李嘉身高的八卦，Yahoo名人娛樂都在討論

員工多如天上繁星的誠哥，又怎可能知道集團旗下，竟然有這樣一位年輕人。

嚴格來說，這位年輕人不算「集團旗下」，因為他不在長和系工作。

剛踏入三十一歲的年輕人，在誠哥與周凱旋小姐創辦的維港投資上班。

他叫鄭嘉泳。

他叫鄭嘉泳不是因為他貌似大台那位鄭嘉頴，而是他的名字真是叫鄭嘉泳。

為大家介紹這位鄭嘉泳，並非要幫維港投資宣傳，而是要為天下港女宣布一個喜訊：擁有四十三寸胸肌和一米八二身高的他，仍然單身。恐防你哋喺 Linkedin 搜尋唔到，佢英文名叫 Wayne Cheng。

如果各位港女自問身邊也有不少荀盤去選擇的話，且慢，請看清楚鄭嘉泳，你便會知道什麼才叫做荀盤。一係自己搵好多錢，一係屋企有好多錢，這樣就是荀盤嗎？要是一定要符合這個準則的話，sorry，佢兩樣都唔係。

但相信我，獅子山下，沒有一個比鄭嘉泳更荀的荀盤。

有些荀盤，荀就荀在，能人所不能。

中四那年暑假之後，回到學校，沒有一個同學認得出鄭嘉泳，以為他是新同學。

為什麼？

家境本來已經窮困，爸爸更在那時候失去工作。連出去玩的車費也付不起，於是他跟媽說：「唔緊要啦，白粥加豉油都好味呀，日日食都唔厭喎。」那個暑假，每天吃的，就如他所願，白粥加豉油，結果能人所不能地在一個暑假瘦了五十磅，所以沒有人認得暑假前那個肥仔。

這樣一個孝子，還不算荀？

好。

有些荀盤，荀就荀在，遇強便越強。

科大畢業那年，人人搵工。那一年，人工出得最高那家公司叫做 Delta Partners，比 Morgan 還要高，比 Goldman 還要高。入圍面試最後一輪的兩位，是全系成績最好的靚女高材生，以及成績不算標青的鄭嘉泳。

女生來自著名國際學校，年年周遊列國交遊廣闊，但結果竟然輸了給那個來自觀塘瑪莉諾書院和一次飛機都未搭過的鄭嘉泳。

再高材的高材生也不及他高材，還不算荀？

好。

有些荀盤，荀就荀在，人窮志不窮。

換著是你，困在小小的公屋二十多年，終於可以搭商務客位飛到新加玻咁遠，住一個望著醉人夜景的 service apartment，會不會甘願放棄一切，重新由零開始？

他會。

有天，他的朋友告訴他，李嘉誠基金會的汕頭大學有個職位空缺，是做 customer service 的，人工跟 Delta Partners 相距 90%。只考慮了十分鐘，他辭去了高薪厚職，用之前儲回來的錢繼續給媽媽家用，原因是，「李生係我一路以來嘅偶像」。

之後那大半年，他後悔到不得了。匯豐向他招手，他拒絕；國泰請他過檔，他說不。默默做密密做，就是為了一個可以跟誠哥近距離做事的機會，結果偶像的背影也只是見過幾次，更別說是近距離遠距離了。

轉捩點，上海的洲際酒店。

維港投資每年都會召集所有 start-up 的創辦人一同交流，那年的地點是上海的洲際酒店。如此盛事，基金會上上下下的員工也需要幫忙，鄭嘉泳負責在會場外點名。

會議未開始，他正低頭看著名單上的每個名字；突然，感覺到一陣風。

抬頭一看，是四名金髮綠眼的保鑣，圍著一位女士。

周小姐。

她坐在鄭嘉泳旁邊，喝了一啖水。

他很想望，又不敢望；他很想說些什麼，又不知說些什麼。

「你叫咩名？」竟然是周小姐先開口。

「我叫 Wayne，喺汕大負責 customer service，」漏著口的他說完這句，吞啖口水，鼓起勇氣說第二句，「不過其實我喺科大係讀 business，一路都好想跟老闆你學習投資，所以如果第日我有啲咩幫到手，希望可以畀個機會我。」

他隱約聽到她「嗯」了一聲，然後她便繼續撳電話，很快便頭也不回的離開了。就在那刻，他開始想起匯豐，開始想起國泰，開始想起自己以前那個遙望美景的 service apartment。

三星期後，他收到小姐秘書的電話：「小姐叫你而家上去。」

到現在，鄭嘉泳也不知道為什麼一個連 Elon Musk 都對她敬重十分的科技界巨頭會記得一個黃毛小子的名字。

正式成為維港投資的任何一位投資顧問，都必定會被委派負責一家「垂死」的 start-up，目的是要他們從失敗的企業中思考失敗。鄭嘉泳第一家負責的 start-up 不但垂死，更是第一家跟維港投資準備對薄公堂的投資項目。

這個牌很難考，但他最後不但成功做出七百二十度的高難度空翻，還要來個完美落地：官司不用打，維港還拿回投資的本金。

今天，鄭嘉泳是維港旗下其中三家初創的董事局成員，一家在美國，一家在澳洲，一家在以色列。

怎樣，這個荀盤夠荀了吧？

看著他拿著一杯烈酒，我代各位有興趣的港女問了他三個問題。

「你...... 真係單身？」

係。

「你......鍾意男人定係女人？」

女人。

「你...... 而家搵幾多？」

只能夠答你，我做份工，唔係錢可以衡量。

「咁用乜嘢衡量？」

我每日可以有機會見到自己老闆表演 decision-making，我每日有機會同世界最 top 嘅 founders 開會，我每日睇緊嘅，係十年後嘅世界。

鄭嘉泳說得對，是十年後的世界。如果他當時看的是匯豐和國泰，應該不會可以在我面前這樣風騷地喝酒。

錢可以換到生活的舒適，卻永遠變不出生命的高度。

#throwback

久不久會跟爸爸的好朋友飯聚，我每次也想找藉口缺席。爸爸那個好朋友完全沒有問題，而且是位非常和藹的世叔伯，有問題的是我爸爸。「你睇人哋幾叻，大你三年喳，做咗 partner 啦。」爸爸在上星期的飯聚又這樣說，幾乎是指定對白。爸爸口中的「人哋」是 Jimmy，和藹世叔伯的獨子。已經 30 幾歲人，還經常被爸爸這樣拿我跟別人的兒子比較，聽起來很灰吧？換個角度看，我在他心目中應該仍然是個小孩子，這樣想的話，挺 sweet 的。

未夠 40 歲成為跨國律師樓的合夥人，未至於驚為天人，但也真的不賴。由我差不多六歲開始，爸爸已常常長 Jimmy 志氣，滅葉朗程威風。儘管是爸爸幾十年的例牌動作，但每次聽他這樣說，也總有點不是味兒。人生其中一個最重要的決定，也因為這個 Jimmy 而有所改變。

十幾年前，哈佛大學收咗 Jimmy，你大概想像到，Jimmy 呢個人生高潮，為我帶嚟咗一個幾大嘅惡夢。「你睇人哋幾叻，哈佛都入到呀！」那個晚上，由飯局到回家的車程，再由回家的車程到我準備上床瞓覺，爸爸也猶如人肉錄音機一樣，不停的用同一種語氣說著同一句對白。本來也視到美國升學為夢想，但自從 Jimmy 入咗哈佛後，我決定唔去美國，因為我知自己一定入唔到哈佛，費事畀多個機會老豆滅我威風。

幾十年以來，無論人前人後，挫我銳氣，彷彿是爸爸的 favorite pastime。就在幾天前，在家裏跟他們吃晚飯，談起交稅，葉朗程帶著無比驕傲跟爸媽宣佈今年要繳納的稅款。「如果你當年畀多啲時間讀書，今年可能交得仲多呀。」爸爸說，然後是兩聲大笑。畀著我係佢都笑，咁都畀佢入到位，欽敬。「對得住自己就得啦，宜家都好好呀。」媽媽說，撐我，世上她最好。「如果當年佢識計劃得好啲，宜家肯定仲好。」爸爸鍥而不捨，似乎誓要把我打沉。媽媽夾舊排骨畀爸爸，然後淡淡然說：「如果當年我計劃得好啲，都未必嫁你。」爸爸忽然面紅，低頭扒飯。媽媽當年在香港大學雖然不是讀醫，但靚到連醫學院有幾個醫生仔都爭住追佢。相反，我爸淨係中七都讀咗兩年，唔好話 Harvard University，連 Fukin University 都唔收佢。談到這裏，我想說個故事。

讀中學時候，對辯論很感興趣，每逢辯論隊的師兄有比賽，如果時間許可，必定走去觀戰。其中一次是我校跟一家國際學校的英文辯論友誼賽，辯題是 classic 到不能再 classic 的「中學生不應該談戀愛」，我方是反方，即是支持戀愛。正方的論點正路得很，說戀愛影響學業，甚至說戀愛有機會讓雙方發生關係，到時珠胎暗結，必定前途盡毀。估佢唔到嘅係，前途盡毀都未係結局，仲要講埋前途盡毀之後，冇哂希望，又太大壓力，最後可能搞到自殺。一句講哂，中學拍拖就是死路一條。

正方那位女生講到自殺嗰句，盪氣迴腸，七情上面，仲有少少淚光，氣勢好勁，完全壓得住台，但我們一眾師弟完全沒有替下一位發言的師兄擔心。即將發言的師兄，出名成績好，轉數快，雖稱不上玉樹臨風，但身高五呎十一吋，皮膚白白，鼻樑架著一副老實眼鏡，甚有書卷味，但其實是白面書生假正經。佢一行出嚟，企喺中間，嘴角微微翹起，少少輕佻，好多自信。

師兄望一望評判，再笑瞇瞇望住頭先七情上面嘅正方女同學，輕輕吸一口氣，開始說：「我一向好羨慕你哋呢啲讀國際學校嘅學生，因為人人都話國際學校作風開明，鼓勵學生創意。聽完頭先嗰位女同學發言之後，我就更加肯定係名不虛傳，由拍拖講到死亡，可以如此合情合理，親愛的對手 (my dear opponent)，你直情可以做編劇。可惜我哋今日唔係拍戲，係要辯論。」

正方那位女學生冷笑，師兄繼續。「我唔敢話你頭先講嘅情景冇可能發生，但如果吓吓都攞極端例子嚟講，我覺得冇意思。即係如果有人問你，需唔需要讀大學先有前途？然後你話唔需要，因為李嘉誠都冇讀大學，你覺得有冇 point？完全冇 point，因為李嘉誠係極端例子，反映唔到現實。同樣地，中學生談戀愛就會自殺呢個可能性，都係反映唔到現實嘅極端例子。」

師兄講到呢度，我覺得佢已經贏咗，型到喊。「係好 X型，但係好似未中 point 喎。」坐在旁邊的 Benson 細聲說。那應該只是師兄的開場白，是時候入正題吧？萬萬想不到，他的正題比開場白更爆。

師兄又望著剛才發言的正方女同學，說：「雖然我覺得你頭先講嘅嘢冇 point，但係我，其實，已經有少少鍾意咗你。」WTF？「識咗你唔夠 15 分鐘，但係你真係好靚。由入場開始，你應該已經留意到我係咁望住你，阿媽教過我，staring is impolite，if you feel offended，對唔住。」

女生的臉頓時變紅，是 scarlet 那種紅。其餘的辯員，無論是正方還是反方，無不瞪大眼睛看著他。評判背著觀眾，所以我看不到他們表情，但大概也是 O 爆嘴。「我哋呢場辯論比賽，你哋其實已經贏咗。雖然我係學校嘅主力辯員，但係我已經唔 care 呢場比賽。喺呢一刻，我嘅number one priority，係你。」

其中一位評判正想出言介入，師兄沒有給他機會，以更洪亮的聲線繼續：「中學生嘅戀愛，就係一回咁樣嘅事。真摰，冇雜質，義無反顧，話鍾意就真係鍾意，唔使睇你做乜嘢工作，唔使睇你屋企有幾多錢。人哋話，上到大學拍拖，女仔會考慮個男仔有冇前途；出嚟做嘢，女仔會考慮個男仔有冇錢。看似係戀愛嘅戀愛，原來只不過係兩個人揸住部計數機㩒嚟㩒去嘅遊戲。如果中學生都唔把握住呢個談戀愛嘅機會，可能一世都唔會談到真正嘅戀愛。」

評判不斷搖頭，師兄沒有理會，結案陳詞：「我見到評判皺哂眉，係我意料之內。喺呢一刻，我唔需要佢哋認同，你認同我，已經好夠。May I at least know your name？」女方清一清嗓子說：「Shirley，and may I know yours？」

有些人跟 Jimmy 一樣，每條數計得清楚，每個目標定得清晰，一步一步，沒有半點偏差，就這樣成功了。有些人卻像我的辯論師兄，一生可能做過很多荒唐的事，但長大之後，往往就是這些荒唐的事，以及跟你一起荒唐過的朋友，才最值得你回味。

有時候，一刻的荒唐，一點的偏差，一絲的任性，可能就是幸福的起源。話說回來，我媽放棄了做醫生太太的機會，跟了一個連 Fukin University 都進不到的死𡃁仔，其實是一件很荒唐的事，難怪生了一個這樣荒唐的兒子。

===============

五年前寫的文章，今天感受依然一樣。

讀中學的時候，有位老師叫「大奶神」。唔好心邪，大奶神其實係男人，只不過佢英文名叫 Nelson Tai，所以有個咁嘅花名。如果不是戴 Sir，我也不相信真是會有種老師，是可以在你迷途時，跟你坐在碼頭傾偈傾通宵的。

他不會鼓勵我們犯錯，但他容許我們犯錯。戴 sir，點解你咁好嘅？「越早犯錯，越早改過嘛。」

多謝戴 Sir 的包容。

其實好多人大個都未定性，係因為細個冇人畀佢哋任性。

#攻關
IG= marcusyip55

姜子牙證明：成功和年齡沒關系；
朱元璋證明：成功和出身沒關系；
鄧小平證明：成功和身高沒關系；
李嘉誠證明：成功和文憑沒關系；
羅斯福證明：成功和身體沒關系；
比爾蓋茨證明：成功和學歷沒關系；
馬雲證明：成功和長相沒關系！
但他們都有一個共同點： 清晰的目標和堅韌不拔的毅力！ 人生三大悲哀：遇到良師不學；遇到良友不交；遇到良機不抓！共勉之！