賺就自己叻，蝕就賴人哋
文：薯伯伯
我有時真係服咗啲商家佬，賺錢嘅時候就覺得自己本事，蝕錢嘅時候就周圍賴人地。
你賺緊遊客錢嘅時候，有冇同社會分享過你嘅利益？無。你拉高咗咁多成本，將民生區都變晒遊客專門店，戲院又冇，書局又冇，平民小店又冇，你有冇做過承擔呢？又無。
記得好多年前，我經常去食飯嘅一間泰國餐廳，有日執咗。原因係因為對面有間星巴克，星巴克原來個鋪位要開間大型自由行服裝店，自由行服裝店趕走咗星巴克，星巴克就過對面馬路，趕走了泰國餐廳，原區開鋪。至於嗰間服務咗當區好多年嘅泰國餐廳，就只好執笠。
你哋賺緊遊客錢嘅時候，就算計埋晒林本利所講嘅額外得益（佢聲稱有20%經濟貢獻），但好多人係掹車邊都攞唔到任何好處。唔止無好處，甚至係受到遊客產業所帶嚟嘅負面影響。
我唔明點解啲商家佬，賺錢時就自己袋晒，覺得自己有本事，食中條水，見人哋因遊客產業嘅 negative externalities 受影響就唔聲唔響，當你廢物。
到咗而家，因為六月後生意受少少影響，又怨天，又怨地，明明本身財困多年，而家乘機唔出糧，又或甚執笠，就賴落啲示威者頭上。
你開間專門服務遊客嘅餐廳，你經營一間專門服務遊客嘅錶鋪，你賺到盤滿缽滿嘅時候，無諗過有寒冬嘅一日？無諗過積谷防飢？
點解唔賴中美貿易戰，點解唔賴中國經濟衰退？偏偏就要乜嘢狗屎垃圾都賴晒示威者個頭上面啊？
唔通無權無勢，就要成為代罪羔羊？
最近同一間餐廳嘅東主傾偈，佢話近排生意確實係受到一啲影響，但佢強調，一向又做自由行生意，又做香港人生意，無話偏重邊一邊，唔係因為雞蛋分籃嘅生意策略，只係純粹嘢食整得好味，價錢合理，本身就係乜嘢人都會嚟。
而家自由行少咗，賺少咗自由行嗰部份啫，但賺少又唔係代表拍烏蠅，因為仍然有大批香港人嚟支持同幫襯。
佢重反問，只係遊客先去嘅鋪頭，肯定本身做得唔好啦。
———
照片：攝於銅鑼灣圓形天橋下，日期為 2019 年 7 月 21 日。
———
* 想追看薯伯伯的文章，請設定本 Page 為「搶先看 / See First」*
Instagram 🥑🥭🍉🍌: pazu
新博客：http://pazu.com/blog
另外還要提一提大家：
【新書速報】Pazu 薯伯伯《不正常旅行研究所》（白卷出版社）——從西藏拉薩到神州大地；由亞洲各國至中東地區。非常人般玩轉奇異世界、紀錄精彩故事文化習俗。
2019 年五月上旬，在旺角序言、北角森記、誠品書店及各大書店，均有代售！其中在旺角序言及北角森記，有少量簽名版本。
