2016年港男冠軍黎振燁一直喺星海浮沉，今日蘋果日報就爆出佢同另一位女藝員朱智賢喺屯門幽暗山上密會食 cake 嘅影片，報道指二人拍新劇傳出撻著，不過黎振燁當選時已經係人夫，據指佢老婆目前亦有孕8個月，而朱智賢亦都有謝東閔相伴，貴圈真亂！
據報，有人放料比蘋果日報，指黎振燁買咗個藍莓朱古力黑森林蛋糕同草莓心型蛋糕，然後揸車去屯門市中心朱智賢屋企接對方，最後駛到屯門一撻山邊停低，享受二人獨處時光。
品嚐黑森林蛋糕之際，記者忽然舉機上前拍照，二人在車上大驚低頭，加上記者嘅閃光燈，二人狼狽萬分，猶如囚車押解場面。黎振燁隨即向記者表示：「唔係（拍拖）呀！我地準備開工嗰啲咋！」記者即串：「哦！係呢度（山上）準備開工！」兩位都唔係4月生日，黎振燁就語無論次表示：「唔係慶祝呀，買咗咋，預早買咗咋。」但黎早於3月生日，而朱就6月生日，預早買兩個月？
被問到「你知唔知佢有老婆㗎？佢老婆大肚㗎喎。」朱智賢沉默，一臉無奈，黎振燁就不斷強調：「（我地）唔係一齊㗎，唔係一齊㗎。」
二人駛離深山，黎於屯門放低朱智賢，並駛向將軍澳方向，相信係番電視城向高層自首。而朱智賢就接應記者追問，但同樣語無倫次：「如果唔係嗰度食蛋糕，就唔會比你地影到！」更否認謝東閔係佢男朋友。據蘋果日報指，兩位喺聽日會開記者會，而佢地 IG 亦都轉成 private 避風頭。
