<<點解以前會覺得份糧夠洗， 點解以前咁易滿足 >>
最近有幾個朋友都請緊人， 佢哋話而家嘅人工好貴，fresh grad都14,5k , 我話其實計返通脹嚟講，14,5k 都好唔夠洗，如果而家畀14,5k你，你會唔會覺得生活好貧困？ 朋友話如果而家跌返落14,5k人工，應該生活唔到，然後我哋衍生咗一個問題「點解以前拎住11,2k會生活到？點解以前咁易滿足？」
撇除消費通脹，同埋家庭負擔，我諗點解以前覺得份人工夠洗，係因為以前個世界好細，眼界好窄。人愈大愈想要享樂，除左知道時日無多之外，更重要係，出嚟做嘢做得愈耐，享樂時間越少，壓力越大，生活得越嚟越唔開心，於是希望用更多嘅錢，快捷咁買啲享樂返嚟，希望個人開心返，可以繼續捱落去。
可能呢啲通通都係藉口， 純粹係人大左，慣左洗大左。個人越來越鍾意享受，所以人工真係唔可以返轉頭。
喺呢一個「洗慣咗唔可以返轉頭」嘅定律下，有樣嘢我好慶幸，好幸運地，我擁有一個非常貧困嘅成長環境，呢個係我呢世人最大嘅恩賜 .....
作為一個喺深水埗成長嘅窮撚，我嘅起點係好低，我細個就住喺深水埗嘅舊樓，喺我心目中，居屋怡閣苑已經係豪宅，怡閣苑樓下個 有韆鞦玩嘅公園， 當年喺我心目中，已經等於今日豪宅入面嘅clubhouse。西九龍中心已經等於 ifc或者Pacific Place 。我仲好記得，當年我就住喺 中電深水埗中心附近，有啲無知嘅鄰居話中電中心會釋放輻射，當年我理解係，由於家貧，所以要委屈住喺好似切爾諾貝爾核電廠嘅輻射區範圍度。而我身邊嘅所有朋友都好窮，記得有一次小女童軍嘅活動係教餐桌禮儀，童軍領袖問我哋有冇食過西餐，我答佢「有，梗係有啦！去麥當當食早餐我有用刀叉架，仲有去大家樂鋸扒」。當年我嘅快樂係唔需要跨區，同埋搭飛機尋找架，近距離就可以接觸到快樂。
以前我嘅世界好細，我嘅眼界好窄，我嘅起點好低，於是成長以後，小小嘅甜頭，都可以得到大大嘅快樂。
今日睇新聞，見到南韓大韓航空老闆有兩個女，其中一個女搭飛機嘅時候，因為個空姐畀包果仁佢， 冇幫佢打開擺喺隻碟度， 於是佢要求人哋下跪道歉。 另一個女用水潑同事， 最後呢兩個女因為果仁門同潑水門事件， 畀佢老豆炒咗魷魚，以後都唔使返工。
睇到呢單新聞嘅時候，我心諗，邊有一種懲罰係咁爽皮，你有一個有錢嘅爸爸， 因為由細到大嬌生慣養， 大個蝦蝦霸霸犯錯，俾爸爸罰你以後唔使返工。
睇完呢單新聞，我心入面真係有一個好強烈嘅想法：「好彩我細個夠窮，如果我比較有錢， 有地位有權勢， 可能我好難先至得到快樂」。其實如果我爸爸有一間航空公司，可能我食公仔麵都會要工人搵把梳，梳到啲麵好似負離子電髮咁 直，我先肯食，個兩姊妹算抑制架啦。
點解以前份糧會覺得夠使，點解 以前會咁易滿足，因為你愈細，愈窮，愈「一無所有」， 一無所有，四大皆空嘅時候，得到少少都可以開心到鎮。
有錢人嘅快樂門檻太高，佢哋永遠都唔明白窮人係有幾輕易得到快樂，( 咁當然啦，有好多人寧願做唔快樂嘅有錢人，都唔想一世做窮撚。)
當你諗到，以前咁輕易滿足嘅時候，就會明白， 其實人生都唔需要過份嘅追求嘅。
#佛系快感
#但人工唔可以佛系喎
