簡單。惹味咖哩牛𦟌
我平時好喜歡煮咖哩，因為可以食好多餐，又可以帶飯當午餐！今次分享俾大家的咖哩牛𦟌，其實當中主角牛𦟌係可以替換的！我試過用元朗街市的炸蝦丸代替，也試過全部什菜，如薯仔，泰國毛茄，紅洋蔥，黑木耳，甘筍。亦一樣食幾碗飯😋
材料：
1. 巴西金錢𦟌兩條，解凍，放入有薑片，紹酒的滾水汆水。它會縮成一個波咁樣！攞出沖水，洗淨！再放入煲，燒水剛蓋過牛𦟌，水滾後轉中慢火炆大約一個半小時，期間要睇火呀😅用快子插入感覺腍就ok! 取出攤涼後，切成大舊丁塊！備用😋
2. 薯仔: 切大舊備用! 如果有要求又有時間的朋友就跟我用油鹽醃一下，放入氣炸鍋炸200度，炸25分鐘！又或焗爐200度25分鐘至金黃色！目的係不會煮熔及更入味！
3. 紅洋蔥一大個切丁塊。泰國毛茄一包切段。車厘茄少許開半
4. 4粒蒜頭切碎
5. 一罐大椰漿
6. 雞湯一杯半左右，看個人喜歡濃杰程度
7. 主角A1牌咖哩醬！在大雜貨店有售。我在九龍城街市旁買的，馬來西亞出産，味道有保證。約15元一包！
做法: 中慢火蒜蓉起鑊，下洋蔥炒香。再下毛茄及車厘茄累炒。落A1咖哩醬炒香，落薯仔，牛𦟌，上湯，推匀所有材料後落椰漿，煮沸後收慢火炆20分鐘食得😋
