入咗行做獵頭之後見過好多唔同個案，呢啲經歷真係十年都寫唔完，而由於我返工條路會經過沙中綫地盤，所以成日都諗起其中一位求職者，佢曾經令我動容，雖然已經好耐冇聯絡，但我好希望佢而家生活美滿。
當時我要請一個成衣採購經理(Merchandising Manager)，人工大約3萬幾，收到其中一份CV覺得好適合，所以我約佢上嚟見工，喺電話入面，呢位叫Keith嘅求職者已經講明因為返緊另一份散工，所以著唔到西裝上去我公司，我話冇問題，畢竟只係Agency，去個客度先著返老西都未遲。
喺電話度我冇問Keith做咩散工，不過佢上嚟嗰陣係著住地盤工衣，所以謎底已經自動解開，原來當時佢啱啱做咗爸爸，但又適逢舊公司重整架構而裁員，本身都係搵緊3萬蚊左右嘅Keith頓感徬徨無助。
試過搵返同類型工作，可惜冇乜feedback，其實都唔難理解，Garment喺香港已經慢慢轉變為夕陽工業，國內人工同物料成本大增，啲廠紛紛搬去越南、柬埔寨、孟加拉，甚至係開放咗唔係好耐嘅缅甸，國泰裁員可能會有報紙大肆報道，但年中好多大大細細嘅Garment公司裁員，唔係做嗰行真係未必會知。
我始終覺得我哋香港人英文好、溝通易、有交帶，而且做嘢上心。我哋仲有呢個優勢嗎？我唔肯定，但希望有。
Keith喺地盤做紮鐵，好多人都話紮鐵好好搵，但背後嘅辛苦同汗水又有幾多人見到？由於Keith幾經努力都搵唔返Garment工，加上生活迫人，自己唔食，老婆仔女都要食，何況個仔仲啱啱出世，所以佢趁有氣有力走去做地盤，始終日日等電話等interview等feedback都唔係辦法，BB要食奶粉要用尿片，我唔知尿片同奶粉幾多錢，亦都唔想知，因為太沉重。
雖然Keith手臀粗壯，黝黑嘅皮膚配以一臉風霜，唔著工衣都可能想像到佢喺地盤工作，不過佢用英文交談時又對答如流，再睇埋枱面上一張張嘅大公司reference letter同埋大學畢業證書，你又會覺得個畫面有好大反差。
無奈嘅係，嗰次我個客冇請到Keith，及後我亦好少做Garment嘅範疇，只係偶爾收到Keith嘅Whatsapp，問下我一啲見工技巧，不過都係一年幾之前嘅事，所以我好多時都覺得自己好渺小。
男人最型唔係著住恤衫西褲皮鞋穿梭夜場，又或者揸住架靚車招搖過市，一個真正charm嘅男人係有膊頭肯擔起成頭家，仲有馬死落地行嘅能屈能伸。
做地盤又好，做返Garment都好，希望Keith一切安好。
沙中綫 在 沙中綫帶來的轉變 - YouTube 的八卦
本影片屬Hayden Yung 所有，如需使用影片内容作任何公開或私人用途，請先聯絡本人，並先得本人的同意及批准，違者必究。 ... <看更多>