2019年8月5日，有位朋友好早就喺黃大仙龍翔道被捕，佢承認暴動罪，獲四分一扣減及求情酌量減刑下，今日被判處45個月監禁。
旁聽完，返到立法會座位，收到佢寄出嚟嘅信。
佢被捕之後我哋先認識，佢一直繼續努力工作，聯絡我話想捐錢到國泰民安 人道支援，幫助一下其他個案。知道佢有案在身，我拒絕接受捐款，佢好堅持，我就話我哋嚟緊會有個月餅班，邀請佢兩夫婦嚟參與製作，再送返畀捐助國民支援嘅有心人，就等於幫咗忙。
之後我哋安排一啲社區服務工作，希望義務工作可以幫到下求情，佢好積極參與。亦主動聯絡街頭健身教練，兩夫婦一齊學習徒手健身知識，無論去到邊都可以鍛鍊身體之餘，心意係安排太太定期做運動，保持身心健康，教練話佢係其中一對最自律嘅學生。
上星期日，我哋一齊去行山，揀咗一條較為崎嶇嘅路線登山，沿途都冇乜人，反而落山時就會迎面遇到上山嘅人。我哋講笑話如果迎面遇到「山系女孩」就打個招呼，講聲早晨。點知真係遇見時，一係就大家都靜晒，一係就得我一個出聲。
佢當日被捕嘅情形，就好似咁，以為大家一齊行動，點知一剎那得一個人。佢就企喺最前位置，烏低身執催淚彈嗰一瞬間，差佬衝過嚟拉佢，佢回身發現後面突然冇晒人，得返佢一個，掙扎都冇用。
好少聽佢抱怨，反而想盡辦法積極面對案件，可以做嘅事情都盡力做足，仲會諗點樣去幫助其他人。最後一次行山，仲話組隊行山執吓垃圾，清理郊野環境，可能都幫到求情。
能夠喺黃大仙全身而退嘅，都應該感謝佢。
月餅班 在 班兰椰蓉冰皮月饼食谱|椰蓉馅，软糯不干 - YouTube 的八卦
奶黄馅冰皮 月饼 食谱Custard Fillings Snowy Mooncake Recipe: https://youtu.be/RP7eRcxxfx4 ♢ 维他精冰皮 月饼 食谱Vitagen Snowskin Mooncake ... ... <看更多>