《那一年，我17》影評
「所謂成長」
—談對理想的妥協與堅持
（含劇透慎讀，拉到最落有簡短版:p）
—
—
—
一套電影，可以有一百樣解讀，無對或錯，但總有較多人欣賞或認同的說法。而解讀的方向則多與我們的人生觀或思想模式有關。《那一年，我17》對我而言，配角小芬姐的一句話就點了整套電影的題，「因為你從來都無諗過要長大」，這是一套講有關「成長」的電影。
—
「數不困人人自困」
—
數字是人類所創的書寫符號，配合一年有365日的曆法，從此人就有了「歲數」。然而，人卻被自己創造的東西所困，「生涯規劃」了自己的未來，例如十七歲的時候你要讀書，因為你將要應考公開考試，爭取較高的「分數」；到了廿二三歲的時候你要搵一份好工，因為你將要獨立，要搏命去賺取最高的「人工」；到了「29+1」你要成家立室，因為人大左就要組織家庭，要係而立之年生兒育女；而四十歲就要事業有成，六十歲就要安享退休生活……就好似套戲入面「扯旗」所講，佢唔可以無左呢家份工，因為無工就無錢，無錢就無樓，無樓就無女，無女就結唔到婚生唔到仔，所以絕對係好大件事，每日做到隻狗咁，都要保住呢份工。
—
就好似戲中呢句反問所講，「無錢，仲講乜野堅持？」係嚴密嘅規劃之下，必須要嘅就係對現實嘅妥協。就好似好cool好型嘅烈女MARY，大個之後竟然走左去賣橙，肚入面嘅一件，行得走得嘅一件，仲甘心比老公打，為左保住堆神沙而要卑躬屈膝；又或者係男神何子健，今時今日雖然做到保險TOP SALES，但就要比肥師奶摸手仔，一齊做「運動」；楊偉亦只係做緊酒店入面搞活動嘅職員，每日要為兩餐奔馳；而「花漾四子」更加係影都無埋，不知如多少人湮沒在社會的巨輪之中，成為一粒粒標準而無特色，用完即棄嘅「螺絲釘」，一粒滑左啞就換第二粒，生生不息，永劫輪迴。
—
「識時務者為俊傑」
—
「妥協」一詞好似帶著負面的意味，包裝過後就是楊偉在班房裡勸告彭永琛的「識時務者為俊傑」，懂得審時度勢，靠攏社會潮流，你就可以成功，至少成功地「生存」。雖然戲中主要人物長大後出路各異，有「成功」，亦有「失敗」，但別忘記這乃是電影中一個深刻的對照，畢竟在十七歲的時候，他們都在前進班裡共同為他們參加音樂比賽的理想奮鬥過。而「妥協」和抹去自己人格過後，可以擔保自己成功嗎？無錯，你的確有機會成為何子健，令你不用再煩憂任何有關金錢的問題，但同時你也必須出賣自己的感情，甚至肉體，或是整個腦子都只是工作，任何人也變成了你的工具，連一刻鐘也本能性的不想留給久別重逢的老友，「我地都係講番基金先啦」。
—
而更大機會的是，你會變成了瑪莉或楊偉，高不成低不就，每天在狹縫中掙扎，重覆地去做自己根本不喜歡的事情。這又何異於施俊杰？人家好歹都是「施總」，儘管音樂公司成績並未理想，每天也要周旋於不同的問題上，甚至女友也要因快年滿「三十四歲」而要離開（怎麼又是數字），但總叫做投身於自己喜歡的東西上吧。
—
「所謂成長」
—
施俊杰由中學開始，從來都不是易於妥協的一個人，但他卻會嘗試用自己的能力去倒過來影響別人。就例如張鎧妮在課室內練結他，彭永琛露下散手，足以令袁澧林的態度作180度的轉變，甚至傾心。戲中的那一群有心的學生被校長無情「DQ」（現實中還不是出現了DQ事件？），然後在場外表演，得到其他學校學生的駐目及尊重，場面當然是熱血，為左達到夢想，故事鼓勵我地並唔應該被既有嘅「框框」框住，比唔到賽又有乜所謂，只少我地試過偷試卷，試過努力溫書測驗合格，試過為追求某D野而真心去付出，只要有心，就可奪金，好多人就係想入場去回味番呢份久違左嘅熱血。
—
但對於我黎講，點解要係「回味」而唔係「實踐」呢？十七歲，浪盪不羈，乜都夠膽做同夠膽試，就梗架啦，但你要問自己嘅係，點解今日嘅你就唔得呢？好多人會笑你傻架喎，你果陣年少無知又點同呢？果時讀書又有乜要煩呢？出到黎社會就要現實D，要妥協架喇，世界唔係你所諗咁簡單，要腳踏實地多一D，唔好再玩世不恭，正正經經搵番份野做。
—
而我想講，點解為理想而堅持落去唔可以係一樣「正經」嘅事黎？無錯，今日嘅你睇番學生時期嘅自己，點解所有困難其實都係A PIECE OF CAKE，同你今日面對嘅經濟壓力、結婚壓力、事業壓力根本無得FIGHT。但請大家唔好將呢樣野變成你今日逃避或者放棄追尋理想嘅借口，因為係十七歲嘅時候，你嘅學業同家庭就係你生命嘅全部，唔同嘅係舊時你敢突破框框，但今日嘅你無呢份勇氣，就好似點解MARY唔同老公離婚？點解子健名成利就左仲要比C9糟質？一切都係睇你敢於跳出舒適圈嘅勇氣有幾大。
—
亦可能有人會話，當你出左呢個社會做野就會明架喇，如戲中男老師的一句：「等你長大就會明白啦」，人嘅理想同熱情係會比無情嘅現實磨蝕的。但我深信，被磨蝕只係我地睇事物嘅「其中」一個角度，當我地有左一定嘅歷練同經濟基礎之後，現實又可唔以將我地嘅理想磨得更銳利呢？
—
可能社會上大部份嘅人都會笑你傻，但如果你搵到自己嘅理想，就算幾傻都唔好妥協，要堅持落去，終有一日，你會敢好似袁澧林咁唔面紅好大聲話自己係”ROCK KID”。所謂成長，唔係要你夾硬啪入個機器度做齒輪，唔係要你遺忘你自己嘅夢，而係要你更聰明地達成自己嘅理想，今日未見番鎧妮唔緊要架，你其實仲有一世嘅時間去搵番呢個人，係咪？
—
敬追夢者
（其實我成篇野都無乜內容，可以睇呢度簡短版。一句講曬，袁澧林真係好靚好靚好靚啊！大家要多多支持佢啊！香港靠你了！）
—
（一篇影評其實要寫嘅時間真係頗長同相當費心力的，正如呢篇野都過左二千字了。如果你覺得文章係寫得好嘅，我一個人嘅力量真係非常有限的，唔好吝嗇你嘅like同share吖，甚至幫手推薦比朋友知道原來睇戲之後係可以有反思的，一齊傾，一齊分享同感受。網絡的力量可以很少，一篇千文字可以只像一粒沙，但同時亦可以很鉅大的，依靠的就是你，你，和你，感激不盡！）
—
那一年，我17
Kyle Li 李任燊
Angela Yuen 袁澧林
Sean Pang 彭永琛
King Wu 吳崇銘@C ALLSTAR
馬曼莉 Kylamary
Movie Express電影速遞
MY WAY FILM CO.,LTD.
框框符號怎麼打 在 【教學】如何在Word 裡插入「打勾符號」和「打勾方格」 的八卦
Comments1 · 【教學】Youtube 片段循環，學習、練歌、練舞都實用 · Excel儲存格輸入特殊 符號 ： 框框 裡打勾勾打叉叉 · 2种word里删除顽固空白页方法你用到过几 ... ... <看更多>