愛在瘟疫蔓延時
對莊偉忠來講，人生下半場他只為一個人奮鬥﹕「如果人有80歲命，最後10年可能都在病榻上度過。我想將現在最精彩、最好的10年時間，100%留給我太太。人生在世，比工作重要的事太多了，而我太太凌駕於所有東西」。
「每個成功男人的背後，都有個女人」或者啱；
「每個成功女人的前面，都有個男人」一定啱。
我心甘情願企喺前面，做佢嘅男人，一生任佢指指點點。
有人話，今日嘅事今日做，聽日嘅事仲未做，過咗去嘅事，有幾多值得記得，問吓自己，記嚟做乜。凡事記少啲，煩惱少啲，淨係記開心事，做人型啲，瀟灑啲，快樂啲。
人生匆匆，成唔成功，唔係最重要，永遠唔會重要得過美滿婚姻、家人、健康同埋快樂。唔使羨慕人，亦唔使人羨慕，自己快樂，自己心滿意足，自己日日同愛人如沐春風，自己有啲啲傳世智慧，仲有人記得，已經不枉此生。
下個禮拜一，結婚三十二周年，我事先張揚，將呢篇文章送畀老婆大人做結婚周年禮物。
「老婆，我愛你。」嫁到畀你，係十世修返嚟嘅福份，感謝上蒼，我心存感恩。
後記：
上個星期六，出席教堂婚禮，三百賓客戴住口罩，感受特別深，台上一對新人都雙雙多謝我，好冧，愛在瘟疫蔓延時，希望佢哋學吓我哋兩夫婦，白頭到老，永結同心。
