當編輯遇上3大毒瘤
【有一份工，叫體育記者 (波經版系列 2)】
記者主力寫稿同埋採訪，編輯就會參與每日主題策劃，行內稱之為「菜單」，即係今日第一二三四五六版有咩睇，另外會搵圖片、幫每段稿起標題、全版啲位點樣劃分，同埋喺老闆唔願意再花錢請人做校對之下，check埋每段稿有咩錯字，如果累到印刷部遲咗印紙推出街賣，仲有機會收警告信。
其實各編輯都預咗要負責以上工作內容，但遇著以下3類冇操守嘅記者，仲頭痛過收警告信。
1) Copycat
由於國內網站有好多體育稿可以抄，有啲抄襲王係會就咁搬字過紙，但又改啲唔改啲，識得將球隊名由大陸叫法「切尔西」轉返做香港叫嘅「車路士」，又唔記得改埋內容，有編輯就曾怒喝記者：喂，乜嘢叫「打進一粒點球呀？」，呢度香港嚟架，我哋叫12碼，唔係點球呀！足球咁大個波，量詞會唔會係一粒粒呀！你試下落街場同人講，幫我執返粒足球吖！
2) 精神分裂L
曼聯今晚主場對韋斯咸，新加盟的中場馬迪及前鋒盧卡古已操起狀態，全隊平均質素亦有保證，主場出擊如虎添翼，馬會開讓球盤，捧韋斯咸不敗開下盤。
媽~~我睇緊咩呀？
3) 罐頭哥
同一個格式，嵌入唔同稿件。
水晶宮對利物浦
水晶宮近況普通，而且陣中傷兵頗多，狀態未見突出，相反利物浦今季保留大部份主力，只要維持一貫水準，全取3分冇難度，一於捧利物浦作客贏波。
紐卡素對熱刺
紐卡素近況普通，而且陣中傷兵頗多，狀態未見突出，相反熱刺今季保留大部份主力，只要維持一貫水準，全取3分冇難度，一於捧熱刺作客贏波。
所以我打死都唔做編輯，真係命都短幾年，不過仲有好多記者係非常pro，千祈唔好畀小撮害群之馬搞彎成個行業，而家做傳媒或者靠文字搵食已經好艱難，逢親玩體育嘅路就更難行，冇心做請早離場，咪霸住個位，阻住有熱誠同埋有能力嘅人加入。
水晶宮足球 在 利物浦vs水晶宮2 0 | 概述英超聯賽20/21 - 突出足球 - YouTube 的八卦
... <看更多>