深夜無人睇，靜靜雞講故仔……
《我老婆由細到大都鐘意紙紮公仔》
喺我自焚前兩個鐘，嗰陣我帶住疲倦嘅身體返緊去酒店時侯，我一直在意背後有人跟住我。當我走到某條街道時，突然聽到有把熟悉嘅叫聲不斷叫我。
「老公……老公……小心呀。」係我老婆把聲。我沿住聲音來源左望右望，先發現原來係身旁一條後巷發出，但呢條後巷漆黑一片，完全睇唔到入面有啲咩，亦都感到份外陰森恐怖。
「老公……老公……小心呀。」老婆再次叫我，我更加確認呢把係老婆嘅聲音。
我吞一吞口水，冷靜自己諗下，無理由嘅，無理由會聽到老婆把聲，一定係我精神太大壓力同緊張……但我實在忍唔住想睇下發生咩事，於是膽粗粗咁走入呢條後巷睇下。
當我步步為營咁行入去時，電話突然響起，嚇到我仆街，一望之下原來靈堂師傅打嚟。
「喂師傅？」
「呀劉生！做咩今日唔過嚟拎啲祭品返去呀！」
「唔好意思，我呢排好忙，所以唔係好記得，請問係咩祭品？」呢段時間真係被湊女同返工嘅事逼得透唔到氣，好多事情都忘記。
「今日係你老婆頭七呀！你要返去屋企到燒下祭品比你老婆呀！如果唔係你老婆返到屋企咩都無就慘喇！」
「咁呢家點算呀？」
「你睇下附近有冇啲紙紮舖有得賣喇！我已經放工唔等你喇！」說罷，師傅就收咗線。
師傅一講，我先記起原來有頭七回魂呢一日，呢一日可能都會見到老婆。
但一時三刻邊到搵間紙紮舖，腦海突然閃出阿傑嘅樣，於是急急腳跑返去街市搵阿傑。
當我想轉身離開時，先醒起頭先聽到老婆嘅聲音，我望望呢條後巷遠處，似乎我真係神經緊張，連最重要嘅日子都可以唔記得，岩岩聽到嘅聲音一定係幻聽，算，搵阿傑要緊。
於是就離開條後巷，直奔到街市。
「呯呯呯！呯呯呯！」我不斷敲打舖頭道鐵閘。因為我見到入面仲有燈光，阿傑一定仲未走。
「阿傑！我呀！開開門！有急事！」
過咗一陣，鐵閘慢慢拉開，阿傑一臉疑問咁望住我：「做咩返轉頭搵我？」
「原來我老婆今晚頭七，我真係無用，咁重要嘅日子都唔知道！你有冇咩嘢岩用比我燒比老婆？」我急問。
「嘻嘻，你都唔熟傳統嘢，身邊又無人識，唔記得都正常喇。好再你搵到我咋，嘻嘻，等我幫你……搵下咩岩洗燒比你老婆。」阿傑說罷便轉身入去搵。
雖然阿傑比我印象都幾陰沉，但佢又真係幾幫我，加上佢又係呢方面嘅專家，呢個時候有佢幫手算我執到。
等咗一陣，阿傑拎住一罐嘢同一袋紙紮品，同埋一個紙紮公仔。
「你屋企岩岩比消防救完，一定成屋都係水，周圍都係濕氣，咁樣就算你用火機燒啲祭品都唔會燒得旺，呢罐係白電油，到時你倒少少落去，包你燒到旺一旺。」阿傑將罐嘢交比我。
「ok……但係呢個公仔會唔會太大件，係咪真係需要？」個紙紮公仔係傳統嗰類，全身皮膚粉紅色，五官都係畫上去，每筆都相當粗。
「咁多嘢燒比你老婆，唔燒多個人比佢，邊個幫你老婆拎呀！嘻嘻！」阿傑又講得幾有道理。
於是我左手捧住個紙紮公仔，將罐白電油放入背包，再右手拎住袋祭品。
「幾錢話？」我醒起未比錢佢。
「一場朋友，嘻嘻，唔洗喇。就當我同你今日見面嘅見面禮。」
「多謝。再聯絡。」之後我都急急腳返屋企。
我離開街市，可能我個紙紮公仔太外眼，好多人經過都望一望，有啲人仲嚇到專登避開我。我Call的士想返酒店接個女一齊返屋企，諗住今晚成晚就同個女等老婆返嚟，我估老婆都想見一見個女。
落車後，沿路返去時，個腦不斷回想起過去嘅壓力，抬頭望天，唔知道老婆呢刻過成點？收唔收到我燒比佢嘅紙紮呢？佢會唔會同我一樣，都係孤獨寂寞呢？
不知不覺間，我竟然返咗去屋企，而唔係酒店。打開門後，缺乏燈光下，整個環境都漆黑一片。
我發覺個人暈暈地，狀態唔係咁好，想開燈時侯先發覺電線一早燒爛哂仲未搵師傅上嚟整返。一時之間我又無蠟燭點燃。唯有趁外面仲有少少月亮同街燈照射底下，盡量做好個儀式。
如阿傑所講，屋企濕氣好重，個地下仲有好多水，仲有一陣燒焦嘅味道。
我左望右望下，都係揀返廁所入面燒好啲，廢事喺廳到燒，啲煙會影響到其他人。
入廁所後，我放低個背包同紙紮公仔，從背包入面拎出一支白電油，然後拎出袋紙紮品出嚟。
我將啲嘢放喺浴缸入面，然後倒上白電油係側邊，一點火，整堆紙紮品隨即燒起嚟。
我跪喺到望住堆紙紮品一路燒，雙眼好似出現唔同幻影咁，我搖一搖頭想清醒下，但都感到自己個人好累。
突然間，身後嘅紙紮公仔竟然慢慢起舞，不斷來回郁動，但我竟然毫無驚訝，一直呆呆望住佢起舞，因為我覺得佢呢隻舞好似老婆所跳一樣，深深將我吸引住。
但個紙紮公仔一路跳，一路流淚，點解會咁？我見到佢咁樣，我都感受到佢個傷感，係啦，一定係佢好寂寞，好似老婆咁，自己一個喺下面好寂寞……老婆……我都係……嗚……我都好掛住你……
紙紮品燒得旺盛，濃煙佈滿整個廁所。
我更覺傷心。
個紙紮公仔不斷流眼淚，我啲眼淚亦隨之流下。
我望望支白電油，然後默默地將佢倒落自己身上。
「老婆，希望你收到。」說罷，我將火機點燃身上嘅白電油。
火光一閃，我全身都著起火來，身上所有皮膚都立即感到刺痛！令我發出極度痛苦嘅聲音。
係喇，老婆當時就係受到呢種痛苦……嗚……嗚……老婆。
然後我漸漸失去意識。
突然間，廁所入面不論花灑不斷噴出水，水龍頭亦爆掉，噴出巨大水柱，直接將水噴向阿明身上。
………
火勢轉眼間便救熜……
只見老婆企喺廁所門口，傷心地望住老公而哭泣。
……
……
我從醫院之中醒來，張開雙眼頓時覺得成個身體都好痕，好想拗一拗，但當我想郁動隻手時候，一陣劇痛由皮膚外直刺入心，痛得我即時不敢亂動，但一直忍受痛楚夾雜住痕癢嘅煎熬。
「護士！佢醒喇！」身旁嘅外母見到我醒咗，即時通知身邊嘅護士。
外母苦無婆心我講：「你做咩咁傻無啦啦返屋企燒自己呀？你想搵人傾點解唔搵我呀？你又唔諗下你個女！你走咗嘅話，你叫佢點算？」
接著，靜妍望望我，似乎對我狀況有啲驚，我係咪燒得個樣好難睇？定係佢嬲我自殺拋低佢？
當我想開口叫靜妍時，我只能發出：「呀……呀……呀……」我一臉痛苦疑惑點解我把聲咁。
醫生趕來，見到我不斷嘗試出聲，於是阻止說：「劉生！唔好講嘢住呀，你吸入好多濃煙呀，傷咗條呼吸道，所以短期內你唔會講到嘢。」
我無奈地望住醫生，而醫生接著說：「你已經好好運架喇，你八成皮膚燒傷，比著正常人，你一早已經死咗，所以你好好運架喇，我諗你抖返一段長時間日子先，唔好亂郁，我會叫護士每日幫你換繃帶同安排手術架喇。」
我完全呆咗，我一定燒得好難睇，我一定返唔到去正常生活，個女將來一定會厭棄我，我點算好？
外母：「你就喺到休養喇，靜妍就等我去湊，遲下幼稚園開學我再安排佢去讀，你放心交比我喇。」
我望一望外母眼神，腦海再一次閃起外父係靈堂前講嘅嘢：
「你知唔知我當年點解同你外母離婚？就係我老婆太沉迷啲紙紮公仔！佢仲逼個女玩呢啲！攪到個女有情緒病入過幾次醫院！我點阻止都阻止唔到！攪到個女唔知係咪陰影定係真係鍾意，最後連個女都迷上啲紙紮公仔！」
「唔好比個孫女玩埋啲爛鬼紙紮公仔，又老土又核突。」
就因為佢咁講，我先一直避開唔比外母湊個女，如今竟然比佢湊？我即時好大反應，激動地郁動，痛得我眼淚都標出嚟，然後我大叫：「唔……呀……呀…好……呀……」
外母：「好喇好喇，你安心抖下喇，總之……個女今日開始由我去湊喇。」接著，外母同靜妍講：「仲有冇嘢想同爸爸講？」
靜妍仲係一臉迷惑，望住我有一種漸生恐懼嘅感覺，然後搖搖頭。外母見佢搖頭，於是就同我道別，就轉身帶靜妍走。
靜妍邊走邊問：「我想返去玩紙紮車車呀！」
外母笑說：「好好好，你乖我就買個紙紮車車比你玩。」
靜妍開心地手舞足動地跳起，並不斷示意外母快啲行。
我見到佢地走，我用盡力氣大叫：「呀……呀……呀…呀…」
「呀……唔……好……呀……靜……妍……」
「呀……呀…………」
我忍痛地將手一揮，掃低旁邊嘅水杯，嚇得幾個護士紛紛趕來睇我。見我咁激動，以為我好痛而掙扎，不斷安慰我已經無事，一定會好好復元。
但我痛得兩行眼淚不斷流，視線一直望住個女被帶走，我只能盡力大叫：「呀……呀……呀……」
然後，佢地兩個消失於我視線之中。
自此，喺我長期住院呢段時間入面，外母一直湊住我個女，到我康復出院時候，靜妍已經變咗了。
《待續》
＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊
即使上篇差少少先達到7000like，但我都知大家好想睇……所以我今日都急急腳咁放工再打比大家睇。
如果今篇可以真係去到7000like，我再極速出比大家睇
如果唔達到，唔緊要，就當比我休息下～慢慢出都ok 哈哈
記得比like 比share 比留言！留言最緊要！因為每個留言我都會睇！
另外，我暫時偷偷地放隻限量預售link比大家預訂本書
如果大家鐘意《孔明古怪故事集》，記得支持我，買返本。
記住呀，《紙紮公仔》只係故事集其中一個故事咋～本書入面仲有好多故仔架～計返都係幾蚊雞一個故仔…
希望大家支持，但由於限量預賣，所以數量有限，買完即止，希望趕到復活節印起到比大家。過幾日我再出post 正式向大家預賣～
可以喺到買
購買網店：https://homingming.boutir.com/
月亮店意思 在 Re: [問卦] 按摩店都穿這樣喔? - 看板Gossiping 的八卦