《 黃雨下的陽光 》
今朝早又黃雨又雷暴，人人都冇乜mood，不如李懂媽濃縮幾單真人真事嘅親身經歷，等大家分享吓。
星期五
我揸住架本田錢七，由清水灣道落斜趕住出九龍，去到順利邨附近，對面線一架掛咗中港牌嘅黑色Land Rover，係咁向我眨高燈，我睄一睄左右隔離，成條路就得我同佢兩部車，使唔使咁Q串，中港牌大晒咩？不過我都即刻收油望吓錶板，睇吓係咪冇閂實門定乜事…… 說時遲那時快，一轉咗彎，就見到差人捉快車駁lock。
如果唔係頭先收一收油，四舊半冇梗， 扣三分走唔甩。
星期六
啲friend話觀塘有間新開西餐廳响巧明街嗰頭， 揸車兜左幾個圈都搵唔到，就泊埋一間新商業大廈門口，入去問下reception果個著晒制服嘅靚女，佢話未聽過。
咁我就好冇㽼咁上番車， 果陣時仲有毛毛雨， 點知個靚女著住二吋半高踭鞋急急腳走出嚟敲我玻璃窗: "先生先生 ! 我問過同事，前面街口轉右就係。"
(本來應該開名鳴謝，不過一時冇留意大廈乜名。)
星期一
落咗機，搭A22機場巴出觀塘同老婆食飯， 過左青馬大橋冇耐就開始塞車， 想打電話先發覺冇電， 我坐下層行李架後面，旁邊有個後生仔， 個樣有七八成似馬浚偉， 我問一問佢，有冇尿袋可以借借？
佢擰吓頭， 我心諗，香港人啲人情味都係差少少。
點知轉頭佢遞咗佢自己個電話畀我，前面㩒咗133，笑笑口，叫我自己打。
我落車嗰陣，俾咗原本送畀老婆果盒朱古力佢。
星期二
响鑽石山荷里活廣場食完日本料理，放低皮包俾老婆拎住，自己去cup泊車飛，點知返到嚟，老婆騰晒雞話頭先去廁所漏低左我個皮包， 即刻返轉頭就已經冇咗。
周圍搵咗一陣，只好死死地氣走去詢問處博一博，心諗呢個商場人頭湧湧，又唔係响日本，都係凶多吉少。
誰不知有位小姐正响度交緊我個皮包畀詢問處，對啱身份證之後，原璧歸趙，我連聲道謝！
原來個好心人叫做陳小姐，响樓上栢斯琴行做嘢，啱啱去廁所執到。
我要衷心多謝同埋欣賞香港人，Land Rover司機嘅提水，馬浚偉嘅友善、制服靚女嘅熱心、陳小姐嘅正直、當然仲有好多好多茶樓阿姐、的士大佬、大廈管理員……
當我地人人開口又撕裂、埋口又仇恨嘅時候，不妨打開心窗，你一定會見到陽光。
李懂媽
栢斯琴行 在 柴可夫斯基及德布西(Tchaikovsky & Debussy) | 柏斯音樂世界 的八卦
今次嘅影片同大家一起欣賞6首柴可夫斯基同德布西嘅經典曲目，仲為大家將每首曲目配埋相關聯嘅著名畫作，等大家可將音樂與繪畫相融欣賞， ... ... <看更多>