《無啦啦去咗日本⋯⋯學起日文》
交代一下，我哋嘅戲劇性人生，都同大家分享下似乎大家都追開嘅 #薛宅日常。
月頭繼小弟玩miss flight單嘢之後，返到香港嘅第二日，isa姐就同老竇去咗北海道旅行，自從老竇退休之後，開始教車，其實仲忙過未退休之前，但亦因爲咁，屋企確實係富裕咗些少，我覺得老竇都維持到一貫嘅九唔搭八風格，退休多錢過未退⋯⋯anyway，總之！佢而家盡量安排時間同isa姐去梳乎，因為佢好愛佢、佢又好愛佢、佢又應承咗佢、佢又哎佢去嗰啲例牌嘢啦～都係嗰啲啦～今年兩位去北海道。
到埗第二日，我嗌isa姐係咁易sd啲相返嚟才幾個鐘之後，夜晚佢已經昏迷入醫院，老竇第一個電話打嚟係有咩消息再通知我，第二個電話係醫生聽，話我知要即刻做個腦部手術，喺電話度我完全聽唔明醫生嘅日文，總之同意手術進行，就立即開始，我都即刻買機票飛過去，全程機我都驚到異常平靜，雖然驚，但係要做正確嘅決定，所以都唔可以慌，總之我去到，無論如何，isa姐都叫做完手術，情況穩定番落嚟，雖然之後都再做咗一個，不過暫時穩定，我已經攰到想返工，因為原來平常返工嘅攰，對比起上嚟，係nothing。
喺哩單嘢上面，我發現老竇其實真係好勁揪，講真，佢真係最驚，但佢個保護屋企嘅系統就係唔會喺我同細佬面前驚，以前唔會，到而家都一樣，就算見到我，佢都係忍住咁嚟驚，同我完全唔同，阿媽玩熄機一星期，我直頭係每日喺床邊喊足三星期嘅分量，老竇呢？佢握住瞓緊嘅isa姐隻手，同我講：
「你阿媽而家係混血兒啦，佢流住半個日本人嘅血喇！」
「咁我可唔可以同人講我係四份一個？」
「吓？但係你出咗世啦喎，可惜吖～」
係，無論如何，薛宅日常，就係日常，老竇阿媽永遠都hold住屋企係哩個氣氛，發生咩事都好，佢哋都係咁，到阿媽醒番，頭幾日仲係有啲唔清醒，但係就開始猛咁扯開啲喉管⋯⋯
「媽你唔好再扯甩啲喉，哩個係供氧架⋯⋯」
佢當時都仲未夠氣講嘢，佢做手勢要我遞個耳仔埋去，佢用盡力都只係得氣聲，但你估佢講咗一句咩說話？佢話：
「你夠係我供養㗎啦⋯⋯又係扯極扯唔甩⋯⋯激死我⋯⋯」
我真心想研究，究竟係邊個激死邊個⋯⋯我又到底生活緊喺一個乜嘢家庭，仲要花盡幾多氣力去講無聊嘢先至安樂？
唔好以為生活喺哩個家嘅我好梳乎，唔好忘記，我哋仲喺醫院，哩度係北海道，仲係離中心城市極遠地區，isa姐直頭仲未完全渡過危險期，而全醫院嘅醫生護士基本上冇人識講正常英文，靠個ipad翻譯器溝通仲要經常彈app唔多work，所以我哩個星期就係不停學日文，主修係醫院用語，喺isa姐昏迷嘅時候，語言白痴嘅我已經背晒五十音，實在係九唔搭八⋯⋯細個以為讀art就走得甩，唔洗俾isa姐迫我讀書，誰不知，原來到最後都走唔甩⋯⋯你話仲邊有得唔服。不過，只要屋企健康開心，要我做乜，都真係濕濕碎，又話說學咁耐，都只係識講下いたい～あつい~さむい嗰啲仲要唔知有冇錯，知識都真係唔多襟洗⋯⋯
哩段時間實在好多謝公司同事體諒，幫手頂住節目，我會盡量快啲返嚟pick up返所有嘢，お疲れ様でした（哩句未學，抄嘅。）。
每日一句英文生活用語 在 每日一句英文生活用語2023-在Facebook/IG/Youtube上的焦點 ... 的八卦
每日一句 學英語，每天三分鐘，增加英文力。 ... May be a cartoon of text that says 'DAILY ENGLISH 每日一句學英文... 這種搭配影片的生活用語，真的很實用. 每日 . ... <看更多>