有日一家人入到嚟診所。
佢哋行埋嚟時我聞到好大陣味…冇聞錯嘅話應該係榴槤！
喂，正喎，我愛阿槤呀！不過有得聞冇得食慘過屙爛屎喎…
突然有位坐喺度等緊睇醫生嘅小姐作嘔，再飛快咁衝出診所。
之後電話就響起，我：「你好，乜乜診所」
一把女聲：「係咪有榴槤喺度呀？」
我諗應該係頭先衝咗出去嗰位小姐，我望望嗰一家人，細細聲講：「應該係啦，我試吓叫佢哋拎住榴槤嗰位出返去呀，佢走咗之後我再打俾你呀」
佢：「好」
收線後，我同嗰一家人講：「唔好意思呀，你哋係咪帶咗榴槤入嚟呀？麻煩可唔可以你哋其中一位帶埋個榴槤出去等呢？」
嗰家人互相你眼望我眼，似乎冇人肯出去。
家人A望望診所周圍同我講：「你都冇話唔俾拎入嚟，冇寫喎」
咁夠冇話唔俾屙屎屙尿啦。
我：「始終呢度係診所，嚟得嘅都係病人，已經好唔舒服嘅唔會想再聞到氣味比較濃烈嘅嘢，希望你明白啦」
家人B：「我哋夠係病人啦，又唔見我哋有事」
你有金剛不壞之身就唔駛同人講嘅。
我：「人人對氣味嘅反應唔同嘛，你OK榴槤人哋未必OK嘛」
家人A：「你歧視榴槤呀？我去平機會告你呀」
家人B：「係呀！我即刻搵平機會嚟！」
點呀，叫個榴槤自述被歧視嘅經過嗎？
家人A：「唔出聲知驚啦？登記妹登記啦」
好驚呀真係。
呢個時候電話響起～
我：「你好，乜乜診所」
一把女聲：「佢哋仲未出嚟嘅？」
我細聲講：「係呀，佢哋唔肯拎個榴槤出去」
嘟。小姐cut咗我線，應該係嬲我辦事不力…
診所門被推開，因為榴槤而離開診所嘅小姐返嚟啦！
佢行到嗰一家人隔離，視線向下望，大概確定好榴槤嘅位置…
嗰家人都望住小姐，小姐一句『好臭』，之後就直接嘔咗出嚟…
『呀～～～～我條褲都有呀！』嗰家人嗌住咁雞飛狗走….
可憐嘅阿槤要報銷，可憐嘅我要出去執嘔吐物…
收工要即刻去買咗個阿槤報仇！
望診 在 【看中醫】20150103 - 望診 - YouTube 的八卦
歷史上流傳許多神醫看病的故事，醫生只要看看病人，問個兩句，五臟六腑的病就摸透了，像是扁鵲，只用眼睛觀察齊桓公的臉色，就能看出他的健康出了問題 ... ... <看更多>