呢篇唔係好好笑，純粹好想分享下，你知啦，而家唔分享第日唔知仲有冇機會呀😢😢
話說無論做茄子航空定維記航空，每班機之前都會有一個briefing嘅環節，成班機組人員圍埋一齊傾下當日班機嘅information，例如有幾多客呀，有咩需要注意呀等等。
咁以前我喺茄子航空嗰陣呢，當每一次知道嗰日班機係得好少客呢（我哋稱之為：light load），我哋都會相當之咁興奮㗎！因為少客意味著啲咩呢？少客即係做少啲！冇咁辛苦囉！我記得茄子嗰陣有啲大陸三三線嘅城市，未做空少之前真係聽都未聽過有呢個地方！次次飛都係少客到飛起！最多10幾20個客，少則個位數字都試過！總之無論飛咩地方，只要班機係少客嘅，一眾同事都會普天同慶咁款，爽歪歪㗎喇！
當我抱住呢個心態去到維記，呢兩年半嚟喺維記嘅briefing真係令我大開眼界呀！其實嚟到維記你會發現其實呢間公司發展都幾似茄子㗎！兩間公司都係開咗十幾年，同埋如果你google一下都會得知，維記曾經開過幾條長途線，到最後都係close咗！所以，好多時breifing嘅時候，只要知道嗰班機係light load，有啲同事都會表現到憂心忡忡，會問公司係咪蝕緊錢，或者會覺得呢個唔係好徵兆，並唔會個個都十分hyper覺得唔洗做咁！
我第一次見到呢個scenario嗰陣真係呆咗，我以前覺得，我做飛傭㗎姐，公司賺唔賺到錢又唔到我管嘅！但係見到佢哋，真心會為到自己公司嘅狀況worry！有時候，briefing嗰陣，佢哋仲會好主動咁每人諗一個班機上面自己可以做到、又令到人再搭我哋嘅一件事，又會每人share一啲好postive同客人嘅故事。可能佢哋對於咁嘅briefing一早已經習以為常。對於住我呢個「外來人」嚟講，有時候我齋聽佢哋個briefing，已經覺得有少少少被佢哋嗰種團結、歸屬感同埋真誠打動咗，仲會即刻motivate咗我嗰班機都要做好啲！
講真，我而家今日唔知聽日事，只可以做好每一班機。（認真咗）萬一我日後有幸將會一個高級乘務長，要hold一個briefing，我又會講啲咩畀啲crew知呢？我會想班機係一個咩嘅氣氛呢？
維記呢個膠流計劃除咗畀我喺一間外國公司做嘢嘅經驗之外，仲畀我睇到好多唔同人做事嘅方式同睇嘢嘅角度同態度，當初嚟嘅決定到今日都真係無悔嘅！
希望有機會再同大家分享多啲 :D
