【龔成問答信箱】（Q13441-Q13460）
Q13441：
你好, 我買股票進行左半年，第一次6月時買788賺左五千後，7月買入內房股1755&1030，當時未識得睇大市，日日見住股票個價成日跌，心裡面都好驚，成日訓唔著！
有一日早上決定賣哂佢，10點賣完，11點反彈，原來8月15號當日係大市既反彈，我眼白白蝕左10萬又唔敢再買入，點知到10月呢兩隻股暴升左一倍，我好傷心，又好內疚。
我又經歷過買入1573，兩左升左一倍半我都無賣出，結果見住佢暴跌，心裡都好大打擊，我成日會諗返轉頭。
試問可以點樣舒緩呢種心裡障礙
同埋睇下啲咩書再增長投資知識
目前八成資金買左788，不過平均價1.8，目前都係跌到1.6左右，我無諗住放，見佢好有前景，同埋有護城河，放下年會有一定回報。
龔成老師：
你犯了嚴重的錯誤，就是「短炒、貼市、無經過仔細分析」。
好多散戶都會好似你咁樣炒法，買入股票後，好想佢快D升，然後把握機會在短期內賣出，炒差價，成日「睇住個市」，但我過往做左10年銀行、證券行，可以好大膽同你講，輸得最多的，正正是這一類人！
另外，全球投資最賺錢的人，巴菲特，明確表明短炒唔能夠賺錢，一定要長線投資先有得賺的。
我強烈建議你，睇大量書，要睇真正憑投資賺大錢人的書，例如巴菲特、彼德林區等。唔好再睇唔睇錢的人的分析！
你要以買企業的角度去分析，例如中國鐵塔（0788），這企業本質不差，但你要講得出，佢的生意如何？盈利如何？現時的市場如何？發展如何？估值如何？管理層如何？股本回報率如何？
如果你對企業一知半解就買，輸錢是遲早的事。同埋，你要義成長線投資的習慣，買入後，唔好再睇短期股價，唔好日日睇住個市，要分析企業長期發展。
另外，我地投資並不是博，你唔可以成日投資太大注，要建立一個「組合」，平衡風險。
------------------------------------------------
Q13442：
你好老師，我想為父母建立一些股票用作收息，假設50歲開始，60歲退休，應如何處理？
買平穩增長及收息股？
哪些股票適合？感謝
龔成老師︰
你父母隔離退休仲有10年時間，可以把握這段時間進行一些增值，但策略上要比較保守。
現在你可以把資金分2部份，一半投資平穏增值股，另一半投放在收息股。現時市況只在合理區，入貨時必需分注進行。
到你父母將近退休之年，再慢慢將平穏增值股轉為收息股，最終令收息股佔組合比重至100%，讓收息股為你父母創造穏定現金流就可以。
以下股票都適合你父母︰
平穏增值股︰盈富（2800）、港鐵（0066）、金沙（1928）、恆基（0012）、中銀香港（2388）、長建（1038）、粵海（0270）、領展（0823）
收息股︰港燈（2638）、深高速（0548）、香港電訊（6823）、工行（1398）、匯豐（0005）、置富（0778）、陽光（0435）。
------------------------------------------------
Q13443：
老師，想請教以下問題:
買了555萬的樓花，準備付兩成首期。
現在可以做9成按揭，但必須選擇建築期付款，樓價就要612萬，比原先貴了57萬。
在現時低息環境，假如我俾1成首期，把另外一成買收息股，化算嗎？
龔成老師︰
現時利率較低，你將1成首期資金轉去買收息股，從中賺取息差，這方法是可行的，但有2個地方要注意。
一） 你少付1成首期，變相你每月供款會增加。你要睇番對你壓力測試會否出現問題，雖然新政策下，壓力測試不合格依然有機會批出貨款。但會令按保徵收你額外費用，導致你交易成本進一步推高。
二） 將來按息如果上升，會對你息差收入造成影響，你要明白這個風險。
------------------------------------------------
Q13444：
老師，我持有復星（656）, 我對綜合企業情有獨鐘，覺得業務範數多，Cashflow 穩定，但係復星一直唔係好升所以想問：
1. 有咩書可以介紹下係關於估值？
2. 我留意過有啲書係關於估值，但係有啲數據除左比錢之外就拎唔到，有冇啲就估值需要既source 可以介紹？
3. 我應唔應該繼續持有/加注/減持656？
多謝
龔成老師︰
1）《巴菲特- 寫給股東的書》、《證券分析》、我的《股票勝經》都有提給有關選股和估值。而我的投資班，會更完整地教你整個選股和估值模式，到你讀完整個課程後，你已能為自己選股、投資、評估平貴，在投資上已掌握了一定的知識，詳情可以留意我FB。
2） 其實為一隻股票估值，資料基本上都可以在網上找到（各財經網站、HKEX網站），將這些資料整合，再對股票進行估值。
3） 復星國際（0656）的本質不差，可惜業務範疇多，分析不易。當中業務如醫藥、健康產品，會有較大的業務波動，同時在中國經濟轉弱下，中短期會有影響。
近期股東回購，代表股東認為現價不貴，有長線投資的價值。但此股股價較波動，不宜太大注。
------------------------------------------------
Q13445：
你好 龔sir , 你寫的書我都已經睇完了 因為工作關係未有時間上你堂 日後會分配好時間上你堂 希望啊sir 會
希望啊sir 會係星期六開班 我畢業後做左一年野 現在23歲 大約有20萬股票 有
電能實業 平均買入價55.2 @181
恆基地產 平均買入價 45.97 @227
港鐵公司 平均買入價 47.17 @ 393
領展房產基金 平均買入價 92.8 @207
建設銀行 6.6 @1208
中國生物製藥 9.1 @1081
比亞迪股份 51.3 @460
金沙中國有限公司 42.3 @317
盈富基金 28.5 @1227
仲有 中興通訊、長飛、莎莎。
而家月供股票13000 ，恆基地產，港鐵公司，領展房產基金，比亞迪股份，金沙中國有限公司，盈富基金 各2000 ，仲有1000 月供中生制藥。
本身月入扣埋mpf 加埋加班 大約21000, 本身星期日去幫人補習 會再多2000蚊 家用要比5000。 淨係18000 蚊 ，我直接放13000 月供股票會唔會太多。
買入既股票會唔會太散。 我平時一個月洗2000蚊都ok , 同埋依架銀行大約有十萬cash 等入市。本身有份儲蓄保比左啊媽供。
有些問題想問：
1. 我自己想放左中興通訊 同長飛光纖光纜 轉番買其他股票，因為自己好像在高過合理價的價位買，龔sir 有冇什麼介紹？
2.自己想買reits 因為好像大方向來說 都會keep住升，778,435 合理價範圍大約是幾多？
3. 月供股票這樣的分配可以嗎 有需要加大 or 減細金額嗎 ？
4. 自己想4年後 有100 萬 龔sir 我應該買什麼股票合理增值？
5. 一直想買港島樓 龔sir有介紹嗎？ 我需要擁有幾多錢先可以開始買樓？
謝謝你一直的教導 有機會我一定會上你堂！ 謝謝你 我因為你受了很多啓發！
龔成老師：
通常我一年都會開1、2次星期六班，你可以留意。
1）這兩股不是無質素的，但業務的確有風險，如果你是長線投資，其實唔需要轉來轉去，持有就得。如果你持貨太多，可考慮賣出。
從你上述的股票，見到你整個組合有點散，這反映你投資時，會較易受中短期市況影響，但我地應該集中長遠的企業價值，唔好轉來轉去。
2）其實現價已是合理區，可分注投資，但我希望你唔好令組合太散，因為管理會比較困難（因為我希望你每一隻投資的，都是自己了解，並會保持分析業務情況的）。
3）可以，保持就得。記住，月供是長期策略，你最好保持5年以上，唔好轉。
4）你保持上述的方向，投資平穩增值股就得，同時，可以加少少潛力股。
現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。
5）如果不是心急買，最好有$150萬以上的資金，才投資，到時可以動用$60萬-$100萬作首期，同時，我希望你動用完後，仍有資金剩。
另外，之前政府出招放寬左按揭，會令樓市短期向上，但不建議高追，香港的社會運動，將會影響經濟，這會令樓市在短期升完後，回歸基本面，即是會向下，你等這時，見到有較平的盤才買，見唔到就算。
長遠來說，當香港社會運動過去，樓市又會慢慢向上，所以你都有投資物業的價值。
所以，你這刻可以留有一定的現金，部分資金可分注投資優質股，平穩增值類就得，盈富（2800）等類別適合你的，同時用上面的策略。
------------------------------------------------
Q13446：
龔老師，點睇3690美團，會否成為下一隻騰訊？
龔成老師︰
美團點評（3690）我唔敢睇少佢的業務，因為真的業務巨大，同時增長快，不過，佢仍是有危有機的股票。
業務較新興，但佢現時仍在燒銀紙狀態，我比較怕這類企業。這類企業不是不可投資，而是不能大注。
因為無人知佢燒銀紙燒到幾時，因此市場對其估值都是「估估下」，這一定會帶來股價上的波動。
------------------------------------------------
Q13447：
龔老師： 如果我有200萬，想買收息股，請問有那些股票可選擇，謝謝您！感激！
龔成老師︰
投資收息股，我地一般會選擇些派息率高、穏定和達5%股息率以上的股票。
合乎5%或以上股息率的收息股，你可以選擇例如港燈（2638）、深高速（0548）、香港電訊（6823）、工行（1398）、匯豐（0005）、置富（0778）、陽光（0435）。
另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、必瘦站（1830）、互太紡織（1382）等（記住，股價略波動，不能太過大注）。
但要留意，現時股價只是合理，未到平宜，因此買入時宜分注，同時不能用盡現金。
------------------------------------------------
Q13448：
請問6823現價入得過嗎？最近跌了很多 不知為什麼？
龔成老師：
最近因為香港電訊（6823）5G競投因素，令市場認為佢唔算好進步，因此增長力不強，而市場在過往都預佢有一定的增長力，所以股價在之前在合理區中上部，近年回落至合理區中部。
其實，這股一向增長力不強，佢運用100%派息政策，發展不強。這只是一隻收息股，現價合理，長線投資無問題。
------------------------------------------------
Q13449：
老師，政府早前推出嘅九成按揭至八百萬樓，我之前因為年紀已44，又擔心儲唔切錢都死心咁滯，宜家即刻可以買又做到三十年按揭。
但另一d分析又話呢個係政府嘅局比人接火棒，跌一成即刻負資產，想請教老師，如果我只係自住，公務員，現在購買會唔會真係接火棒呢？
龔成老師︰
我地投資樓市，唔好以「預期」的模式進行，作為自住用家，只要你資金足夠，堅守「供得起」原則，而樓市唔太貴，已可以買入。
香港樓我一直都係長線我睇向上，在新施政報告出台，睇唔到政策能夠在短期提供大量住宅單位。明日大嶼相信最終會落實，但時間有機會會推遲。
種種因素支持下，香港樓市大跌的可能性不大，長遠香港住宅區都會係供應不足。作為打算自住的你，焦點唔應該放在樓價上，而應該堅守「供得起」原則。就算真係樓價跌變負資產，只要你保持供款，就唔會有問題。
不過，我見到有部分業主開價進取，你唔好刻意追高價。
你的工作是公務員，退休前相信財政上唔會有太大變動。但如果銀行真的批出三十年按揭給你，你要考慮自己退休後是否能維持還款。
------------------------------------------------
Q13450：
成哥你好
背景：
小弟啱啱畢業，月入扣埋家用25k，儲蓄係零咁濟
現持5手港燈（$7.37）
目標五年內上車同結婚
想問：
1. 我應該以收入幾多成做投資股票，幾多成做儲蓄呢？短期內應該無咩特別大支出。
2. 我應該用月供方法投資股票，定係自己一手一手咁買呢？
3. 港鐵依加44蚊，係咪算合理位？如果長線投資，應唔應該開始入貨？
感謝成哥
好人一生平安
龔成老師︰
1） 最好可以儲到一半，能做到3-4成也算可以。
2） 簡單來說，月供股票就是你每月將現金，買入某一隻或多隻股票，慢慢咁樣儲貨。
月供股票每月投入的金額相同，因此當股價上升時，買入的股數自然減少，而當股價下跌時，就自然會買入較多股數，如同自行調節一樣，去減低價格波動的風險。
其實一手手買都可以做到以上效果，你現金只要平均地慢慢投入股市（如保持住每月定額買一手）就可以。2個方法都可以，一手手買更節省了銀行月供收費，但你必需確保自已可以有自律性地進行。
3） 港鐵（0066）現價算是合理區，你如果無貨現在入頭一注無問題，如有貨就要分注，或以月供進行。
其實，當我地進行人生財富累積，會運用「先增值，後現金流」作方法，年青時應投資較多增值類資產，以增值為先，而較年長時則應投資較多保守類項目。
以你們啱啱畢業年紀，應以增值為主，可以買入平穏增值股：盈富（2800）、金沙（1928）、恆基（0012）、中銀（2388）、粵海（0270）、港鐵（0066）、煤氣（0003）、港交所（388）、長建（1038）、領展（823）和潛力股︰比亞迪（1211），中生（1177）或福壽園（1448）。
港燈（2638）只是收息股，無增長力，唔係太適合你。
------------------------------------------------
Q13451：
成哥你好，想請教。目前有1手煤氣 @17.92，2手恆生銀行 @174.05，1手中國鐵塔（788） @2.17，1手鷹普精密（1286） @4.63、1手李寧 （2331） @24.3、1手渣打@64.9同2手中煙 （6055）@ $22.1
李寧我來緊就會放，我應該要點處現中國鐵塔、 鷹普精密同中煙呢3隻股票？
同埋見成哥你之前都話中生製藥係潛力股，我依加買2手中生製藥同月供恆基地產，可行嗎？
感謝解答
龔成老師︰
首先你要明白投資股票等同買企業，只要我地買的股票有質素，我地就應該長線持有，讓其自動去為財富增值。而你的做法，感覺有少少是在短線炒賣、賺差價階段。
我之前做銀行、證券行多年，見證大量客短炒全部都蝕錢，只有長線才能有錢賺，希望你明日這個重點。
講番問的你3隻股票，中國鐵塔（0788）有質素的，只是早期有少少炒概念，所以這刻唔能夠太進取。這股本身有質素、有前景，中國的3大電訊巨頭，都是佢的主要客戶，以及大股東，當5G發展，佢一定會受惠，因此前景仍然正面。
佢現時的收入正不斷增長，盈利都保持向上，但股本回報率不高，是這股較弱的地方，但只有一手，可以持有。
至於鷹普精密（1286）和中煙（6055）上市時間十分短，而且上市時數據可能會經過美化，故十分難去做估值。但你持股唔多，可以考慮保留，唔好加注就可以。
至於中生（1177）和恆基（0012）都有質素，但中生現價有點貴，回到接近$10會較好。而恆基（0012），進行月供無問題。
------------------------------------------------
Q13452：
老師 我一直都有睇開你啲書
最近我對莎莎呢隻股好有興趣 因為已經跌到歷史低位
現時你會點睇呢隻股
龔成老師︰
莎莎（0178）本質不差的，但近期人民幣較弱，加上香港的零售市道有風險，都令這股價股中短期受壓。這企業本身有優質的，有品牌、有規模，在行業有一定的地位，賺錢能力不差。
但近期環球市況不穏，加上香港出現社會動盪，都令此股期一再下跌。預期中短期都會受經濟及零售市道影響，令股價較為波動。
現價雖然下跌不少，但只是在合理區偏底部，未到平宜區。無貨可買入，由於股價波動，只宜小注和買入後要預較長時間才會有收成。
------------------------------------------------
Q13453：
你好，麻煩分析下咁樣月供組合可以嗎？
我自己擔心太多銀行股是否太危險。
每月2萬月供股票
4000 盈富基金
3000 中華煤氣
3000 建設銀行
3000 恒生銀行
3000 中銀香港
3000 宏利保險
隨著女兒長大，兩年後月供款額會減少，應剔除那一隻股票？
定存 220萬，股票供50萬，應否考慮買樓投資？
龔成老師︰
你組合的確太偏重於銀行業，這樣會出現過度集中風險，當行業出現問題，就會對你組合造成沉重影響。
以你月供2萬計，銀行佔比最好少於$6000。你可以將過多部份改為買入其他平穏增值股：金沙（1928）、恆基（0012）、粵海（0270）、港鐵（0066）、港交所（388）、長建（1038）、領展（0823）或直接加入盈富供款中也可以。
往後你減少供款時，從增長力考慮，可以删除建行（0939），此股只適用於收息，增長力欠奉。如以質素考慮，組合中宏利（0945）會弱少少，你可以在這2隻選其一。
以投資價值值博率而言，股票市場會較好，暫時利用股票去做財富增值會較理想。但大市現在只是合理區，如要投資緊記分注。
------------------------------------------------
Q13454：
你好，龔成老師。本人27歲月入17k，由今年4月開始月供股8k，希望5年後可有5-60萬。
2800 盈富 @3000
2388 中銀@2000
1299 友邦@1000
1211 比亞迪@1000
00027銀河@1000
想問以上的組合可以繼續持有嗎？還是將2388中銀改轉為2800盈富？希望老師可給予意見，謝謝。
龔成老師︰
以你月儲$8000，恆指年回報10%計（股息再投資），5年後大約增值至58萬。你組合內都是有質素股票，行業分怖也平均，唔需要特意將中銀（2388）轉去盈富（2800）。
其實我地進行人生財富累積，會運用「先增值，後現金流」作方法，年青時應投資較多增值類資產。
你組合唯一問題是潛力股佔比重較少，如果你唔想中銀咁多，可以將其中$1000轉落你比亞迪（1211），中生（1177）或福壽園（1448）。
或者你先維持現有組合，到日後收入增加，才加大潛力股比重也可以。
------------------------------------------------
Q13455：
老師，我以前想試下買股票，只有1手1337雷蛇$4，1手486俄鋁$2，唔知應該點處理？
另外發現2331李寧由$6.5升至$27，請問老師有咩見解？
龔成老師︰
首先你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。
雷蛇（1337）雖然可以有潛力，但本質好波動，上市2年仍處於虧損狀態，但公司市值已有$130億，所有的市值，都只是基於「將來預期」去產生，這個預期可以變得好快，因為大家都只是「估」。
同時，電競行業的真正營運模式，賺錢能力如何，充滿了未知數，一個遊戲可以好受歡迎，亦可以好快無人玩。因此，這股有前景，但風險好大，無人知真正的價值，如你真的要投資這股，只能小注。
俄鋁（0486）本身都有一定的客戶，同埋佢有一定的規模，唔會太差，不過政治因素一定會令股價較為波動。但留意到佢2017年核數師表示"保留意見"，即係盤數可能有古怪，我對這些企業好有保留，沽出比較好。
李寧（2331）本質不差，本身有品牌，生意與盈利都有理想增長，賺錢能力不錯，相信前景正面。你見佢過去數年，股價大幅增長，主要由於之前行業盲目擴張、李寧產品轉型定位失誤等問題，令股價數年前跌至谷底。
但近幾年行業情況有所改善，令投資者再次熱追此股，令股價被過度搶高。現時PE80倍以上，已經是貴，暫時不宜入貨。
------------------------------------------------
Q13456：
成哥，我明白投資企業時要選擇一些財務穩健既公司，但如何具體一啲甘判斷一間公司能否係經濟衰退、行業嚴冬期生存落去?
基本道理我都明少少，例如睇現金流、負債、速動比率之類，但我只係初步睇到狀況係ok、良好或者差，能否再深入分析?
如果一間企業一直有盈利但經營現金流連續兩年為負數是否有啲奇怪?
謝謝!
龔成老師︰
行業嚴冬期能否生存落去，其中一樣要考量就係其負債情況。市況好還債當然無問題，但負債過高企業，在經濟不景時可能因資金不足而要賤賣資產。
當然，這只是其中一個因素。我地買入一隻股票時，一般會基於生意、盈利、前景、市場環境等等基本因素而做決定。
要講點樣具體用不同財務指標、行業環境去分析一隻企業，課堂上也要用好幾小時時間，所以好難三言兩語去說明。
至於一間企業一直有盈利，但經營現金流連續兩年為負數的確有機會出問題。但我地要睇番佢實際原因，睇番佢財務報表現細目，唔可以一概而論。
其實不少讀者都會有你出現情況，對指標有了解，同時也有基本投資知識，但當將這些技巧串連去找出答案時就出現困難。
如果你有時間，建議你上我的投資課程。當中會教你選股3步曲中，你會見第1步的程式選股，是只用一些簡單的財務指標，用程式已可快速找到表面的優質股。
到第2步，才較深入去找股票，到第3步，才會好仔細去分析。上完課程後，我相信你會掌握到這一系列指標和資訊如何運用。
------------------------------------------------
Q13457：
龔成老師你好，本人28歲，月入大概22K，每月會和另一半合共儲$16,000於聯名戶口，而聯名戶口現時有$40,000現金，另外我自己每月也會儲$8000於2.38厘息的個人户口，現時我的個人戶口內有$130,000現金。
另外我持有一個物業，是位於新界西鐵路站居屋，以$490萬市值買入，月供$11000，暫時物業以$12000出租中。
而我每年大概需要付$42,000保險費，當中$23000是儲蓄保險，需要供五年，供到2024年，2029年開始有賺同埋可取回現金。
想問一下五年內有機會儲到人生的第一個100萬嗎？而且我對投資方面是比較沒有概念，所以遲遲未能決定投資什麼項目，希望老師能指教一下，謝謝🙏🏻。
龔成老師︰
物業方面，能產出正現金流，這部份可以維持進行。2.38厘息的個人户口增長力較弱，保險這防守性理財產品也不需要太多，只要因應個人情況，買足夠就可以。資金用來投資其他優質資產，長遠會有較好增值效果。
當我地進行人生財富累積，會運用「先增值，後現金流」作方法，年青時應投資較多增值類資產，以增值為先，而較年長時則應投資較多保守類項目。
你這個年齡，是財富增值的黃金時期，資金應該盡量用在增值用途。
你可以用現時每月能儲的一半資金（1.2萬）用作月供股票，可以買入平穏增值股：盈富（2800）、金沙（1928）、恆基（0012）、中銀（2388）、粵海（0270）、港鐵（0066）、煤氣（0003）、港交所（388）、長建（1038）、領展（823）和潛力股︰比亞迪（1211），中生（1177）或福壽園（1448）。
而餘下一半資金（1.2萬）先儲起，待大市大跌才入市，增值得會較好。以你月儲$2.4萬，恆指年回報10%計（股息再投資計），5年後大約增值至170萬，足以達成你目標。
------------------------------------------------
Q13458：
成哥你好，我係新手，現年32歲，有物業供款，已借盡，每月現金剩1萬元內。
想10年內用收息既方法每月可以收多6-8千元，請問有咩方法會穩陣而又做到，感謝你
龔成老師︰
如果想每月有$8,000現金流，以股息率5%計，你需要192萬。
你可以將1萬蚊作月供股票，投資在平穏增長股︰盈富（2800）、金沙（1928）、恆基（0012）、中銀（2388）、粵海（0270）、港鐵（0066）、煤氣（0003）、港交所（388）、長建（1038）、領展（823）或潛力股︰比亞迪（1211），中生（1177）或福壽園（1448）。
以恆指平均每年回報10%計，10年後大約增值到190萬。之後你將股票換碼至收息股（5%股息率或以上），就可以為每月創造$8,000現金流。
但其實我地進行財富增值時，會運用「先增值，後現金流」作方法。你尚年青，是財富增值黃金時期。你應該再長線些持有這些增長股，令佢地為你財富更有效增值。到年老退休或資產足夠你財務自由時，才轉換至收息股，而個策略會較好。
------------------------------------------------
Q13459：
我目前0003有1萬股在$17.8 入了，是否要等到家鄉才放？
還是一直持有直到永遠？
因為有機會在未來的日子股價會不停上升？
龔成老師：
煤氣（0003）有質素的，你不用擔心，但這股之前有少少貴，市場認為佢高增長，而近期的業績只顯示這股只是平穩增長，因此股價略有受壓。
這股可以長線持有，但就要耐心少少先可以翻上高位，唔好預佢好快上到。
------------------------------------------------
Q13460：
老師，我搞不懂長期持有的優質股入手價格為多少才是正確入手價
龔成老師：
首先，我地一定是投資優質股，長線持有，因為我地要建立一個優質的財富組合。
至於甚麼價買入才對。當我地決定幾時買入時，會以兩大方向作買賣因素，第一，大市的冷熱，利用大市的是否過熱程度，去決定買入或賣出。
第二，為企業進行估值，計算企業的合理價值後，比較現時的股價，從而得知現時股價的平貴，並以此決定怎樣入貨。
這些方法，具體運作解釋需時，而我會在股票班詳細講述的。
----------------------------------------------
多謝各位提問，若然你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網的，當然，會將發問者的身份，以及有關個人的部分刪去。
另外，由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。
