診所內有位婆婆，每次嚟到都會喺醫生房內好耐好耐好耐...
佢唔係有咩大病，佢每次嚟到都會同醫生講佢嘅家事，每次都係講同樣嘅嘢。
即使過咗幾多個月，都係每次一樣。
因為佢先生，佢仔都比佢早離開呢個世界了，已經冇新嘅嘢去俾婆婆講。
佢每次都講佢先生佢仔生前嘅一點一滴，婆婆每次都好似一本日記咁，一頁又一頁咁翻開嚟睇。
醫生曾經轉介過佢，不過婆婆話：「我唔係癲唔係傻，我接受咗㗎啦，醫生你唔好趕我走呀，我以前成日同我老公過嚟睇你，喺呢間房我覺得好好。我哋識咗咁多年，你唔好推我俾啲我唔識嘅人啦」
熟悉嘅屋企，熟悉嘅地方，熟悉嘅人，最熟悉嘅回憶，一直一直支撐住佢。
到有次，婆婆一早嚟到診所：「姑娘，你可唔可以幫吓我？」
同事：「幫你啲咩呀？」
婆婆：「我死咗嘅，你可唔可以幫我通知人嚟葬咗我呀？」
同事：「吓？」
婆婆：「我應該就死㗎啦，我早幾日見到我老公」
同事唔識俾反應婆婆，就唯唯諾諾一句『好』。
之後同事講返出嚟，大家先知有件咁嘅事。
醫生好高興，因為婆婆終於肯搵人幫手～
醫生叫我哋聯絡婆婆叫佢落嚟傾傾，同介紹相關機構俾佢。
婆婆嚟到：「姑娘，我嚟咗啦」
我：「好呀，你坐低等等呀」
佢坐低後望望四周：「姑娘，你呢度真係十年如一日。」
我笑笑：「係呀，都冇裝修過」
佢：「等我走咗之後，裝修吓」
我：「睇吓醫生肯唔肯啦」
佢：「姑娘呀？係咪我死咗你哋幫我執呀？」
我：「唔係呀，而家有啲機構係會幫人處理嘅，醫生一陣都會同你講解吓，或者你可以了解咗先嘅，唔駛咁驚咁擔心。其實你肯出聲搵人幫，我哋都覺得你好叻㗎啦，始終唔係個個願意面對死亡～」
佢雙手捽捽大腿：「我唔想一個人死喺屋企...生晒蟲先俾人發現...」
我：「唔會啦，你肯搵人幫就可以㗎啦，唔好自己一個攬晒上身，要搵其他人分擔吓～」
佢：「如果我走咗，你哋嚟唔嚟睇吓我呀？」
我：「好呀～你到時記得同佢哋講你嘅意願啊」
佢：「嗯」
我：「入得去啦花婆婆」
佢拍一拍大腿，起身，臉帶微笑行入醫生房。
花婆婆，喜歡百合花，喜歡皮蛋酥。
#死亡是我們必須上的一課
