派息比率超過100的八卦，YOUTUBE和Yahoo名人娛樂都在討論

必瘦站(1830)是去年青冰的愛股，點解係過去式呢，因為今年真係冇沾手過，原因係今年股價好硬凈，冇乜機會低吸，漸漸就變成舊愛，冇乜留意佢的股價郁動，所以上星期佢突然一棍，都係升咗先留意到，昨天公佈業績，即使今天係趕住出門口，都要打幾隻字講吓。

純利增長六成幾，超勁，不過如果拆開上下半年來講，只是持平，即係下半年冇再比上半年再增長，但現價只係十倍PE，真係冇得再挑剔啦。而今次派0.144末期息及0.05特別息，連同中期息一共派了0.339，派息比率係117%，係連續三年派息比率高於100%，2016年係100.07%，2017年係156%，堅呀。

去年已經睇到佢哋有玩港股美股，買了騰訊(0700)及微軟，記憶中騰訊係370蚊左右入手，微軟就唔記得喇，但肯定依家係賺兩成以上啦，好喇今年仲堅，再買埋facebook，Amazon，Google及蘋果，除咗冇Netflix之外，已經係最強的科技股。你可能會話，有錢又唔派息益股東，走去買股票，但佢派息比率超過100%，冇乜得可以再投訴，況且你睇吓佢公佈買股的細節，非常仔細，你見上市公司炒濃股突然發盈警就多，...
See More

【龔成問答信箱】（Q22321-Q22340）

Q22321：

龔Sir，一直猶豫到底買唔買名錶，因為本人做銀行嘅，牌頭對予工作黎講都有一定影響，但名錶都起碼6位數字上落，加上有限量

所以有一定價值，而且可以為我工作帶黎額外嘅收入，算唔算資產一項？

龔成老師︰

如果隻錶本身限量，你相信有升值潛力，其實都可以投資。但由於金額都唔平，你真係資金較充裕，才好考慮。

至於工作方面，一個人穿著，的確會影響客人第一印象，這點我明白。

但相信客人最終選擇你，你的穿戴影響可能只佔好少比重，主要係睇你有無實力，唔好放錯重點。

------------------------------------------------

Q22322：

老師，上緊進階班，想問香港寬頻（1310) 是一隻適合投資的收息股嗎？問題如下：

1.派息比率超過100%,將盈利以外的資金，派發給股東，長遠是否有影響？

2.見企業的資產淨值出現負數及負債比率都十分高，但經營活動現金流量保持正數，仍值得投資作為收息，我廿幾歲？

謝謝

龔成老師︰

1) 香港寬頻（1310）派息比率>40%，股息率>4%，而派息政策穏定，和有一定派息紀錄，因此佢已可定性為收息股。

你見佢好多時派息比率高於100%，甚至近年去到1000%，唔係佢拿左盈利以外的資金去派發，而純粹係"折舊"拖低左個盈利所致。

實際上，佢都只係派緊當年賺的錢，你再仔細睇翻，佢經營現金流，就會明白。

2) 佢流動資產，係少於流動負債，一般情況我地會視為短期還款，可能會有較大壓力，甚至會出問題。

但我地都要考慮埋，企業本身狀況。以一間全年收入近100億企業，現金流都算強勁，短期17億缺口，唔算係好大問題。

當然，佢負債偏高，係會扣少少分，但依然係一隻有投資價值的收息股。

但香港寬頻（1310）就係用來收下息，唔會有太大增長力，以你2X歲年紀，此類股票唔係太適合你。

------------------------------------------------

Q22323：

老師你好，我想請教一下，聯易融9959@19和攜程9961@280有貨，這兩股，屢創新低

應繼續嗎？

龔成老師︰

我地唔好用個股價，去判斷一隻股票的持有價值。我地應該睇翻佢本身質素，有質素就算中短期有波動，你照持有都無問題。

聯易融科技（9959）屬有潛力有風險類別。

佢係一家中國供應鏈金融科技解決方案提供商，佢旗下的雲原生解決方案可優化供應鏈交易的支付週期，實現供應鏈金融全工作流程的數字化。

幫金融機構客戶提供供應鏈金融科技解決方案，提升整個供應鏈金融生態系統中的透明度和連通性。

根據數據，佢處理的供應鏈金融交易金額達人民幣近2000億元，係中國供應鏈金融科技解決方案提供商中排名第一，市場份額約2成。

佢已經連接左供應鏈金融生態系統中幾百間核心企業、金融機構、超過十萬間中小企業。

佢的主要收入模式為基於交易量收取科技解決方案的服務費用。佢的客戶主要包括核心企業及金融機構。服務的大部分核心企業於房地產、能源、建築、醫藥、製造等行業運營，亦為銀行、券商、信託公司理公司等各類金融機構提供服務。

過往生意快速增長，不過現時仍虧損中。

長遠發展力，有，不過估值好難，只可以話，小注投資，長線持有都可，耐心等更大的收成，但預佢中短期可以好波動。

攜程集團（9961）有質素。

佢係全球領先的一站式旅行平台，可提供一套完整的旅行產品、服務及差異化的旅行內容。

用戶可以通過平台進行任何類型的旅行預訂，從目的地內活動、週末短假及短途旅行，到跨境旅遊及商務旅遊。

產品及服務組合涵蓋經濟、高端、定制化及精品產品。集團經營一系列品牌，包括攜程(Ctrip)、去哪兒(Qunar)、Trip.com及天巡(Skyscanner)。

根據報告，以商品交易總額（或 GMV）口徑統計，佢係過去10年內一直為中國最大的在線旅行平台，近年更為全球最大的在線旅行平台。

財務數據方面，收入都有不差的增長，但盈利就比較波動，有時會出現虧損，反映企業仍處於投資期。

這企業有獨特性，長遠有投資價值，但估值難，未能確定這刻的平貴度。只可以話，潛力度是有的，但預期股價都會波動，因此投資要控制注碼。這股宜長線，等企業成長。

這2間企業，都有長線投資價值。若你持貨不多，可以守。但持貨較多的話，建議你沽出部份，去平衡風險。

------------------------------------------------

Q22324：

龔sir，我買咗呢一隻股票10000股，0.411，之後見到佢出咗呢d，我唔係幾明白點操作，請問依家我係應該繼續持有還是沽售？

如果繼續持有的話，是否需要再投入資金？

龔成老師︰

COOL LINK-NEW(8491)主要於新加坡從事食品供應業務，見佢多年虧損，無明顯投資價值。

佢會進行20合1，和合併後二供一。這都係一些典型財技股的做法。

我對這類股票較有保留，建議你沽出會較好。

------------------------------------------------

Q22325：

上嵐用來投資收租如何？

龔成老師︰

屯門上嵐位置上，尚算可以。

但我一直都唔係好建議讀者，買1手新盤，因為好多時都會有溢價，變相買貴左，影響回報。

而且，佢單位主要係26X-29X呎，唔算話好大。勉強算可以容下一個家庭，投資價值不算高。

------------------------------------------------

Q22326：

Sir，我份工作做咗10年，但強積金得28個，係咪太少？

請問有冇咩好建議呢？我18歲開始返工，今年28。

龔成老師︰

多與少，唔係最重點，因為每個人生活水平都唔同。最重要係你這筆資金，是否用得其所。

強積金的配置其實唔複雜，你只要按你的年齡階段，去進行分配就得，年輕時較進取，中年平穩，退休前就保守。基本上你按年齡，慢慢跟這樣比調整就得。

強積金是一個超長線投資，中短期當然會有上落，但就唔需要轉來轉去。只要按你的年齡，長線配置就得。我自踏入社會工作後，一直都是100%恆指，無變過。

除了強積金，你要繼續保持你月供習慣，去努力增值和增力投資相關知識，相信長線你財富一定會有理想增長。

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

------------------------------------------------

Q22327：

Hi 龔成老師，很久沒有聯絡了。我現在有個煩惱，因為在＄2.54買入了8083， 現在跌了50％， 自己之前看到業績每年增長不錯，可是高位入了。

看不懂它私有化，分拆科技上市的新聞對業績有什麼影響，8083的投入金額佔整體倉位大約5％，現在虧損一半，是否應該守下去呢? 定忍痛止損。

希望你能夠抽空回覆，謝謝

我另外也持有5％的2013， ＄17買的

现在持有40000股8083

龔成老師︰

簡單講，中國有贊（8083）首先佢會分派有贊科技，然後以主板模式上市，原有的就是以私有化模式，退市。

佢以每1股的8083，換取約0.05股新派的有贊科技，另外仲會加少少現金，約每股$0.13。

中國有贊（8083）業務變化較大，整體有好大的不確定性。加上佢過往在核數師報告出現過「保留意見」，盤數可能有古怪，雖然已是數年前的事，但都會扣分。

佢不是無潛力，但風險較高。你現時持股佔組合，唔算好多，可以守，但你要明白佢有一定風險。

微盟集團（2013）集團主要在中國從事提供軟件即服務產品及營銷服務。

佢的產品分為「商業雲」解決方案、「營銷雲」解決方案及「銷售雲」解決方案三類。

「商業雲」可助商戶開設線上業務並助彼等提升顧客參與度、轉化率、收益及忠誠度。「營銷雲」通過大數據分析能力及ＡＩ技術為商戶提供智能營銷服務。

這些都是將來發展的大趨勢，從業務潛力上，的確是有的，見佢財務數據的增長都強勁。但此股都係較大不確定性，但你持股唔算多，可以守住先，再觀察。

------------------------------------------------

Q22328：

老師，請教你，我現金有三成，其他股票。唔需要應急錢。港交所佔資產組合4%，但已嫌了75%，那應該放嗎？感謝解答

龔成老師︰

港交所(0388)有長線投資價值，而且佢組你組合好少，我建議長線持有較好。

但如果你係個好保守架投資者，你可以用"升一倍，沽一半"架策略，去先收入成本，都係可以。

------------------------------------------------

Q22329：

Hello 龔sir。有時情想了解一下，我現在手上有 03988 中國銀行，共18000股，均價為 3.0944 。

仲有現金為約5萬左右，請問現時部署，應該先每月持續購入？還是先截倉，尋找其他更有潛力的股票？

龔成老師︰

我地投資會運用「先增值，後現金流」作方法，初期應投資較多增值類資產，較後期則應投資較多保守類項目。所以係分配投資項目時，會因應番你的人生階段。

如果你年青，可以「平穩增值股」+「潛力股」。中年人士，可以較集中翻係"平穏增長股"。當你已近退休之年，就應集中在「收息股」，去創造平穏現金流。你可以睇翻自已年紀，去作出配置。

因此，我地先要睇翻，到底中行(3988)適唔適合你年紀。中行(3988)有質素，但只是收息股，如果你係中年至退休人士，這股都可以。若你係偏年青，由於佢增長力不高，就不太適宜持有太多。

另外，我地唔好成個組合，只集中係1,2隻股票身上。

最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能高於組合30%，同一股不能高於組合15%。要平衡，建立後長期持有，不是買賣賺差價，而是成為你財富組合一部分。

所以，你唔應該再加注在中行(3988)，反而要慢慢加入其他合適股票，去令個組合風險更分散。

以下是一些不同類型優質股，你可以因應自已年紀，去作出配置。

潛力股︰中生(1177)、福壽園(1448)、安碩恒生科技(3067)、港交所(0388)、阿里（9988）、騰訊（0700）、舜宇光學（2382）、小米（1810）、ＧＸ中國電車基金（2845）、三星FANG ETF（2814）

平穏增值股︰指數基金、港鐵（0066）、金沙（1928）、煤氣(0003)、恆基（0012）、中銀香港（2388）、長建（1038）、粵海(0270)、領展(0823)、希慎(0014)、太古地產(1972)

收息股︰港燈（2638）、香港電訊（6823）、工行（1398）、恆生（0011）、置富（0778）、陽光（0435）、深高速（0548)。收息基金(3110)，都可以。

------------------------------------------------

Q22330：

龔老師，你好，我有睇開你嘅fb同埋有睇你寫嘅書，我今年24歲，收入大約～15000多啲，家用$5000，草$7000，目前持有以下股票︰

小米（$26，2200股）
中國移動（$53.125，4000股）
中芯國際（$28.15，5000股）
碧桂園（$8.66，10000股）
金蝶國際（$27.1 ，1000股）

仲有少量美股
Coinbase ($350 ,2股）
Futu ($188.5 ,20股）
TSM ($132.45, 2股）

我從上年4月開始投資，但都係一名新手，想請問我港股既投資組合有啲咩需要注意，因為我本身好睇好芯片股，覺得芯片既需求不斷增加，

近期見到港股差唔多每日都跌，波動較大，以及初時玩美股，咁岩都係買左高位 我依家仲等緊返家鄉。

另外想問如果報讀你既課程要幾多錢？

龔成老師︰

首先你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

所以，你不論持有那個市場的股票，持有與否，最重要都係睇企業質素。中短期波動係正常事，再優質股票，都有出現。只要好優質股，你一直持有就可以。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你24歲計，應先做好財富增值。中國移動(0941)係收息股，增長力唔會明顯，不建議你持有太多。你最好沽部份，換至其他有增長力股票。

碧桂園(2007)，業務都算不差，但負債高，風險略高，雖然都可持有，但不宜持有太多。

Coinbase Global Inc（COIN）雖然有獨特性，但真正的長期價值有多少，根本好難估。

佢係加密經濟技術供應商，佢從平臺上的交易中產生大量交易費用的凈收入，以區域來講，佢大部分收入來自美國，其次是世界其他地區。

要分析佢的價值，就要睇翻虛擬貨幣長遠發展。以本質來說，虛擬貨幣是人為創造出來的，絕對不是「資產」，有沒有真正的價值，如何定義真正的價值，未知，亦令COIN的價值，變成未知數。

長遠的價值，取決於「有多少人用」，如果長遠好多人用，的確可能有高價值。但如果無人用虛擬貨幣，這公司都無價值。

因為分析長遠是否好多人用，是非常困難，因此，當中存有相當的風險，當然，潛力同樣都大。

除左以上3隻，想你特別留意之外。其他持股，都係有質素，你長線持有就可以。

另外，若你睇好芯片業發展，中芯國際（0981）和TSM都係合適選擇。質素上，TSM會較高。

而中芯國際（0981）業務有增長力，質素係有，但未到最高質素。

睇翻佢過往的業務情況，雖然仍每年的生意都有增長，但盈利就有波動，反映雖然大環境的市場在增長中，但佢的成本與售價，就未必在佢掌握的範圍，最後造成盈利波動的結果。

雖然這股都有前景，但以佢面對的情況，但好難將佢定義為最優質的股票。

加上此股近年升了不少，就算有所回落都唔算平，加上之前熱炒過，股價大上大落，投資要注意風險。

你現時無投資知識和經驗，對企業估值，點去定平貴未必會太了解。所以你先利用月供模式，去做增值，可以減低買貴貨風險，對你而言會較理想。

現在你每月先用5成儲蓄，即$3500做月供。其餘先儲起，用一邊月供一邊儲蓄的策略。

由於「潛力股」係需要一定經驗和有一定波動性，你經驗較淺，可以先小注，大約佔組合3成左右。到你有一定經驗，你可以投資到約5成比重。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

------------------------------------------------

Q22331：

我是一個45歲女士有一個仔11歲。我早前買咗隻708 $69買一直好似撞鬼咁都唔放過直到$13放咗放咗

現有十萬現金想問老師買什麼股票可以有得增值

龔成老師︰

其實恒大汽車（0708）都唔算全無投資價值，只係風險偏高，佢資金投入的確強，大力發展新能源車，但這些仍未有賣產品真正的實力，長遠能帶動多少收入，未知。

由於仍有好多未知數，而股價已經大升左好多（比半年前），因此，這刻要自己衡量風險。

可能佢真的有潛力，但連基本的銷售銷售都未有，我地作為投資者，就好難分析，只可以話佢股價會大上大落。

當佢一有較不利消息，好易就會好似現在咁，出現大跌。這類股票唔係不能投資，但只能好小注，去平衡佢個不確定性風險。

以你45歲，可以選擇一些「平穩增值股」+「潛力股」作投資目標，並以「平穩增值股」作為主力。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

現時大市只是合理區，你現有10萬資金可以先投入一半，以分注形式入貨。餘下一半就等大市出現一定程度的下跌，才大力度掃貨，然後長線投資。

------------------------------------------------

Q22332：

龔成老師你好，最近睇咗你幾本書。本人33歲 ，已婚有兩個小朋友 同先生收入加埋有四萬。家庭開支都需要二萬五

之前同屋企人住，打算嚟緊下年自己租樓住，租金大約一萬蚊

而家手持280-300萬現金，睇過而家嘅樓價 如果喺新界區買入一個400至500尺嘅單位要600萬，如果供樓嘅話就會 $16000-$18000，如果咁樣供樓嘅話就會儲唔到錢

我希望你用呢300萬，4-5年後 希望達至500萬有冇可能？

買入600-700萬樓，想有500呎，到時俾首期 400萬再做按掲200幾萬，無咁吃力。預留100萬現金，for小朋友讀野或不時之需。

請問老師

1）由於樓價不斷上升 有機會係呢四至五年期間投資股票 未必追得切樓價既上升，定係應該而家及早買樓 ？

買個500萬以下單位算，但因為有兩個小朋友 ，如果俾晒首期，就無現金流。

2）希望回報大點，如組合以下股票會增較理想

9988
1810
1177
另外留80 萬買入電燈作收息

老師，應該買入邊啲增長較快？同時亦會月供2800，或一些潛力股

3） 如果到3-4年後，現金少過200 萬，都仍然希望買入一個細單位作收租。因為想買樓 所以股票想5年後取反出後 或留20%長線投資。

謝謝老師百忙抽空

龔成老師︰

1) 其實投資任何項目，都係會有不確定性，無人知5年後，優質股增幅會否跑嬴樓市。但從投資角度，現時租金回報率不高，優質股值博率會較好。

另外，我地投資會講求平衡性，如果你買樓後就資金盡用，不能投資其他資產(如優質股)。這樣你財富組合，就會太集中係物業類，唔係咁理想。

因此，你先用優質股去增值，5年後再去置業，相信會係較穏當的做法。

2) 這5年，你可以用一些有質素的增長股，去做增值。你所講的3隻股票，都係適合。但佢地都係潛力股，風險會較高。如果全數只投資這類股票，會令你組合的不確定性風險太大。

建議你用「平穏增長股」 + 「潛力股」作組合，去創造一個增值平台。港燈(2638)只係收息股，增長力唔高，唔建議你投資。

現在你每月先用5成儲蓄做月供。其餘先儲起，用一邊月供一邊儲蓄的策略。

平穏增長股︰指數基金、金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)

或潛力股︰中生(1177)、福壽園(1448)、小米(1810)、安碩恒生科技(3067)、港交所(0388)、舜宇光學（2382）、阿里（9988）、騰訊（0700）、ＧＸ中國電車基金（2845）、三星FANG ETF（2814）。

大市現處於合理水平，那300萬現金(扣除等同半年開支的應急錢後)，你可以先用一半，以"分注"形式慢慢入貨。餘下一半和每月儲蓄，就等大跌市機會出現，才大力度掃貨，並長線投資。

3) 我假設投資回報有10%（連股息再投資），你每月投資$5000 + 280萬現金，5年後大約會增值至490萬，故這樣安排相信很大機會達至你的財務目標。

但若果到時金額，跟你目標物業，都尚有一定距離。你可以先買入一個細單位，再用餘下股票增值，之後才細屋換大屋。

但緊記，買樓同時要留有一定優質股，去保持增值，以維持財富組合平衡性，這才算得上係理想。

最後要提醒翻，如果你的投資股票能力不強，成續不好，投資知識不高，你有可能現時買樓，好過你將資金投資股票。

因為上述的策略，建基於你能將股票增值，而增長是大過物業增長的。但如果你過往投資經常虧損，投資股票只會得不償失，那麼，將資金直接投資物業，可能更好。

------------------------------------------------

Q22333：

老師，我是去年入股市開始投資的，現在處於虧損，我怕自己的情緒會影響判斷，所以很希望老師能夠幫助解答我的問題，讓我可以逼自己理性決定。

1.成實外教育。前期教育新規出台，現時股價已下跌一半，不知道是不是該股的基本面已經改變，還應該繼續保留該股嗎？

2.聯易融。因為騰訊的加持，上市的時候其實就有抽，後面下跌的時候毫不猶豫就買了，知直到今天停牌，讓我開始反省自己思維的簡單。想請教老師如何看待這隻?

另外也想問問老師對新股的態度是如何的?會選擇抽新股嗎還是寧願等有些數據做過分析後再買?

謝謝！祝生活愉快

龔成老師︰

1) 成實外教育（1565）主要透過結構性合約，於中國從事民辦教育服務。佢係四川經營十多所學校，提供學前教育至十二年級及高等教育服務。

佢的學校除提供必修英語課程外，也為具興趣的學生提供第二外語班，包括德語、法語及日語等。

睇翻過往的財務數據，其實不差的，業務基本上穩定，盈利都不算差，不過增長力就唔算強。

但近年中央對教育板塊，推出不少政策，都係不利於民辦教育發展。雖然暫時影響未算好大，但不確定性風險增加唔少。

若你持貨佔組合比重不多，可以守。但若佔較多，建議沽出部份，去平衡風險。

2) 有大企業加持，可以係加分位，但絕對唔可以因為這個單一因素，但決定這企業是否值得投資。

聯易融科技（9959）屬有潛力有風險類別。

佢係一家中國供應鏈金融科技解決方案提供商，佢旗下的雲原生解決方案可優化供應鏈交易的支付週期，實現供應鏈金融全工作流程的數字化。

幫金融機構客戶提供供應鏈金融科技解決方案，提升整個供應鏈金融生態系統中的透明度和連通性。

根據數據，佢處理的供應鏈金融交易金額達人民幣近2000億元，係中國供應鏈金融科技解決方案提供商中排名第一，市場份額約2成。

佢已經連接左供應鏈金融生態系統中幾百間核心企業、金融機構、超過十萬間中小企業。

佢的主要收入模式為基於交易量收取科技解決方案的服務費用。佢的客戶主要包括核心企業及金融機構。服務的大部分核心企業於房地產、能源、建築、醫藥、製造等行業運營，亦為銀行、券商、信託公司理公司等各類金融機構提供服務。

過往生意快速增長，不過現時仍虧損中。

長遠發展力係有，不過估值好難，只可以話，小注投資，長線持有都可，耐心等更大的收成，但預佢中短期可以好波動。

至於停牌，係屬於短暫性質，純粹係有重要內幕消息要公布。

其實我一直都唔係好建議抽新股，因為好多時新股定價都係較貴。而且，提供的數據參考性都較弱，好難做個較準估值。

好多時佢真正表現，要過1,2年先可以睇到，故有一定風險。

當然，唔係話新股全部唔好抽。但由於有一定不確定性，同埋多數唔平。因此，較理想做法係最多先小注，再觀察。

------------------------------------------------

Q22334：

阿sir 嗰陣時你每月存1萬咁你月供股幾多錢？

龔成老師：

我無做月供股票的，月供股票是適合初階者，如果有企業估值的能力，就不一定要月供。

我當時的策略，是每月儲$1萬，然後儲到一定數量後，以及當該股處便宜價，或合理區較下部，就會出手。

------------------------------------------------

Q22335：

老師，我依家儲多啲本 想問一個白癡問題 「分注」嘅定義 係每月自訂月供amount 定 一手一手滿滿入貨？

龔成老師：

分注有好多方法的，原理即是分開去買入，我地投資，先要定計劃，例如你某隻股，你想佔股票組合比例多少，如$10萬。

分注就是將$10萬，分開多次去入，例如每次$2萬，分5次。或以月供，每月$3000進行，長期進行，直至到你適合的比例。

------------------------------------------------

Q22336：

中國移動呢隻點？如果而家呢個價買唔買得過？

龔成老師︰

中移動（0941）不是無質素的，5G雖然對佢有正面影響，不過，中國政府希望相關費用不會太貴，令資訊流通更好便利，所以，對佢的賺錢能力方面，未必能帶來突破性的增長。

你可視佢為收息股，增長力不算強，這股有長線投資價值。現價合理。

若你係中年至退休人士，或者你投資取態好保守，這股係可以考慮。相反，你係偏年青的話，由於佢增長力不高，作為投資目標，就唔係咁適合。

------------------------------------------------

Q22337：

龔成老師:本人現持有以下股票，因有些已經跌了很多，也不太肯定這些企業現時是否還有發展的空間，希望龔Sir可以幫我分析一下究竟我應該止蝕，繼續持有還是再增持，謝謝。

136恆騰網絡8000股 平均買入價12.42
520呷哺呷哺1000股 買入價21.86
2158醫渡科技100股 買入價26.3

由我認識股票開始就一直follow龔成老師你，我其實很認同龔Sir你講的買股票應該係睇企業的質素，睇佢長遠發展潛力。但自從我罹癌之後，

因沒有工作收入，只有每月有三千幾政府補貼，所以希望由股票短炒賺一兩千補貼生活開支，但就一時衝動就買左以上股票，希望龔Sir可以賜教，

我呢種情況其實係咪唔應該買股票，謝謝

龔成老師︰

我地投資股票，其實等同投資一間企業。希望透過其自然增長，以達至財富增值的目的。

所以，我地投資一定係長線，你比時間企業去成長，而唔係短期炒賣，去賺差價。

你唔好預投資增值，可以解決你短期財務問題。你現時持有投票，都有長線投資價值，但佢地風險和波動性都較高，不宜持有太多。

以你現時情況，應優先留有一定較多現金，去支援你日常生活和醫療開支。

若佢地佔你資產比重較高，你可以沽出部份去套現一些現金，以備不時之需。若只係佔好少部份，你照持有都可以，但預係長線持有，才會有較理想回報。

恆騰網絡（0136）及醫渡科技（2158）都是較高風險的股，反映你在選股出問題，如果持貨多，宜減。

至於呷哺呷哺（0520），其實有質素的，但之前貴，現時才合理翻D，這股都有得守的。

------------------------------------------------

Q22338：

老師你好，我受到你既影響就已經成功買樓，不過因為工作關係就冇得租出去，咁其實層樓係咪都仲係支出而不是財富增值？

同埋依家要賣大部分股票去裝修，唔知吉利 (@16入) 同比亞迪 係咪都應該依家賣？有啲其實低過買入價 (e.g 領展，港鐵) 係咪都賣咗先？

(諗緊埋咗蝕緊嘅先定係吉利或者比亞迪呢啲潛力嘅先）

補充返，我27歲，買咗樓後計哂所有支出(including fund investment) 有~3000 淨。。。所以要build 返現有股票portfolio 要啲時間

吉利同比亞迪都各只有一手

龔成老師︰

雖然你買樓後，要供樓，好似只係得支出，無收入。但我地做財富增值，唔好用現金角度去諗一陣事，要用資產角度去做出發點。

你每月供樓還款，當中一部份係還本金，其實就係幫你累積緊資產。

只要你個物業係有質素，長遠有升值潛力，就算無租金收入(即係現金流)，都一樣符合財富增值的目的。

當然，你物業有利息支出，這都是一個負現金流狀態，如果可以的話，將物業出租始終是最好的做法。

至於沽邊隻股票先，你可以睇先睇質素，再睇平貴，去作決定。若這些股票都係優質，你就睇下邊隻現價較貴，現價值博率較低，就可以優先沽出。

現時比亞迪(1211)和吉利(0175)，相對領展(0823)、港鐵(0066)這類舊經濟股為貴，值博率會較低，可以優先沽出。

在買完樓之後，財富組合會偏向左物業類個邊。因此，你將來再有新資金，要優先投入優質股類，令財富組合回復平衡。

------------------------------------------------

Q22339：

1373可以月供嗎？

有條件做下一隻1830？

注碼可以15%？

龔成老師︰

國際家居零售（1373）係一間於香港、新加坡、馬來西亞西部、中國內地及澳門均擁有業務的家品零售連鎖商，提供超過2萬款家品。

集團的店舖及特許店以「日本城」等品牌經營。

過往財務數據不差，生意盈利保持增長，有長線投資的價值。現價合理區中上部，仍是可投資的。

但佢業務和產品性質，跟完美醫療（1830）不同，較難出現同樣突破性增長。

而且，你睇翻這住多年，佢派息比率都偏高，可見管理層發展野心都唔大，你預此股長線係平穏增長型。此股都有質素，佔組合10%左右會較理想。

------------------------------------------------

Q22340：

Sir，如果目標是五年後有平穩的增長力，每月買入三至四手3067，持續進行五年，是否可行？

龔成老師︰

安碩恒生科技(3067)雖然係一籃子優質科技股，有別於投資單一企業，會較具分散風險能力。

但由於佢始終只係集中在科技股，難免會造成行業過度集中的風險。

我一般會建議讀者，個別企業和行業，不要佔組合15%和30%以上，銀行業更加不要高於組合20%，以避免出現過度集中性風險問題。

而且，3067本身都有一定波動性，如果你目標係平穏增長，盈富(2800)會係較合適選股。

由於你都係偏年青，未到30歲。你可以考慮用5成盈富(2800) + 5成安碩恒生科技(3067)作為組合，這個配置的增長潛力和風險度，相信會較適合你年紀。

另外，想提多你一件事。現時大市只在合理區，資金唔好盡用。最好留有部份，等大跌市出現時，可以用來掃平貨。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q13901-Q13920）

Q13901：

老師，我是股票班學生，想問你覺得遠東發展好嗎？

覺得管理層策劃幾好，利用經濟週期收購5同國家有潛力地段，避免同大型發展商在香港競爭，而且有停車場作現金流同有潛力作換地，最近再同澳洲賭業龍頭一齊發展賭業。

但係佢從2014年開始不停降低物業重估利率，對比長實和恒基利率偏低，雖然每年佔比收益不算很多，但累計至2018年應該令eps加左5少，還每年公報自己對酒店重估價值，想老師比d意見。

還有想老師比d意見分析地產股時有咩地方要特別注意。

龔成老師：

遠東發展（0035）本質不錯的，各業務的生意不錯，同時都有賺錢能力。

但如果你記得我上堂講過，佢不斷調低估值時所用的折現率，咁樣會令到物業估值增加左。我地明白這點，就會對佢盤數有所調整，咁樣就得。

因此，分析市賬率及賬面值，作用就比較少，反而分析佢真正賺錢的盈利，會比較好，這要扣除每年的物業重估數字先得。

另一個指標就是睇派息，佢現時的股息率不差的，有5%、6%，而企業要有真正的現金流，才可以持續派息，這部分沒有水份的，因此反映佢有真正的賺錢能力。

這股有投資價值，但佢規模不大，投資金額不宜太多。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13902：

老師，我係你學生，點解地產股既pe就算扣左物業估重，點解都好似咁低咁既

龔成老師：

其實分析地產股，唔單單用盈利去計算，即是市盈率只是其中一個衡量點。

因為地產的地，都有一定的價值，因此，市場在估值時，會同時考慮這一點。

另外，地產發展商有一個較獨特的地方，就是佢的貨品來源，並不如零售般穩定。你先想想零售企業，營運模式不難理解，不斷的入貨，賣貨，有盈利，投資者不會將貨品穩定子價格等因素，放在第一位。

但如果是地產發展商，佢的貨品首先要有土地，然後再建成物業，而土地是一種有限的資源，市場會同時考慮，佢現時的土地儲備，可以比佢用幾多年？

如果我地用現金流折現法去估值，過往會假設無限大，但如果本身營運有限，無限大未必合適。

同理，當以市盈率去估值時，佢同其他行業的計算就會有少少唔同，所以，你就算見佢較低市盈率，其實是市場上反映一些營運因素。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13903：

1475 日清食品點睇,好似好有潛力
有冇能力做到維他奶既地位呢?

龔成老師︰

日清食品（1475）不差的，都算有質素。佢由日清日本（於東京證券交易所上市）分拆上市，主要於香港及中國內地從事生產及銷售麵條、蒸煮食品、冷凍食品、飲料產品及零食。

而維他奶（0345）除了本身已在香港有一定規模，同時間佢係內地市場有不錯發展，過去幾年都有高速增長，所以市場給予很高估值和期望。

日清本身有牌，同樣主力在香港和中國市場，跟維他奶有幾分相似。但係你睇翻過去2年，日清在香港和內地增長唔算特別快，我相信佢發展有的，但不能預期是高速增長類。

發展潛力唔及維他奶，此股只能視為平穩增值類別，不要對佢潛力有太大期望。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13904：

Hi 龔sir, 請問維他奶345現在到合理價嗎？因為我見佢跌咗好多 現在適合入貨嗎？

龔成老師︰

維他奶國際（0345）是很不錯的優質股，這股在兩年前出的《50優質潛力股》，已推這股為優質股，更有「4分」的小數高評分，可見有一定的優質度。

這股前景正面，但這股比當時推介時，已上升了倍幾。雖然最近有明顯回調，但現價依然處於略略貴的水平。

你可以再等佢回落多10%，讓股價重回合理區，你才開始慢慢分注入貨，咁會比較好。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13905：

龔sir 你好
有少少嘢想請教下你
希望可以阻你少少時間

我有7手恆生
扣埋收息均價係166

請問值得長時間hold住收息嗎？
如果再跌，我應該大概咩位可以再入貨？
唔該

龔成老師︰

恆生（0011）有質素，這股在《50穩健收息股》書中，已定義為一隻很不錯的股，有相當的優質度。

這股可以長線投資，但就會以收息為主，而增長力都有，但就不算好強。現價在合理區較上部，如果你目標是收息，長線持有是可以的。

此股回到$150以下，即股息率達5%時，才投資會較理想。如果要到平宜區，股價起碼要多跌20%至25%。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13906：

你好成Sir,又有事請教:

（1） 近期股號1928金沙:

請問近期中美貿易戰及美國法會通過的香港人權法案等!!
是否會影響中國續牌給美資- 金沙呢? 謝謝

（2） 股號659新創建
早前在16元入咗第一注, 請問現在股價10.68元, 可以再加注嗎?

此股本人是想長期收息及穩健增長的!
感謝成Sir!!

龔成老師︰

1） 你提出中美貿易戰及美國法會通過的香港人權法案等因素，對續牌機會的影響，我在課堂上都有講過。因為要較長時間解釋，故好難在這裡三言兩語講到，只能簡單咁講成功機會大。

整體而言，你所講的因素，對金沙影響唔算大，長期投資價值仍在。

2） 新創建集團（0659）有質素的，佢係一間綜合企業，包括7大業務：道路、環境、物流、航空、設施管理、建築及交通、策略性投資。

企業本身已很龐大，增長期望不會太多，過往過價大致穩定，你宜集中在股息多於股價回報。現時股息率已升越5%，已有長線投資價值，開始入第2注無問題。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13907：

老師， 我睇貼你回覆澳門fans 係叫佢哋唔好分咁散因為手續費好多，澳門月供 股票， 同埋金沙我有個顧慮就係 中美貿易戰 我驚中央會搞嗰啲 美資賭場， 會唔會有隱憂， 因為聽聞金沙個老細就係特朗普 嘅大金主。

同埋月供股票如果我急錢用套現 會唔會蝕好多？ 最後感謝你百忙抽空回覆我

龔成老師︰

你提到中美貿易戰因素，相信是想講擔心金沙（1928）能否成功續牌問題，佢的確是美國公司。

賭牌問題，我在課堂上都有講，因為要較長時間解釋，故好難在這裡三言兩語講到，只能簡單咁講，金沙得到賭牌的機會大。

至於澳門人月供股票，這是由於澳門的銀行，月供股票手續費好貴，每隻收，因此每月供太多隻數，手續費成本太高，因此不宜，所以可以集中供盈富（2800），或以隔月的模式去供。

由於月供股票是長期策略，所以最好唔好中途賣出，至於賺蝕數，真的要睇到時市況，只要你月供是優質股，不用太過擔心。

所以，建議你留少少現金，如果有需要就要動用現金，而不希望你賣出股票。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13908：

你好 老師，我本人21歲 讀緊大學 月入大概7 8千到 暫時資金只有萬幾

想開始投資計劃 應該要點開始？

龔成老師︰

你很年輕，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先。做月供股票，每月$4000，額外的資金則儲起。

開始時，你可以簡單月供盈富（2800）$2000，另外再加1隻（每隻$2000）：金沙（1928）、恆基（0012）、中銀（2388）、港鐵（0066）、煤氣（0003）、港交所（388）、長建（1038）、粵海（0270）、領展（823）。

潛力股如比亞迪（1211），中生（1177）或福壽園（1448），則待你有一定知識才加入。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13909：

你好，想問你對1317有咩睇法？

均價$3.6 有5萬股，蝕好多，現階段止蝕又止唔落

呢隻股仲有冇可能上得返$3？
求指教

龔成老師︰

楓葉教育（1317）本質不錯的，但增長力在近年的國策下，的確弱左，長遠仍是正面的。教育股之前熱炒，然後就因政策等風險而冷卻，慢慢由高位回到正常水平。

由於市場擔心企業之後的增長力，令這股的股價較弱。因為佢過往增長快，但在政策風險下，最影響的不是現時的業績，而是之後的發展，令增長力減慢。

以一間平穩增長的企業來計，現價已是合理價，現時可以理解為合理區中下部。如果你持貨唔多，可以持有，但要回到你買入價，相信需要較長時間。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13910：

本人50歲， 有一層價值六百萬嘅樓， 唔需要供款， 手持大概80萬現金， 每月儲蓄不多， 希望十年後 可以有一千萬資產， 然後移民台灣

本人對股票投資十分有興趣， 想以價值投資的方法 增值財富， 請問有什麼好建議? 謝謝龔成老師

另外， 趁現在 樓價 還在高位， 賣樓套現換其他資產 是否 明智嗎?

龔成老師︰

每人都有自住需要，而且你隔離離開香港時間尚有10年，現在賣樓將自已處於沽空樓市狀態唔係咁理想。

如果你想要資金作投資，反而建議你透過加按，用物業套現一筆錢去投資。但你就要明白，這會增加左你的負債，你要考慮你的風險承受能力，同埋不能加按太多。

同時，加按得來的資金，不能進取，只能穩健。

你套現出來的錢和原有80萬現金，可以投放在平穏增長股︰盈富（2800）、金沙（1928）、恆基（0012）、中銀（2388）、港鐵（0066）、煤氣（0003）、港交所（388）、長建（1038）、粵海（0270）、領展（823）、深高速（0548）。

恆指過往年均回報率約10%，假設你套現120萬，加上你原先80萬儲蓄，10年大約可以增值至520萬。扣除當中利息和本金，假設你物業樓價無甚變動，你淨資產估計都可以有逾800萬。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13911：

你好，我是今年剛畢業從事銀行業，亦希望學習你一樣靠投資致富

現時月入18k
户口儲蓄有40k
扣除家用及消費可以儲10k

現時月供1113,823,2800,66各1k
另儲6000現金希望等有機會時投資進入股票市場

想請問月供組合是否適當？
另外希望5年內儲100萬是否可能以及具體做法是怎樣？
希望能解答一下，謝謝

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你年紀計，應以增值為主，所以你現在的組合合適。以你現時每月投入$10000，用過去恆指10%計，5年後約有73萬。

如果你想達至100萬，你可以加入一些增長力強的股票，如潛力股︰比亞迪（1211），中生（1177）或福壽園（1448）。當然風險會相對增加，你要明白這點。

另一個方法就是加大儲蓄，你可以減少開支或待人工慢慢增加後，去加大每月供款。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13912：

你好龔成老師，想問如果我借$180,000，分5年60個月還，每月連本加利還$3,324，算唔算都幾低息？

如果我想將呢筆錢放落好穩陣嘅收息股，如6823香港電訊，賺股息同貸款利息差額，係唔係都諗得過？

如果唔想賺息蝕價，可以咩價位入？仲有冇其他超級派息穩定又比較少賺息蝕價風險嘅股票推介？

我都年輕，仲有冇除左一次過將成筆錢放晒落收息股之外嘅策略去運用呢筆貸款？感謝!

因為我係每隻月還唔係五年後一次過還，即係只要我每個月還得起三千幾就得，唔需要五年後賣股還債，咁我係唔係應該買平穩增值股而唔係收息股呢？請指教

龔成老師︰

這個貸款唔算高息，你可以考慮透過這筆貸款去創造息差收入。如果要買香港電訊（6823），股息有5.5%-6%會較穏陣。其他較穏陣收息股，你可以選港燈（2638）、工行（1398）、匯豐（0005）、置富（0778）、陽光（0435）。

但你實行此計劃時，要留意第一必需有息差優勢、第二會因股價升跌，有出現「賺息蝕價」的情況。

但現時恆指PE約11倍，大致收息股在「不處於平宜區」的價位，較難確保不會「賺息蝕價」。因此在買入以上收息股時，最好分幾注。

在你不用賣股還本和會長線持股之大前題下，買平穩增值股定收息股應視乎翻你年紀。若你年青或中年，買平穏增值股較好，長線增長較好。若你已近退休之年，還是買收息股會較穏當。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13913：

我好欣賞老師的成功。想問2186，6869現在在合理區，還是在平宜區？

龔成老師︰

先多謝你的欣賞!

綠葉製藥（2186）正面的，佢主要銷售腫瘤科、心血管系統以及消化與代謝三個領域的新藥品，基本上都係有市場的，加上佢過往的生意增長唔錯，市場仍發展中，所以長遠不差。

當然，你要預佢業務中短期會有波動，現價合理。

長飛光纖光纜（6869）有質素的，因為全球光纖光纜市場，仍會保持向上，智能手機、互聯網、大數據等科技，成為了行業的推動力。

長飛光纖之前受惠三家國有電訊營運商發展網絡基礎，所以生意不錯，但這亦令這公司出現風險。之前中移動的中標結果，佢排名唔算前，這反映市場競爭有所加劇，佢的賺錢能力有可能略有減弱。

整體上，佢仍有質素，但增長與賺錢能力就有可能略略減，投資價值仍在，但這刻只是合理區較低位置，未到平宜，如投資，只能分注，不要大手。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13914：

龔成老師，關於金沙中國（1928）有野想請教，我見佢派息比率超過100%，證明管理層可能覺得公司已經冇太大既發展可以做。

另外一個原因可能係管理層想降低股東權益以提升ROE，但我睇你本書（50優質潛力股），你就評價金沙既企業潛力仍有4分，請問你係基於乜野原因評定佢既潛力有4分？

另外，如果想買黎長遠收息，美中政治風險會唔會令佢續唔倒個賭牌而唔合適？
Thank you

龔成老師︰

金沙（1928）無論博彩業營運經驗，高穩定性，領先同業的資產規模及行業領導。加上澳門賭牌只有6個，外來競爭者不能參與，這都是金沙的優勢。

你所講的2個解釋，的確有機會係導致一間企業派息率大於100%，但金沙派息大於100%並非因為這2個原因。

2015年（澳門賭業面不景氣年份），金沙在大環境欠佳之下，依然保持派每股$1.99的全年股息（當年派息率為142%），這是由於金沙經營現金流強勁，加上集團對自己的未來有信心，才維持這樣高息率的政策。

另外，由於在會計上，有折舊等的因素，因此你單單睇盈利去分析，是不足夠的，因為佢現金流好強，每年都有足夠的現金流去派息，就算派完息後有資金作出投資。

此股可以視為平穏增值 + 收息之選，長遠持有無問題。
至於賭牌問題，我在課堂上都有講，因為要較長時間解釋，故好難在這裡三言兩語講到，只能簡單咁講成功機會都幾大。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13915：

如果有50萬係手應如何投資?
我有keep住返工 只想儲到錢供樓買車
謝謝

龔成老師：

要睇你的年齡及風險承受能力，決定資產如何配置。

如果是年輕人，則可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先。

你可以考慮盈富（2800）、銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）等，你可以了解下這些股票，然後從中選股。盈富佔比較多。

現時大市處合理區，可以一邊投資一邊留現金，你可以動用$20萬去分注資上述的股，同時，可以利用每月剩下的資金去做月供股票。

餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13916：

Hello, 龔sir, 本人32歲,澳門人,有2個小朋友,與丈夫每月收入約5萬, 隨供樓、家用、雜費等日常開支,每月只能儲蓄1萬左右

我由今年8月份學習投資是從看你fb page及YouTube 片開始,所以都有聽你教導每月供股,現組合如下：

每月供股5000（2800）剩餘5000存現金, 手上有貨（2800）1手@27.5、（66）2手@43.4 、（1177）1手@10.72、（2388）2手@25.3。 （1211）1手@ 37.7。
請問我這個組合有問題嗎？買入價是否處合理水平定偏貴呢？還有需要加入其他優質股令組合更平衡嗎？謝謝回覆

龔成老師︰

以你年紀計，應以平穏增值股和潛力股為主，所以現時組合持股無問題，買入價也合理。

月供方面，除了盈富（2800）外，你可以加入一些潛力股︰比亞迪（1211），中生（1177）或福壽園（1448），去加強增長力。月供分配可以轉成$3000盈富和$2000潛力股一隻。

而儲的$5000，就等大市大跌，才大手買入平穏增值股和潛力股，並長線持有，這安排會對你較好。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13917：

I am 53 and plan to retire at 60. My husband has plan to retire earlier this year. We got the following assets on hand now:

1. Cash = $6 milllion
2. MPF = 1.5m
3. Stocks with divdiend at 5% on average = $1.3m

4. Properties = 1 at $8m and 1 at $7m both still got mortgage （$4.5m and $2m）

5. My husband's pension = $5m

I can save $30k every month and would like to ask if you can share with me your valuable advice on the best allocation and investment of my assets for retirement.
Thanks so much

龔成老師︰

簡單黎講，我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你本人計劃於7年後退休，雖然尚有時間增值，但我地係資產增值上就要保守些。你現時每月儲的3萬元可以作月供股票，一半放在平穏增長股，另一半放在收息股上。到退休之齡，再慢慢將整個組合轉成100%收息股，為自已創造穏定現金流。

平穏增值股︰盈富（2800）、港鐵（0066）、金沙（1928）、煤氣（0003）、恆基（0012）、中銀香港（2388）、長建（1038）、粵海（0270）、港交所（388）、深高速（0548）
收息股︰港燈（2638）、香港電訊（6823）、工行（1398）、匯豐（0005）、置富（0778）、陽光（0435）

另外，你正在收息的$1.3M股票，只要是優質收息股，就可以一直持有。由於接近退休，MPF也要開始慢慢轉為保守型，以減低股價波動對你退休資產的影響。

至於你2個物業，除了自住那一間不用變動，另一間應放租以減少開支。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13918：

龔sir, 你好。想請教你意見，你覺得蒙牛2319 現在的價位可入？最近的利好消息，你的評價點呢？多謝

龔成老師︰

蒙牛乳業（2319）中國領先的乳製品生產商之一，產品，包括液體奶如UHT奶（又稱常溫奶，可置於室溫，若不開封保質期可達半年之久）、乳飲料及酸奶，以及冰淇淋、奶粉及其他乳製品（如奶酪等）。

最近，集團收購澳洲有機嬰幼兒配方奶粉公司Bellamy’s Australia Limited（澳證交：BAL）。Bellamy’s Australia有出口產品至中國、香港，新加坡、新西蘭等地。有機高質嬰兒奶粉一直都深受市場歡迎，增長力也較一般奶粉高。

企業近年都有與國內及外國同業有不同的合作發展，今次集團收購Bellamy’s Australia可以進一步豐富自身高端產業鏈，是一個利好因素。

蒙牛本身品牌不差，加上佢盈利增加理想，這都支持這企業一直估值較高。不過以價格而言，這股現價已到偏貴水平，最多只可月供。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13919：

老師 想請問下 1398 同 136 現價屬合理嗎？

因本人家景清貧 想儲多少少錢先能參加你的班學習 學習

龔成老師︰

工行（1398）是收息股類別，現時股息率約5%，現價合理，有長線投資價值。

恒騰網絡（0136）比較麻煩，因為暫時的業務賺錢能力仍弱，不確定性大，現時唔建議你投資此股。

參與投資課程，當然是一個令自己進步的好方法。除此之外，多閱讀理財類別的工具書，以及多接觸財經新聞，年報。

這些方法都免費，你可以先用這些方法去學習，唔好因無未有足夠錢，就令自已學習停步，加油希望有天在股票班見到你！

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13920：

想問，如果想知12恒地真實市盈，應該點拆條數同點計先岩?

龔成老師︰

因於地產股在損益表中有一項叫"物業估值"，這個並非實質收入，故在計算盈利時應該要扣除。

我地用翻恆地（0012）做例子，2018全年純利311億，而當中包括104億物業估收入。當我地去計PE時所用的純利，應該用311-104=207億。

假設現時股價 $30︰
未扣"物業估值"之PE = 311/30 = 10.37倍
已扣"物業估值"之真實PE = 207/30 = 6.9倍