但長遠來說，這企業在產品發展，前景等都不差，現價合理，有投資價值。
現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。
------------------------------------------------
Q14988：
你好，我想問下1883和1113邊隻為較好收息股,1113派息比率不斷下降
而1883則相反,是否1113為較好選擇?
龔成老師：
當我地分析收息股時，要睇佢過往多年的派息情況，以及本身的業務，因為企業有生意，先有能力持續派息，因此業務分析都是好重要的。
中信國際電訊（1883）在業務穩定上不差，過往的派息都穩定，以收息股來說，這股可以。
但要留意，如果你想投資收息股，最好建立一個組合，而不是只投資一隻，這樣可以減少風險。
------------------------------------------------
Q14989：
老師，我都想試吓月供盈富基金，請問以你所知，邊間銀行個收費同雜費係最低？
我而家有d產品，免我手續費，好似著數好多。
龔成老師：
月供盈富（2800）是一個很好的方法，特別對於無太多時間選股及分析企業的人（我相信適合你的），你可以去匯豐或南洋商業銀行問下，這兩間之前做優惠，手續費算是較平，唔知而家仲有無，你可以問下先。
其實，如果每月金額在$5000以下，若每月收費$50（即是1%，就會視為費用佔比較多。如果在0.5%
以下，我地仍會接受的，因為始終有些成本不能慳。
同埋要留意翻，唔好太過貪小平宜，我地投資，該項目的優質度，長遠增長力，投資策略是最重要的，入場費，手續費，這只是次要。
一定要以長期的財富增長，大局，為最重要的考慮因素。
------------------------------------------------
Q14990：
成哥，由我2018年第一次睇到你既文章月供港燈到宜家
好快就感受到投資既重要性
亦都對投資慢慢產生興趣 開始搵呢方面既知識學習
你真係幫到我 希望你新一年可以完成到你既目標
另外想問下178現價進入左便宜區域味 值博率高嗎？
龔成老師：
記住，月供是長期性的，你保持進行就得。你多D睇書增加知識，同時努力堅持自己的目標！
莎莎（0178）反到社會運動及肺炎影響，中短期無論在股價上，以及生意上，都會好弱。考慮到佢業務的影響，我都對佢估值，略有調整。
在長期的業務本質上，佢的質素仍在，但要較長時間先可以回復正常。考慮到各因素，佢現時處合理區中下部，長線投資價值都有，但一定不能大注。
如投資，買入後最好唔好睇中短期股價，耐心持有。
------------------------------------------------
Q14991：
請問匯豐現在入貨是否也適合，因我之前77元曾買入小量。
龔成老師：
匯豐（0005）有質素的，不過賺錢能力比過往年代已減，加上增長力弱左。這股只能視為收息股，唔好對股價有太大期望。
如果你之後的貨，佔你組合比例好少，現價再加注，可以的。但這股不建議佔組合的總比例太多。
------------------------------------------------
Q14992：
啊sir 我諗唔通股票點樣可以享受複利效應。除非是月供股票或定期一手手買入，不斷投放資金落去同一隻股票，否則只有股價升跌賣出賺差價。
但係啲人點解係買入一定嘅股票後放手唔理會都滾存到一大筆錢？
龔成老師：
如果該企業不斷升值，加上派出的現金流理想，就有這個效果。
例如港交所（0388），由不足$5到升現時$200以上，當初投資$10萬，現時已滾存到$400萬，這就是唔賣出都有複息的效果。
而每年派息更有$5以上，即是每年派$10萬，等同每年都派到當初的本金數目。可見，只要投資到一間好強的企業，長線持有，就有這個效果。
------------------------------------------------
Q14993：
老師，嗰日上完你最後嗰堂倍升股班我即刻報咗你進階班 聽完你最後嘅感言我都有身同感受 我同你嗰陣諗法一模一樣所以先咁想作出改變 我都係公屋仔
唔記得你仲記唔記得我係想出國留學嗰位學生 你講得好啱我係買個希望係你度 希望目標可以成功
仲有一個問題就係比亞迪點樣呢款潛力股點計佢合理價？
龔成老師：
其實，你已行在正確的路，我是一個教練的角色，但最終跑的是你自己，你要用最大的努力，去完成你的目標，努力溫書，睇書，睇年報，唔好比自己停止進步！
至於比亞迪（1211），計算估值唔易的，我在進階班會再18種估值模式。通常估潛力股都會有較大的不確定性，往往會有預測的情況，例如預期3年後的財務數據，盈利情況，並以這數作基準去估值。
------------------------------------------------
Q14994：
老師你好：價值投資者深信中短期市況不能預測，巴菲特和彼特林奇一致認為技術指標沒有作用，而我們只能在股票現價比估值低很多時，在一定安全邊際下購買優質股，等待股價上升。
另一方面，市場上亦有所謂的投機者學派。《一個投機者的告白》作者科斯托蘭尼認為股價短期走勢是受制於供需，即股票是在堅定者手上還是在猶疑者手上。
市場的心理和短期走向有一定的預測性，成交量小但指數繼續下跌，代表前景堪慮；相反，成交量小但指數繼續上漲，代表非常有利。
索羅斯甚至認為投資人的信心不只影響股票價格，甚至可能還會真正改變經濟發展。
比如，股票價格因為市場信心改善而上漲，投資人感到更富有，將更願意消費，又進一步帶動許多公司的利潤(即著名的索羅斯反射理論reflexivity)。
泡沬投資法是順勢而行，在泡沬爆破前全身而退，正如索羅斯所說：「我看到一個泡沫正在成形時，我就會迅速進場購買，搧風點火，如此操作是合理作法。」。
雖然科斯托蘭尼和索羅斯不是透過短期買賣走價位的證劵玩家，但他們的學說，是否和價值投資的核心理念相違背?我不是質疑價值投資的正確性，只是想知道老師對此有何看法?謝謝！
龔成老師：
價值投資法的理論，就是買股票時，視為買入企業，以企業基本面作分析，同時計算企業估值，利用平貴作投資策略。
其實你上述提及的科斯托蘭尼及索羅斯，其中一個重要的操作是「順勢」。
這不代表與價值投資法有絕對的矛盾。
當我地投資股票，會選較為有質素的，同時，當企業價值向上，市場上買入的力量會增加，睇好的人會增加。背後反映的，有可能是企業價值的向上，如果價值投資者分析到企業價值向上，其實就是印證到，這段時間的股價向上，有實質的支持。
而科斯托蘭尼及索羅斯所講的順勢，就是跟市場而行，不過，這個市場的向上情緒，終有一日會下跌，點樣可以好準地捉到這個爆破點，這兩位大師都無十分的把握。
因此，價依值投資者如果再配合價值上的分析，就可以較易分析到企業價格與價值偏雜的程度，從而理解到現時泡沫的情況，這就可以更有效進行投資。
------------------------------------------------
Q14995：
你好成哥，我想問中國鐵塔00788同埋京信通信02342，其實呢兩隻股票分別系咩？
因為我見到都系5G,但係如果入一手來計、長遠發展邊一隻股票會好點？
龔成老師：
兩隻都是同5G有關的。
中國鐵塔（0788）係建造這些基站塔，由於5G的接送距離比4G短，因此要起更多的基站塔，而佢在中國市佔率過9成，租比3大電訊公司（而3大電訊公司係佢主要股東）。
因此，當5G發展時，佢正面。不過，資本開支太大，賺錢能力並不是稱好好。故只能視為有增長力的股，不能話必然大升。
至於京信通信（2342）主要從事研究、開發、製造及銷售無線電訊網絡優化系統設備、提供相關工程服務，以及提供電信服務及相關增值服務。
5G的發展，都會對佢有利，但這股規模唔算好大，質素不差，而現時投資價值，算是不過不失。而風險會比中國鐵塔較高。
如果你想穩健D，就投資中國鐵塔。
------------------------------------------------
Q14996：
成兄, 我想問下如果一開頭淨係做D少買賣, 需唔需要有商業登記/銀行戶口?
開銀行戶口如果本身冇業務係咪好難開?
龔成老師：
在香港，經營生意就要有商業登記。當然，這只是理論上，實際上，好多人最初期做生意，都唔理。
做左先，至於在銀行開公司戶口，並不是一件容易的事，要求你提交好多資料的，無業務好難開的。
------------------------------------------------
Q14997：
老師：最近連埋肺炎的情況，我開始聞到市場的恐懼(而我就開始有啲興奮)。
自知選股上冇你咁有經驗，所以想請教下你有冇邊啲你睇到有機會大手入？(我暫時考慮緊莎莎、六福、周大福的零售行業)
龔成老師：
對，別人恐慌時，就是最好的投資機會，但要留意，買入後，中短期可能會再跌，仍會弱，但原則是長線投資，過一段時間後，股價就會有理想表現。
如果你未有選股的經驗，我會建議你集中投資盈富（2800），然後要加上零售股作配置，而唔好只集中零售股。
近年的不利情況，對零售業影響好大，從值博率的角度，這的確是最有值博率的，不過，都不能過太大注。
------------------------------------------------
Q14998：
你好成哥！想請教下你。肺炎肆虐我預期樓價會有所下跌 想問下疫症過後會唔會係好時機入市？主要諗住買樓放租賺被動收入
未買過樓 現有現金~20萬 股票~20萬 月入~30k 可以儲到15k
請問應該買細價樓租比單身/兩公婆 定係按揭多啲買大少少既單位租比家庭租好？ 同埋應唔應該放股票入樓市？不勝感激！
龔成老師：
無人可以準確預測到市況，或捉到底，只可以話，當投資市場面對這類不利因素，在長期計，往往是一個不錯的投資時機。
睇翻2003年沙士，6月尾先正式完，但股市已經在5月見底，而樓市，大約在5-9月見底。要準確捕捉，難，因此要平衡分配資金去運用。
如果你本身無樓，可以把握在接下來的一年，香港經濟轉弱，樓市相信都會向下，這是一個機會，如見到樓市向下，可以考慮投資物業。但相信跌極有限，因為本身的供應仍是不足。
------------------------------------------------
Q14999：
你好,想請問, 我手上有貨, 但是買入價較貴, 雖然是優質股. 這個情形是否可再入平貨?
或是應大市時放出呢D貨, 取回現金才開始個CYCLE? Thanks!!!
龔成老師：
無人知道之後的大市點走，因此，如果是優質股，建議持有，不建議「賣左先，等機會」。
現時大市波動，是一個有危有機的時候，建議你這盡力儲現金，等機會出手，如果大市進一步向下，就是長線投資的機會。當然，你都要睇翻自己的現金情況，如果這刻現金較多，已可分注入，現價較少，就要再大跌先入。
------------------------------------------------
Q15000：
龔成老師，我今年32歲，月入$3萬。(工作性質每月最多可有$2萬佣金，但唔係成日有。)
現有30萬流動資金。每月儲$15000-$30000，視乎每月收入而定。
另外月供股票$6000，港鐵(066)$2000，長江基建(1038)$2000，比亞迪(1211)$2000。
有一手阿里巴巴招股價$176，我諗住長期持有。
依家第一次置業可做9成按揭，我目標一至兩年内可儲到首期買樓。
我應該點樣運用呢30萬流動資金黎投資，令到我可增值手頭上的資金？月供股票需唔需要加大供款？
謝謝老師的建議
龔成老師：
阿里（9988）有質素，可以長線持有。至於月供方面，都是有質素的股票，可以保持進行。
由於你打算在2年內買樓，因此要動用一定的現金，在股票投資上，就不能進取。你應該先留有一定的現金，只能將一半以下的資金作投資。
因為投資股票，要較長時間才能反映企業成長帶來的效果，中短期往往只反映當刻的市況，而我地唔會知你買樓時，當時的市況如何，因此，建議留有一定的現金，只能部分作投資。
現時市況波動，最好是等機會，如果大市大幅向下，就動用現金，如果大市跌得唔夠多，就唔好用。畢最多只是加大月供的金額。
----------------------------------------------
多謝各位提問，若然你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網的，當然，會將發問者的身份，以及有關個人的部分刪去。
另外，由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。
派派股市同學會 在 關於股市同學會又一神人殞落... - 股票板 | Dcard 的八卦
有在使用股市同學會這個APP的人應該都知道最近排行榜上的P大， ... 最後我想說，股市同學會很多神人出現，分好的壞的，好的像是派派、P大等等，真的有 ... ... <看更多>