診所內有位姨姨久唔久就會嚟睇醫生check吓血糖，因為佢外表好潮，聲音好響亮嘅關係...
我記得佢。
隔咗一段時間，佢冇嚟到...
之後有日佢出現了。
佢把聲冇以前咁響：「姑娘，唔該」
我：「咦？你好耐冇嚟啦喎！」
佢：「係呀，唔係咁舒服」
我：「咁你坐坐先呀，我同你登記呀」
入到醫生房，佢講返佢前排冇嚟嘅原因。原來佢...大腸癌末期，亦擴散咗去其他地方。
佢好平靜咁同醫生傾吓計，講吓佢嘅人生，講吓佢嘅過去。
之後同醫生講：「我唔駛要藥啦，醫生，我淨係想同你傾吓計，當你係一個老友咁，趁仲有機會見吓想見嘅人識嘅人。」
出到嚟之後，佢望住我：「姑娘呀」
我：「嗯？係～」
佢：「好多謝你記得我」
我：「唔好咁啦～」
佢：「我已經接受咗啦，嗰啲醫生同我講有得食藥有得做化療」
我：「咁你做唔做呀？」
佢：「我揀咗唔做。我唔想剩返嘅時間係去做化療，唔想見到一個落晒形唔係自己嘅我，唔想淨係聞到醫院嘅消毒藥水味。到時我怕我認唔到自己，我係邊個呀？我係乜乜乜，就算個天要我走，我都要走得好好睇睇。冇可能走得咁樣衰！」
我：「明嘅～你自己覺得舒服就可以啦」
佢：「居然唔話我蠢？你知唔知醫院個醫生鬧我呀，鬧我唔肯醫呀！」
我：「真係最緊要自己覺得舒服嘅啫，只要你覺得開心就好啦」
佢：「我成世人儲埋儲埋啲錢可以而家一舖用晒佢，開心㗎！」
我：「你諗住點駛啲錢呀？」
佢：「去玩啦去食啦去扮靚，去個旅行都好，我想去歐洲好耐㗎啦！」
我：「咁就去啦，去歐洲做個貴婦～影多啲靚相呀，我都未去過歐洲，返嚟話我知有咩好食呀」
過咗幾個月，佢再返嚟診所同我分享佢歐遊嘅趣事～佢一路講一路笑，把聲仍然好響亮。
佢：「你真係要去吓呀！好鬼靚㗎！去完真係覺得自己屈喺香港太耐，早就應該去見識吓，今次真係死而無憾啦！真係好開心！」
之後，我再冇見過佢了。
你開心，先係對自己最重要的～
有咩好食 在 將軍澳到底有咩好食？挑戰問街坊食五間推薦 ... - YouTube 的八卦
港實測#將軍澳#掃街今集@佩儀PuiYee 同文欣挑戰劣食之城將軍澳！問五間街坊推介！即刻去片睇下佢哋食到幾多間啦！ Follow我哋成員！ ... <看更多>